Koldo Izagirrek azken 30 urteetan idatzitako kantuak eta kantugaiak bildu ditu Teilatuko lizarra (Susa) liburuan. Besteak beste, Imanolek, Joseba Tapiak, Peio Serbiellek eta Bixente Martinezek kantatu izan dituzte Izagirreren hitzak.
Pablo Malo zinemagilea bigarren film luzea errodatzen ari da: La sombra de nadie. Datozen sei asteetan, besteak beste, Lekaroz, Oronoz, Iruñea eta Donostian egingo dituzte filmaketa lanak. Pirinioetako herrixka bateko ikastetxe pribatu batean lekututako suspentse filma da.
Pello Irazuk eskultura, marrazkiak eta argazkiak bildu ditu Iruñeko Moisés Pérez Albeniz galerian jarri duen Let it bleed erakusketan. Maiatzaren 13a arte izango da zabalik.
Angel Errok jaso du aurtengo Espainiako Kritikaren Saria Gorputzeko humoreak poema liburuari esker. Narratiba arloan, Harkaitz Canoren Neguko zirkua nabarmendu dute. Gaztelaniazko Kritikaren Saria, aldiz, Ramiro Pinillak jaso du Verdes valles, colinas rojas liburuagatik.
Pok eta Théâtre du Rivage antzerki taldeek Solisterrae ikuskizuna estreinatuko dute Hendaian hilaren 13an. Pascal Gaigneren musika du abiapuntu hitzik apenas duen lanak.
Su Ta Gar musika taldeak Jainko hilen uhartea diskoa plazaratu du. Estudioko zortzigarren diskoa taldeak propio sortutako Jo Ta Ke diskoetxearekin kaleratu du. Juanma Bajo Ulloak zuzendutako bideoklipa dakar diskoak.