'Taranabant' botika
Antzeko beste medikamentuak ez bezala, molekula berria ez da apetitua gutxitzearekin konformatzen. Energia kontsumoaren gain ere jarduten du, mekanismo horrek ez baitu ondo funtzionatzen gain-pisua duten pertsona askorengan. Eta ikertzaile guztiek nahi zutena lortu omen dute botika berri horrekin: kaloria gutxiago ahoratzea –apetitua gutxitzen duelako– batetik, eta kaloria gehiago erretzea, bestetik, baita atsedenean egonda ere. Ikerketa egiten ari ziren bitartean, botikaren dosia 12 miligramora igo zuten eta gaixoek atsedenean ere energia gehiago kontsumitzen zutela ikusi zuten, koipe gehiago erretzen baitzuten, itxuraz.
Enpresa farmazeutikoak garatutako konposatu berriak sistema kannabinoidearen gain jarduten du. Garunaren sakonean, hipokanpoan zehatzago esateko, ematen diren hartzaile kannabinoideak dira, beste hainbat eraginen artean marihuanaren efektu psikologikoen erantzuleak. Baina, aldi berean, apetitua eta oreka energetikoa ere kontrolatzen dituzte. Kannabis kontsumitzaileek ondo ezagutzen dute drogak jateko gogoan duen eragina, gose sentsazioa gehitzen baitu. Bada, botika berriak kontrako efektua lortzen du, hartzaile kannabinoideak blokeatzen ditu, gosea eragozteko. Zoritxarrez, bigarren mailako eraginak ere baditu dosi handietan: suminkortasuna eta urdail-hesteetako ondoeza (gorakoak, goragaleak). Horixe ikertzaileen erronka, ondorio onei eutsi eta bigarren mailakoak ezabatzea.