“Enteratu zaitez zer den Internet”, esan zion duela 10 urte Argiako zuzendariak teknologia berrietan aditua zen enpresako langileari. Esaldi hark Argiaren etorkizuna baldintzatu zuen. Hilabete gutxitan Internet zer zen eta zertarako balio zuen jakin eta aldizkariko edukiak sarean jarri zituzten.
Sareko Argiaren oinarria Argia astekaria izan da hasiera-hasieratik, nahiz eta gaur egun eduki desberdin ugari biltzen dituen atari bilakatu den. Lehendabizi 1963tik 1996ra bitarteko elkarrizketak jarri ziren Interneten eta 1999. urtetik aurrera astekari osoa. Orain arte, paperean argitaratutako edukiak jartzen ziren Interneten, gehienetan bestelako gehigarririk gabe. Otsailaren 23tik aurrera ordea, Interneteko Argia astekariak hainbat berrikuntza izango ditu.
Alde batetik, testu eta argazkiez gain, bideo, audio eta loturekin aberastuko dira artikulu, erreportaje eta elkarrizketak. Bestalde, astekariak web 2.0 deiturikoaren kontzeptuak bereganatu ditu eta ondorioz, parte hartzeko askoz ere aukera gehiago eskainiko ditu. Azkenik, artikuluak html bertsioan irakurtzeaz gain, pdf formatuan ere irakurri ahal izango dira eta atzeratutako edukien bilaketa erraztu egingo da.
Aldaketa horiek guztiak Argiako kazetariok bizi ditugun aldaketen ispilu baino ez dira. Hain zuzen ere, esparru multimediara salto egiten ari gara eta ildo horretan egiten dugun lana hein handi batean www.argia.eus/argia-astekaria gunean erakutsiko da.
Elementu multimediak
2006. urtean, bideokamera besapean hartuta Boliviara joan ziren Txomin Txueka argazkilaria eta Amets Arzallus kazetaria. Haiek biak handik ekarritako materiala www.argia.eus/bolivia kanalean bildu genuen. Bertan Ametsek idatzitako eguneroko batez gain, argazki galeria eta hamaika bideo osatu genituen, tartean Evo Moralesi egindako elkarrizketaren bideoa. Honela Argiak ikus-entzunezko mundura salto egin eta kazetaritza lantzeko beste molde bat ezagutu zuen.
Orain, Interneteko Argia astekari berrian, testu eta argazkiez gain, bideo eta audioak ere aurkituko ditu irakurleak zenbait erreportaje edota elkarrizketatan. Modu horretan informazioa osatu eta aberastuko da.
Web 2.0, parte-hartze handiagoa
Azkenaldian jende askok hitz egiten du web 2.0 kontzeptuaz. Batzuentzat oraindik arrotza izan daitekeen termino horrek parte-hartze handiagoa esan nahi du, baita hartzailearen aldetik elkarreragiteko aukera handiagoa ere.
Ildo horretatik Argia astekari berriak 2.0 filosofiako zenbait tresna bereganatu ditu. Besteak beste, artikuluei erantzun eta berauek lagun bati bidaltzeko aukerak izango ditu, baita irakurleak gustuko dituen edukiak Zabaldu (
www.zabaldu.com) web gunera bidaltzeko ere. Zabaldu Interneten aurkitutako albiste interesgarrienak zabaltzeko aukera ematen duen euskarazko gunea da. Internautek atsegin dituzten albisteak bozkatzen dituzte. Hala, irakurlea informazio hedatzaile bihurtzen da, parte-hartzaile aktiboa, hain zuzen ere.
Informazioa eskuratzeko bideak erraztu dira
Internetek edukiak hainbat modutara irakurri ahal izatea ahalbidetzen du eta Argia berria horren adibide izango da. Edukiak html edo pdf formatuetan irakurri ahal izango dira, atzeratutako edukiak zenbakiaren arabera sailkatuak egongo dira eta baita dagokion atalaren arabera ere. Adibidez, “Pertsonaia” atalean, azken asteko elkarrizketa eta aurreko zenbakietakoak aurkituko ditu irakurleak. Bestalde, ohiko bilaketa aurreratuaz gain, Argia astekariko egile eta elkarrizketatu guztien zerrenda ikusi eta irizpide horien arabera bilaketa egin ahal izango da.
Ezinbestekoa da bilaketak egiteko modua erraztea, Argiak gaur egun hemeroteka zabala baitu internauten eskura. Zeruko Argiako hainbat eduki ere aurki daitezke Sareko Argian. Zehazki 1963-1998 urte bitarteko elkarrizketak eta 1999. urtetik aurrera kaleratutako zenbakietako eduki guztiak daude on-line. Gainera, hilabete batzuk barru hemeroteka hori are eta oparoagoa bihurtuko da, 1919. urtetik aurrerako eduki guztiak jarriko baitira sarean.