Utikan Euskadi Sariak manifestua aurkeztu dute
- Joan den ostiralean hogeita hamar idazle inguruk izenpetutako Utikan Euskadi Sariak manifestua aurkeztu zuten Donostiako Boulevardeko kioskoan. Manifestu horren bidez sinatzaileek Euskadi Sarietan parte hartzeari uko egin diote.
Txillardegi, Josu Landa, Edorta Jimenez, Xabier Mendiguren Elizegi, Julen Gabiria, Iñigo Aranbarri, Koldo Izagirre, Lander Garro, Jon Alonso, Eider Rodriguez eta Markos Zapiain dira, batzuk aipatzearren, manifestuarekin bat egin dutenak. Gainera idazle eta itzultzaileek beren atxikipena adierazteko web gune bat jarri dute martxan, www.utikan.com helbidean.
Euskadi Sarietan beren lanak aurkezteari uko egin dioten idazleek hainbat arrazoi eman dituzte erabaki hori azaltzeko. Besteak beste “sarion helburua ez dela literatur kalitatearen gaineko ebazpen zintzoa ematea” uste dute dokumentua izenpetu dutenek. “Aginteari otzana zaion jardun intelektual eta literario bat sortzea” leporatu diote sinatzaileek sari horiei, horretarako “antolamendu instituzionaletan behin eta berriz ageri den literatur aditu multzoaz eta zenbait erakunde gremialen dependentziaz” baliatuz.
Horrekin batera, Jon Alonsok argiako Urtekarian salatutakoaren haritik, “zenbait teknikari, kritikari eta epai-mahaikok osatzen duten literatur sistema kudeatzen duen multzo horrek, irregulartasunak egin eta ontzat ematerainoko jokabidea erakutsi” izana txarretsi dute manifestua izenpetu dutenek.
Azken urteetan Euskadi Sariak behin baino gehiagotan izan dira polemika iturri. 2003an Koldo Izagirrek, itzulpengintza alorrean finalista zelarik, uko egin zion onespen agiria sinatzeari eta sarietatik kanpo geratu zen. Hurrengo urtean Xabier Montoia eta Jon Alonsok ere uko egin zioten onespen agiri bera sinatzeari, baina epaimahaiak beren obrak aintzat hartzea erabaki zuen. 2005ean berriz, Alonsok duela gutxi aldizkari honetan eskainitako elkarrizketan azaldu bezala, onespen agiria baztertzea erabaki zuten epaimahaikide eta instituzioek.
Manifestuaren aurkezpen bideoa ikusi.
Horrekin batera, Jon Alonsok argiako Urtekarian salatutakoaren haritik, “zenbait teknikari, kritikari eta epai-mahaikok osatzen duten literatur sistema kudeatzen duen multzo horrek, irregulartasunak egin eta ontzat ematerainoko jokabidea erakutsi” izana txarretsi dute manifestua izenpetu dutenek.
Azken urteetan Euskadi Sariak behin baino gehiagotan izan dira polemika iturri. 2003an Koldo Izagirrek, itzulpengintza alorrean finalista zelarik, uko egin zion onespen agiria sinatzeari eta sarietatik kanpo geratu zen. Hurrengo urtean Xabier Montoia eta Jon Alonsok ere uko egin zioten onespen agiri bera sinatzeari, baina epaimahaiak beren obrak aintzat hartzea erabaki zuen. 2005ean berriz, Alonsok duela gutxi aldizkari honetan eskainitako elkarrizketan azaldu bezala, onespen agiria baztertzea erabaki zuten epaimahaikide eta instituzioek.
Manifestuaren aurkezpen bideoa ikusi.