Frantziako eta Lapurdiko, Nafarroa Behereko eta Zuberoako ikasleek Lehentasuna hezkuntzari! mezua zabaldu dute.
Izan ere, Xavier Darcos Hezkuntza ministro frantsesak ezarri nahi duen hezkuntza erreformak haien haserrea piztu du, eta inondik inora onartzeko prest ez daudela adierazi dute ozen.
 
Ikasle mugimendu horrek inoiz baino indar handiagoa izan du. Sekula baino antolatuagoak daude, gainera. Ordezkariak izendatu dituzte ikastetxeetan eta ikastetxe guztiak biltzen dituen koordinazio bilkuretan parte hartu dute, antolaketa horri esker lortu dute izandako indarra.
 
Ondoren, irakasleak gehitu zaizkie protestetara, eta baita gurasoak ere.
 
Horren aurrean, Darcosek erreforma atzeratuko duela iragarri du. Ikasleek, aldiz, argi dute helburua: erreforma bertan behera uztea eskatzen dute, eta ez dira konformatu urtebetez atzeratzeko ministroak egin duen eskaintzarekin. Nire hezitzaile bihotzak, itxaropenez eta harrotasunez jarraitu ditu haien ekimenak eta haien inguruko berriak.
 
Aspalditxotik entzuten ari gara ikasleek ez dutela iniziatibarik agertzen, oso indibidualistak direla, ez dutela berean baizik pentsatzen, errazkerian ohituak daudela. Nago askotan uste dugula, eta halaxe jokatzen dugu, ikasleei dena irakatsi behar diegula. Gaitasunetan hezi behar ditugula agindu digute, orain: pentsatzen eta ikasten, komunikatzen, elkarrekin bizitzen, norbera izaten, egiten eta ekiten irakatsi behar diegu, hartzaile hutsak bailiran.
 
Tematzen gara gure begietatik ikusten dugun mundua erakusten, eta ez dakit noraino ote garen kontziente mundu hori mundu posible guztien artean bat besterik ez dela.
 
Dena irakatsi diegulakoan gaude, eta, hara, guk irakatsitakoa baino gehiago ikasi dute. Ikasleak lo geneuzkalakoan, interesik gabe.
 
Irudimena erabiliz eta teknologia berriak baliatuz mugimendu zabal, indartsu eta eraginkorra antolatu dute. Eta ez daude, ez, dagoenarekin konformatzeko prest. Ezta lehen eskaintzarekin planto egiteko ere.
 
Georges Jacques Danton-ek esan zuen: “Aprés le pain, l’éducation est le premier besoin d’un peuple”. Ikasleek irakatsi digute bidea: antolatu, borrokatu, eta eutsi tinko helburua lortu arte.
 
Orain, gainerakoon, hezitzaileon, gurasoon eta herritarron txanda da. Gogaitu arte entzun dugu beste mundu bat posible dela, baina antolatuz eta borrokatuz besterik ez dugu lortuko, lortzekotan.
 
Ikasgai ederra eskaini digute ikasleek… ikasi eta irabazi!