Katalunian Presidenta. Gure Berriak honela kalifikatzen zuen Montilla jauna. Mikel Elortza zarauztarrak protestatzen zuen gure egunkari nazionalera bidali eskutitzean. Ez diot nik deus erantsiko berak idatzitakoari, aski argi adierazten baitzuen nik esan dezakedana. Baina gure etxera begiratuz gero, badugu zertaz kezkatu, nonbait normaltzat jotzen dugun egoerari erreparatuz Euskal Herriko probintzietako hiriburuetako auzapezetan bat bakarra ere ez baitugu euskalduna. Maule, Garazi, Baiona, Gasteiz, Iruñea, Bilbo, Donostia. Erdaldunak nagusi. Eta ez dut gure hedabide nazionaletan hori adieraziko lukeen titularrik gogoratzen, Montilla El Periódico, Avui eta El Temps irakurtzeko gauza den bitartean gure hauek ezin gaituztela jarraitu, ezin gaituztela ezagutu adierazten duen idazkirik ez dut gogoan. Dakidana zera da, udal itzultzaile zenbaitek dedikatzen diela denbora gureak erdaratzen, zer diogunak interesa baitu sobra ere, bereziki euren izenak tartean daudelarik. Erdaraz gaituzte ezagutzen guk arrotzak nola. Hala ere normaltzat dute kalifikatzen euren egoera, beren buruak euskalduntzeko beharra sentitzen ez dutenak. Eta hauteskunde joan-etorrietan ez dugu aldaketarako esperantzarik, guk ere, jada onartu baitugu gaitzerdikoa dugula egoera.