Urte honetan zehar Hego Euskal Herriko enpresa gehienetan hauteskunde sindikalak izan dira. 2006ko ekainaren 30ean, ELA-STV sindikatua nagusi ageri zen 9.503 ordezkarirekin (%35, 94). Atzean gelditzen zitzaizkion CCOOren 5.509 ordezkariak (%20,84), UGTren 4.786ak (%18,10), LABen 4.006ak (%15,15), ESKren 433ak (%1,64) eta USOren 362 ordezkariak (%1,37). Garai hartan eta 2002ko hauteskundeei begira, sindikatu guztien ordezkaritzak gora egin zuen nabarmen, USOren kasuan izan ezik. Ekainera arteko gorakadarik nabarmenena CCOOk izan zuen (%13,91), nahiz eta LAB (%9,60), ELA (%8,97), UGT (%2,24) eta ESK (%1,87) sindikatuek ere gora egin zuten. Esan bezala, USOren ordezkaritza %5,56ra murriztu zen.

Hauteskunde horien atalik garrantzitsuena, ordea, irailean hasi eta 2007 urteko martxoan amaituko da. Tarte horretan erabaki beharko da nola banatzen diren hautatzeke dauden 14.144 ordezkariak, hau da, Hego Euskal Herriko ordezkaritza sindikalaren erdia baino gehiago. Hortaz, apirilera arte itxaron beharko dugu sindikatu bakoitzaren emaitzak jakiteko. Orduan jakingo dugu nork mantendu duen ordezkari kopurua, zeinek egin duen gora eta zeini murriztu zaion taldea. Era berean, aurreko hauteskundeetan baino parte-hartze handiagoa edo txikiagoa izan den jakingo dugu. Azken batean, Hego Euskal Herriko sindikalismoaren argazki orokorra lortuko dugu. Ipar Euskal Herriko hauteskundeak ez dira garai honetan izaten.

Hauteskundeen analisiak hainbat zalantza argituko ditu. Hona hemen zenbait galdera: hauteskundeok erakutsiko ote dute botoa ematen duten langileek sindikatuekiko interesa dutela? Egia ote da langileen desengainua gero eta handiagoa dela? Hauteskunde sindikaletan, nori ematen dizkiote boto gehiago langileek? Sindikatu borrokalari eta muturrekoenei? Sindikatu itunzaleei? Estatuaren aldeko sindikatuei ala abertzaleei? Testuinguru horretan: zein da sindikatu bakoitzak Arabako Mercedes Benzeko edo Caballitoko, Bizkaiko la Navaleko edo Nafarroako Wolkswageneko greba eta gatazka handietan izandako jarrera eta planteamenduek duten eragina hauteskunde sindikaletan?

ELA STV buru zuen erresistentzia-kutxaren funtzionamendu ezin hobeak hainbat greba luzetan, Caballitokoan besteak beste, eraginik izango ote du botoa sindikatu honi edo hari emateko orduan? Egia da ELA-STV izan dela orain arte seriotasunez eta eraginkortasunez antolatutako erresistentzia-kutxa bakarra izan duen sindikatua, baina gainerako sindikatuek adierazi dutenez, iaz ekin zioten kutxak eratzeari. Izango ote dute kutxarik honezkero? Caballitoko greba bezalako uneetan zin egiten diren gauzak ez dira beti betetzen.

Azkenik, Euskal Herrian abian den bake prozesu izeneko horretan askotariko jarrerak daude; sindikatu batzuek beste batzuek baino jarrera aktibo eta baikorragoa dute. Langileek, ordezkari sindikalei botoa ematerakoan, kontuan izango ote dute sindikatu bakoitzaren jarrera? Apirilean zalantza horiek eta beste batzuk argituko zaizkigu.