Ikasleek lortu beharreko helburuak hauek izango dira: Lehen Hezkuntza amaitutakoan B1 maila –Hizkuntzak irakatsi eta ikasteko markoaren arabera–, Derrigorrezko Bigarren Hezkuntza amaitutakoan B2 eta atzerriko hizkuntzei dagokienez, DBH bukatutakoan B1 maila. Maila horiek lortu dituzten ala ez jakiteko azterketak egingo zaizkie EAEko ikasle guztiei. LH eta DBH amaitu baino lehen ere, tarteko diagnosiak egingo dituzte.
Ikastetxe bakoitza aske izango da eredua behar besteko ñabardurekin aplikatzeko. Dena dela, aurreikusia dago euskaraz irakasteko beharrari erantzuteko hizkuntza eskakizuna duten 882 irakasle beharko direla.
Hezkuntza sailburuak adierazi du sistema berria 2008-2009ko ikasturtean jarri nahiko lukeela abian, beti ere, Lehen Hezkuntzako lehenengo mailan, eta beraz, hamar urte beharko dira 16 urtera arteko maila guztietan ezartzeko.
Berria egunkarian egindako elkarrizketan, euskara irakats hizkuntza nagusia izateak zer esan nahi duen zehaztu du Campos sailburuak: “Hainbat gazterentzat eskola da euskararekin harremanetan egoteko aukera bakarra. Horrek esan nahi du eskolak ematen diola ikasle horri gizarteak ematen ez diona. Horrek esan nahi du euskaraz ikasi eta irakatsi behar direla ikasgai gehienak”. Eta Ezkerraldea jarri du adibidetzat: “Argi dago Ezkerraldean euskarak izan behar duela nagusi, nagusi baino nagusiago”.
Euskarak gizartean pisu gutxi duen zonaldeetan euskarak eskolan nagusi izan behar duela garbi du sailburuak; baina euskararen gutxienekoa non ezarriko da?: “Politikoek politikaz hitz egin behar dute eta teknikoek gai teknikoez. Nik aditu bati eskatuko diot, helburuak aintzat hartuta, esateko testuinguru, lurralde eta bailara bakoitzean nola jokatu beharko genukeen”.
Sistema berriaren proposamen aurkezpenean zehaztu ez zuen beste kontu bat: hizkuntza maila neurtzeko azterketak ez gaindituz gero zer gertatuko da?: “Nik momentuz planteatzen dudana da beste ikasgaiekin jokatuko litzatekeen moduan jokatzea”. Alegia, hizkuntzaren ikasgaia gainditu gabe gera litekeela.