Luzien Etxezaharreta olerkari lapurtarra izango da ekainaren 2an Agoitzen ospatuko den Nafarroako II. Poesiaren Biltzarreko gonbidatu nagusia. Egunean zehar, poesia tailerrak eta olerki errezitaldiak egingo dituzte, besteak beste.
Josanton Artzek 1969an kaleratu zuen bere kabuz Isturitzetik Tolosan barru liburua. Lan berritzailea izan zen Artzerena. Poemetako asko bisualak ziren, irakurtzekoak ez ezik ikustekoak. Testu eta irudiez gain binilozko disko txikia kaleratu zuen, liburuko poema batzuen grabazioa jasotzen zuena. Orain, Isturitzetik Tolosan barru liburuaren berrargitalpena kaleratu dute Pamiela argitaletxeak eta Arteola elkarteak. Faksimil gisa kaleratu dute eta 1969ko grabazio hura CD formatuan jaso dute, Artzek sartu dituen beste hainbat poema errezitatu gehituta.
Carlos Ribera pintore surrealistaren obrak Donostiako Boulevard Kutxa aretoan daude ikusgai, Carlos Ribera, bere ekarpena arteari izenburupean. Ribera (Alzira,1906 – Donostia, 1976), Salvador Dalí, Federico García Lorca eta Luis Buñuelekin aritu zen orpoz-orpo. Zinegotzi izan zen Donostian.