Aitor Aranak euskaratu du Txalaparta argitaletxearentzat Oscar Wilderen De Profundis liburua. Idazle batek har dezakeen lanik gogorrenetakoa da obra hau. Oscar Wilde espetxean zegoen idazteari ekin zionean, besteren artean maite zuen pertsonak hala nahi izan zuelako. Hari idatzi zion De Profundis gutun luze eta gogoangarria. “Biziaren Plazera eta Artearen Plazera ikasteko etorri zinen nigana” adierazi zion Wildek, erantzunik espero ez zuen gutunaren amaieran. “Menturaz, askoz zoragarriagoa den zerbait zuri irakasteko hautatua naiz. Minaren esanahia eta bere edertasuna”. 1895ean Queensberryko markesak salaketa jarri zuen Oscar Wilderen kontra haren semearekin jokabide inmorala izan zuela esanaz, eta horren ondorioz igaro behar izan zituen bi urte espetxean idazleak.