Tabakoak ekarri dizkio, hein handi batean, emakumeari betidanik gizonezkoekin lotu izan diren gaitzak; biriketako minbizia edo gaixotasun kardiobaskularrak esaterako. Hala ere emakumeek gizonek baino gehiago erretzen dute gaur egun. Arrazoiak bat baino gehiago dira: batetik, goian aipatu arrisku horiek oso oharkabean pasatu dira orain arte, bestetik erretzeari uzteak pisua gehitzea dakarrela pentsatzen dugu, gainera, light zigarroek ez dutela hainbesterainoko kalterik egiten uste izan du jende askok. Hori dio bederen Maria Angeles Planchuelo doktoreak, Tabakismoan Adituak diren Espezialisten Elkarteko presidenteak. Bere ustez, “nerabezaroan, neska gazteek erretzen hasteko joera handia dute, batik bat beraien amak ere erretzen badu”. Gezurra badirudi ere, adin honetan lagun-taldeak eragin gutxiago du neska gazteengan adin bereko mutilengan baino; horregatik da gurasoen eragina hain garrantzitsua, amarena batez ere.

Erretzen jarraitzeko, ezinbesteko garrantzia du nikotinak pisua kontrolatzeko eta aldarte txarrak uxatzeko duen eraginak. Emakumeek –eta baita neska gazteek ere– gehiagotan erretzen dute adikziogatik gizonezkoek baino. Gizentzeko beldurra funtsezkoa da erretzen jarraitzeko, eta baita presio psikologikoen eta estresaren kontra tabakoak ematen duen lasaitasun edo baretasun sentsazioa ere.