Patxi Iturregi idazleak Beterriko Liburuan esanak: «Interneta dela eta, ez dut inolako etsairik ikusten. Kontrakoa, internetek liburuaren inguruko arreta zabaldu duela esango nuke. Euskaraz ere bada literatura lantzen duten hainbat blog. Bazirudien liburuak beste formatu batean -digitalizatuta- eskainiko zirela, baina badirudi liburua bezain aukera goxorik oraindik ez dutela topatu. Badaude literaturari aukera berriak zabaltzen dizkioten teknika berriak; hipertestua esaterako».

Elena Pimenta ilustratzailea elkarrizketatu zuen Garak: «Hori esan ohi da, beste baten (idazlearen) itzalean gabiltzala, gurea bigarren mailako artea dela, baina ez dut horrelakorik sentitzen. Egia da garai batean gure izena ez zela agertu ere egiten, baina aldatu dira gauzak. Ez dut sentitzen nire lanak idazlearenak baino gutxiago balio duenik».