Ermuko Foroak eta enparauek argudiatuko dute EAEko Auzitegi Gorenak hankaz gora jarri duela Espainiako Gorenak Atutxa auzian erabaki zuena. Orduan ere auzia prozedura laburrekoa zen eta herri akusazioa bakarrik zegoen, baina Espainiako Gorenak ebatzi zuen aurrera jarrai zezakeela, auzipetzen zen ustezko delituak –Botin auzian ez bezala– ez zuela inongo pertsona zehatzik eragiten edo kaltetzen, Gorena bera baizik.
 
Prozedura kontuen gainean jardun beharko du Espainiako Gorenak, eta ikusiko da nola ateratzen den atakatik. Baina mamirik ere badu auziak –hori da larriena gainera– eta Gorena argia izan zen Manos Limpiasek Jose Luis Rodriguez Zapateroren auziperatzearen –azken negoziazio prozesuan ETA eta Batasunarekin hitz egiteagatik– eskaera atzera botatzean. Funtsean, argudiatu zuen ez zegokiola botere judizialari botere exekutiboaren kontrol lana egitea, horrek zuzenbide estatua desitxuratuko lukeelako, botere banaketari zegokionez, kontrol lan hori Espainiako Legebiltzarrak egin behar zuela. Orain ikusi beharko da orduko mami-ebazpen horrek nola eragiten duen oraingo forma kontu hauetan, prozedura eta mamiaren arteko lerroa fina baita sarri eta hutsala gehienetan.

DEMOKRAZIA 3.000.000 (D3M) hautes-plataforma ere bete-betean dago lotua Alderdien Legearekin eta, PSE besteak beste, berau indarrean jartzeko eskatzen ari da noren eta Rodolfo Aresen ahotik. Bera ez zen bildu Batasuneko buruzagiekin, “Batasunarik ez zen esistitzen eta”, ezker abertzalekoekin baizik. Hori dio elkarrizketetan. Nortzuk eta Otegi, Barrena, Petrikorena, Etxeberria eta Dañobeitia Batasuneko kide izatearen susmorik ez bazuen Aresek, zergatik orain pentsatu behar Lasheras, Lopategi, Itziar Aizpurua eta D3Mko beste hainbat Batasunaren ordezko batekin zerikusirik izan dezaketenik? Pentsa dezala Espainiako Justiziak bakarrik ezker abertzaleko kideak direla eta listo.
 
Baina inozoegia da pentsamolde hori, jakina, tartean negoziazio saiotik, gerra doinuetara pasatu garelako, gatazka gordinera, terrorismoaren itzulerara... aukera beza bakoitzak bere izendapena. Ez dago berririk ezker abertzaleko ekimenean, baina legez kanpoko ezker abertzaleak politika egiteko duen tresna garrantzitsuenetakoa jartzen du abian urrats honekin. Espainiako Justiziak hauteskundeetan parte hartzeko bide formalari ateak itxiko dizkio, eta gero ikusi beharko da D3Mk zer egingo duen, edo paperak egin eta bere boto baliogabea kontatu edo abstentzioa eskatu. Agian babestuena abstentzioaren eskaera bideratzea litzateke, egungo gatazkaren zamapean, horrek kontaketa lausoagoa baimentzen duelako eta arrisku gutxiago dakarkiolako. Nahiko arrisku eta arazo du bere gain ezker abertzale nagusiak are eta gehiago bizkarreratzeko.