Idurre Alonsok Euskal literatur sistema eta literaturaren didaktika aztergai ikerlan akademikoaz hitz egin du Berrian: "Euskal literatur sisteman indar handiena duten faktoreak merkatuarekin lotutakoak dira. Hala, oso nabarmena da salmenten, promozioen, hedabideen eta sarien eragina, eta hierarkia kualitatiboak indar urria dauka (...) Gutxi dira kritikari konstanteak, eta irakurleak kritika zintzo eta erregularra behar du (...) Euskal literatur sistema idazle gutxi batzuen ospeari lotuegi ikusten dut (...) Irakasleek ez dakite literatura zertarako irakatsi behar den; nork bere hautua egiten du".
Mikel Valverde ilustratzailea elkarrizketatu du Gara egunkariak: "Duela zenbait urte, aurreiritzi handiak zeuden gure sektorean: marrazkidun liburuak haurrentzat zirela, ilustrazioak eleberrien kalitate eskasa mozorrotzeko jartzen zirela... Gaur egun baztertu egin ditugu horiek guztiak (...) Hedabideek ere aurreiritzi mordoa kendu dute gainetik eta, hori dela eta, nobela grafikoen edo album ilustratuen kritikak ikus ditzakegu egunkari edo aldizkarietan. Horrekin guztiarekin batera, produktuen kalitatea oso ona da orokorrean, eta horrek ere laguntzen du".