Politikariak tarteko diren hirigintzako ustelkeria kasuak etengabe ari dira plazaratzen azken aldian, batik bat udal politikariak dabiltza tartean. Hirigintza planak udal bakoitzaren mende daude: hiri antolamendu orokorreko planak, arau subsidiarioak, birkalifikazioak eta abar. Eta horietan interes politikoek eta espekulatzaileek indar handia dute. Nahiz eta kasu argienak eta eskandalagarrienak Espainiar Estatuan izan diren, gaitz horrek Euskal Herria ere jo du. Hala, zenbait kasu susmagarri ezagutarazi dira. Lutxana-Barakaldon Fertiberia lurretako balizko kasua (Sefanitro zaharra). 1996an Sefanitrok lurrok erosi zituen 1,5 milioi eurotan; 1999an Udalak lurrok birkalifikatu zituen. Orain enpresa itxi ondoren, Iurbentia eraikuntza-enpresak lurrok erosi ditu 240 milioi eurotan, 2.000 etxebizitza eraikitzeko. Iurbentiak beste enpresa baten lur batzuk ere erosi nahi ditu: Befesa enpresarenak, 2007an itxiko baita. Eraikuntza-enpresa horretako kontseilarien artean Josu Olazaran EAJko burua dago. Bizkaiko kostaldeko hainbat urbanizazio polemiko ere ahotan ditugu; hala nola, Bakio -1.900 etxebizitza eraiki daitezke-, Getxo -landa eremuan 8.000 etxebizitza eraikitzeko plana bada- eta Sopela -txaletak eraikiko dituzte parke bat egin behar zen eremuan-. Udal horietan EAJren mende daude hirigintzako planak. Hirigintzako ustelkeria kasuak dira horiek? Susmoak badira. Horrelakoak saihesteko, dagokionak ikerketa eta gardentasuna ezarri beharko ditu.