Egun erabiltzen ditugun kamerek milioika pixel edo argi-puntu lantzen dituzte une berean. Mikroprozesadore eta pieza elektroniko ugari dituzte, kostu handikoak askotan, eta hartzen duten informazioaren %1 baino ez dute aprobetxatzen.

Rice Unibertsitateko Kevin Kelly-k eta bere ekipoak argazkiak ateratzeko filosofia erabat aldatu dute emaitza onak lortuz. Ikerlariek siliziozko txipa, bakterio baten tamaina duten milaka ispiluz inguratu dute eta ikuspegi matematiko desberdin bat duen sisteman oinarritu dira.

Jakina da egungo kamerek megapixel bat edo gehiagoko bereizmena dutela, hau da, aldi berean milioi bat puntutik gorako informazioa jasotzen dutela. Kelly eta lagunen kamerak, ordea, aldi berean argi-puntu bat baino ez du hartzen, baina sekuentzia hau milioika aldiz errepika dezake oso denbora gutxian. Ikuspegi matematikoak denbora-tarte batean lortutako argi-puntu guztien informazioa bateratu egiten du eta ondorioz irudia eskaintzen du.

Sistema hastapenetan denez, argazki-kamera tramankulu bat da oraindik eta irudi estatikoak baino ez ditu ongi ateratzen, bost bat minutu behar baitu irudi geldo bat ateratzeko. Sistema berriak une honetan abantaila gehiegirik eskaintzen ez badu ere, epe ertainean iraultza ekar dezake argazkigintzara, sistema sinple bezain merkea izango delako.

Horretarako ikerketak aurrera jarraitzen du ondoko bi ildo hauetan; batetik argazki-kamera txikitzen edo trinkotzen eta bestetik pixelak kaptatzeko sekuentziak azkartzen.

Irailaren hasieran argitara eman genuen artikuluan ozono-zuloaren joera baikorra adierazi genuen. Orain, ozono-zuloa irauten duen epea igaro denean aurrikuspenak ez direla bete garbi adierazi dezakegu.

Abuztuan oso zulo txikia egin bazen ere, irailaren erdialdetik gaurdaino maximo historikoen inguruan ibili da, erantsitako grafikoan ikus daitekeenez. Azken urteetako joera baikorra zalantzan jarri da aurten eta ezin da ziurtatu gertaera isolatu bat izan den ala ez.

Beraz, eta zientzialarien esanetan, ezin da oraindik goardia jaitsi eta ekin beharra dago ozono-jaitsieran eragiten duten elementu poluitzaileak kontrolatuz.