Berrikuntza irekia: ideien batuketa lelopean berrikuntzan adituak direnek esperientziak elkar trukatuko dituzte. Beraz, kasu praktikoetan oinarrituko da zazpigarren edizioa duen BGC+i biltzarra. Gonbidatutako enpresak ondokoak dira, besteak beste: Ikea, Telefónica, JAZ-Zubiaurre, Skunkfunk, Puleva Biotech Exxentia, Cirque du Soleil, Nespresso eta NH Hoteles. Guztira berrikuntza gaietako 20 aditu eta 500 batzarkide bilduko dira. Bertaratzen den orok bere esperientziaren berri emateko aukera izango du.
2008ko edizio honen antolatzaileak SPRI (Industri Sustapenerako eta Birmoldaketarako Elkartea), AETIC (Espainiako Elektronika Enpresen, Informazio teknologien eta Telekomunikazioen Elkartea), GAIA (Euskal Autonomia Erkidegoko Elektronika eta Informazio Teknologien Industrien Elkartea) eta PMP enpresa izan dira.
Berrikuntzaren, teknologiaren eta jakintzaren gaineko biltzar hori xede jakin batzuekin antolatu da: enpresetan berrikuntza nola kudeatu ikastea, merkatuko enpresa berritzaileen gainean gogoeta egitea eta berrikuntza eragiteko ideiak partekatuz lankidetza mekanismo eta dinamikak abian jartzea. Horretarako, gaian aditu direnek, alde batetik, osoko bilkurak eta saio paraleloak emango dituzte eta, bestetik, kasu praktikoak aztertuko dira.
Esperientziak elkar trukatuz
BGC+i biltzarreko antolatzaileek hainbat sektoretako negozio arduradunak gonbidatu dituzte; esaterako, Eric Von Hippel, MIT Sloan School of Management-en Innovation and Entrepreneurship Group-eko zuzendaria eta irakaslea. Berrikuntzaren ikerketan aditua den honek berrikuntza demokratizatua izango du hizpide. Bere aburuz, “demokratizazio hori informazioarekin loturiko produktuetan, softwarean eta produktu ukigarrietan ematen ari da eta fenomeno baikorra da, onurak ekartzen dituelako bai gizartean, bai berrikuntzan”. Beraz, “ekoizleek berrikuntza prozesuak nahitaez berriro diseinatu beharko dituzte egoera berrira egokitu nahi badute”. Beste gonbidatu bat ADEGIko presidente Eduardo Zubiaurre izango da eta berrikuntza sistemaren diseinua izango du mintzagai.
Topaketa honetan Ikea fenomenoa ere aztertuko da. Horren ardura Barakaldoko Ikeako zuzendari Belén Frau-k izango du. Ikearen arrakasta inork gutxik jar dezake ezbaian, datuei begiratzea besterik ez baitago horretaz jabetzeko: 2007an 19.800 milioi euroko fakturazioa lortu zuen mundu osoan. Non dago Ikearen arrakastaren gakoa? Barne prozesuak birplanteatzean, hain justu. Horretaz guztiaz hitz egingo du Belén Frauk.
Ez dira, baina, enpresak soilik aztertuko, berrikuntza enpresetan ez ezik herrialde ereduetan ere aurkitzen baita. Finlandia dugu seguruenik eredu argienetakoa, hezkuntza sistema eta berrikuntzaren ikuspegia medio herrialde aitzindari bilakatu baita munduan. 2005. urtetik Finlandiako enbaxadore Madrilen lanean diharduen Maija Lähteenmäki izango da BGC+i biltzarrean Finlandiaren ereduaren berri emango duena.
Sormenaren garrantzia
Ideia berritzaileetan dute abiapuntua BGC+i biltzarrean bilduko diren enpresek.
Modaz kanpo geratzen ez diren arropak egiten dituzte Skunkfunk enpresan; zirkoa bizimodua izatea –eta ez goiburua– lortu du Cirque du Soleilek; barne prozesuak birplanteatzea eta, horrenbestez, diseinua demokratizatzea izan da Ikearen egitekoa; profesional onez inguratu eta etengabeko berrikuntzaren aldeko apustua egin du, aldiz, Puleva Biotech Exxentia enpresak. Funtsean, negozioa egiteko bide berriak jorratu dituzte, sormenean eta berrikuntzan oinarrituz.
Enpresa berritzaileen bilgune
Volvo Cars, Travel Club, Telefónica, BBK, Correos, Banco Guipuzcoano, Kaiku, Nokia, e-Dreams, Kukuxumusu, Eroski, eta abar. BGC+i-ren lehen ediziotik aurtengora igaro diren enpresetako batzuk besterik ez dira horiek. Hainbat sektoretakoak izanagatik, badute zerbait elkarbanatzen dutena: denak dira ezagunak eta denek lortu dute arrakasta euren lehia ingurunean.
Marta Capella: «Nespresso ez da soilik kafea, kafe perfektua da»
* Nespresso-ko marketin managerra
Marta Capella Elizalde BGC+i biltzarreko gonbidatuetako bat da. Duela hiru urtetik da enpresako managerra. Nespressok kafea eta kafe makinak saltzen ditu. Enpresaren garapena Negozio Eskolek gehien aztertzen duten kasuetakoa da, berrikuntzaren eredu argia delako.
Nola lortzen da betiko kafea luxuzko produktu bihurtzea?
Nespresso ez da soilik kafea, kafe perfektua da. Emaitza horretara iristeko ekoizpen prozesu guztian erabateko kalitatea bilatzen dugu, kafe berde hoberenak hautatuz, aditu hoberenekin lan eginez, kafe aniztasun handia eskainiz, diseinu berritzaileko kafe makinak eta salmenta lekuak erabiliz, 24 orduko zerbitzu pertsonalizatua eskainiz, eta abar.
Berrikuntzak zein leku du Nespressoko negozioan?
Gure negozioaren gakoa etengabeko berrikuntza da. Bezeroei makinetan, arreta zerbitzuan eta kafe motetan berriena ematea ezinbestekoa da guretzat. Horretarako, ikerketara eta garapenera bideraturiko barne departamentua daukagu, kafe aditu onenekin lan egiten dugu eta Nespresso Kafearen Zientzia Programa dugu martxan, langileek kafea hobeto ezagutu eta teknika berriak ikas ditzaten.
Arrakasta edukitzeko ezinbestekoak al dira berrikuntza eta sormena?
Bai, dudarik gabe. Gero eta lehiakorragoa den merkatuan ezinbestekoa da desberdintzea eta kontsumitzaileei gero eta balio handiagoa ematea. Horretarako, berrikuntza eta sormena nahitaezkoak dira.
Aurreratuko al zeniguke BGC+i kongresuan emango duzun hitzaldiaren ildoa?
Nespressok izan duen garapena aztertuko dugu, biltzarrera bertaratutakoek uler dezaten nola irits daitekeen kafea arrunta eta egunerokoa izatetik luxuzko produktu izatera. Nespresso marka nola eratu dugun eta gure marketin estrategia zein den aztertuko dugu.