Bertzalde, ez da batere gauza segurua zer eginen duen Alderdi Sozialistak. Hau da, ezin jakin behingoan bertze bide bat jorratzen hasiko den ala burua lehengo lepotik agertuko duen. Oro har, PSNk nafar eskuinaren zerbitzuan eman ditu azken 25 urteak eta era guztietako loturak dituzte agintean daudenekin. Gainera, hauteskunde zerrendetan hautetsi izateko moduan jarri dituzten hautagai gehienak nabarrismorik itxienaren bultzatzaile edo dotrina horretako fededun sutsu dira, eta baztertu egin dute Nafarroaz ikuspegi zabalagoa duen jendea.
 
Gauzak horrela, aldaketaren euskarri nagusia izan daitekeen taldeak, Nafarroa Baik, bere bidea egiten jarraitu beharko luke Alderdi Sozialistaren zain egon gabe. Ezkerreko koalizio abertzaleak, gainera, bere proiektua gorpuztu beharko luke, bere aldia izan daitekeelako. Alde horretatik, zenbat eta gorpuztuago egon, zenbat eta sendoago agertu, programa zenbat eta gehiago landu, gizarte-erakundeekin zenbat eta harreman handiagoak izan, hainbat eta hobe izanen da Nafarroan gauzak azalez eta mamiz bertzela egiten hasteari begira.
 
Beraz, Nafarroa Baik gaina hartu beharko lioke Fernando Purasen alderdiari. Eta horretarako, ez da aski izanen Nafarroa euskalduna dela erratearekin. Bertze era bateko boto-emaileak bildu beharko ditu; esaterako, urte sail luzean, arrazoi hau edo hura dela medio, abertzaletasunari bizkarra eman dioten jendeen botoa. Denok dakigu zer-nolako zaparrada jasan duen Nafarroak azken mende laurdenean Iruñea eta Madril aldeko agintari politiko, militar eta ekonomikoengandik, bai eta alderdi politiko, sindikatu eta komunikabide nagusietatik ere.
 
Denak gogotik saiatu dira, saiatu direnez, Nafarroa euskaltzaletasunetik urruntzen, eta hein batean, lortu dute. Datozen asteotan, indarberriturik azalduko dira, eta prest, beren irratsaio mehatxagarrietan iragartzen dutenez, Iruñera etorri eta Nafarroa salbatzeko. Ez dira ETAren beldur, haien boterea kolokan jar dezakeen indarraren beldur baizik, eta prestatzen ari dira aukera hori galarazteko. XX. mendea gogoan, badakigu nola jokatzen duten, aski eta sobra ezagunak baitira haien manera “demokratikoak” gauza txikienetan ere. Azkena izan da Iruñeko udal agintariek erakutsi duten itxikeria gizarteak German Rodriguez gaztearen omenez paratutako hilarriaren inguruko auzian. Kendu dute, eta kito. Beraz, orain, noraino iritsiko dira?