Kontuan hartzekoa da ozono geruzarik gabe gaur egun Lurrean dauden espezieek –gu barne– ezin izango luketela bizi.
Zahar-zaharra
Zientzialari talde batek 410 urteko moluskua topatu du Islandiako itsas azpian, Artica islandica espeziekoa hain zuzen. Orain arte espezie horretako ale asko aurkitu dira, baina hau izan da guztietan zaharrena, aurreko errekorra 374 urtetan zegoen eta.
Molusku mota hori aztertzeak zahartze-prozesua hobeto ezagutzeko balio dezake, eta horregatik, zientzialariek ikerkuntza egingo dute espezie horretako animalien zuntzen inguruan. Esan beharra dago, hala ere, errekordun animalia hil egin zela probak egiten zizkioten bitartean. Zaharra bai, hilezkorra ez.
Arriskuaren usaina
Japoniar ikerlari batzuek Nature aldizkarian argitara eman duten artikuluaren arabera, animaliek usaimenaren bidez arriskua antzemateko duten sistema deuseztatu egin daiteke. Ikerlariok usaimenaz arriskua antzematen ez duten saguak sortu dituzte, bi gauza frogatuz: batetik, animaliek jaiotzatik daramatzatela sudurrean arriskuaz ohartarazten dituzten hargailuak, eta bestetik, animaliak gai direla usain berrien inguruan erreakzio berriak sortzeko.