Bere bizitzako gau zoriontsuenaren ondoren, euskal punk zale batek ezusteko mingotsa izango du, etorkizuna baldintzatuko dion ezustea. Gustuko duen neskak haur txiki bat zaintzeko agindua dauka. Haurra lo dagoelakoan, lasai ekin dio “lanari” neskak, ez hainbeste mutilak, umea noiz esnatuko beldurrez baitago. Eta halaxe gertatuko da. Beroaldirik handienean daudenean haurra negarrez hasiko da. Larrua jotzeari utzi eta umea beso artean hartzea besterik ez du egingo mutilak, baina neskaren ama gelan agertuko da eta gaztea larrugorritan ikusi; pederastatzat hartuko du eta salaketa jarriko dio. Ondorioz, Azalore atomikoa eleberriko protagonistak alde egin beharko du atzerrira. Londres ezagutuko du, baita Afrika eta Herbehereak ere.