Bilboko Rekalde aretoan bi erakusketa izango dira ikusgai apirilaren 8a arte. Batetik, Iñaki Imaz EHUko Arte Ederretako Fakultateko irakasleak hainbat instalazio bildu ditu Lo Mío izenburupean. Aurki daitezkeen objektuek, artistari buruzko informazioa eskaintzeaz gain, nolabaiteko deserosotasun bati aurre egitera bultzatzen gaituzte. Alboko irudia, Txerria-basurdea sailekoa da. Bestalde, Alemanian jaio eta Berlinen bizi diren Dolores Zinny eta Juan Maidagan artistek Kosta, erasoa, berbera erakusketa paratu dute Rekalde aretoan. Europa eta Amerikako hainbat herrialdetan aski ezagunak diren bi artista horien instalazioetan margolanek, eskulturek, argazkiek, marrazkiek eta arkitekturak bat egiten dute. Erakusketaren harira, Zinny eta Maidaganek diseinatu eta Mónica Amor, Hyunjin Kim eta Leire Vergararen testuez hornitutako katalogoa aurkeztu dute.