Basa-tabakoak oso teknika berezia erabiltzen du polinizatzaileak erakartzeko baina haiek landarea ez akabatzeko, berriki Alemaniako Max Planck institutuko ikerlari talde batek Science aldizkarian argitaratutako artikuluan jakinarazi duenez.

Landareek, polinizatu ahal izateko, kanpoko laguntza behar izaten dute gehienetan: txoriak, intsektuak... Horiek erakartzeko koloreak, usainak eta abar erabiltzen dituzte, baina behar ez diren bisitariak izan ditzakete, eta horiek landareen nektar guztia xurga dezakete polinizazioa gertatu gabe. Nola erakarri nahi dituzun polinizatzaileak baino ez? Basa-tabakoak, hori lortzeko, usain uxatzaileak isurtzen ditu, usain erakargarriak ez ezik.

Tabakoaren usain goxoa bentzilo azetatoaren bidez emititzen da, gauetan, eta gaueko tximeletak eta hainbat kolibri erakartzen ditu; baina nektarrak uxatzailea ere badu, eta hori nikotina da. Ikerlariek hainbat proba egin zituzten landare desberdinekin; genetikoki eraldatuz, batzuek nikotina isurtzen zuten eta besteek ez. Horrela ikusi zuten azken horiek askoz ere bisitari gehiago izaten zituztela aurrenekoek baino, eta nektar gehiegi galtzen zutela, landarea ahulduz. Ostera, bentzilo azetatoa isurtzen ez zuten landareek ez zuten bisitaririk izaten eta ondorioz polinizatzeko aukera eskasak zituzten.

Ikerlarien arabera, usain ona eta txarraren arteko oreka dinamikoa da eta landareak erabakitzen du zein den bien arteko proportziorik egokiena une bakoitzean.