Alain Lamassoure eurodiputatu eta Ipar Euskal Herriko Hautetsien Kontseiluko lehendakaria prest agertu da Frantziako hizkuntza gutxituak onartuko lituzkeen lege proposamenaren testua idazteko. Lamassourek Frantziako Konstituzioa aldatu beharrik gabe lortu nahi du lege proposamena onartzea. Horrez gain, bere helburua hizkuntza gutxituak aurten onartzea dela gaineratu du.

Azti-Begia elkarteak kudeatutako irrati berria, Info 7, urtarrilaren 27an hasiko da emititzen. Egun horretan aurkezpen saioa egingo dute eta hilaren 30ean hasiko dira programazio arruntarekin. Internetez hasiko dira emititzen eta bi hilabete barru satelitez. Dena dela, helburua FMz emititzea da. Gaztelania, frantsesa eta euskara erabiliko ditu Info 7 irratiak eta euskarak izango du toki gehien.

Japoniatik heldu zaigun denbora-pasak arrakasta handia lortu du eta egunkari eta aldizkarietako sudokuak gogotik egiten ari da jendea. Joan den urte amaieraz geroztik berriz, zenbaki-joko horietako mordoa daukagu sarean. www.magicsudoku.com-era sartuz gero, egunero sei sudoku dauzkagu eskura, zailtasun mailaren arabera antolatuta. Web gunea ingelesez, gaztelaniaz eta euskaraz dago. Sudokuez gain, jokoa ezagutzen ez dutenentzako azalpenak eta adibideak daude hiru hizkuntzetan.

Aurten Ondarroako Udalak Lore-jokoak antolatuko ditu Augustin Zubikarai idazlearen omenez. Bitarte horretan ordea, hainbat lehiaketa, ikerketa eta ikerketa-beketarako deialdia egin du. Hauexek dira antolatu dituenak: Konposizio lehiaketa; Ondarroa ikusgarria argazki lehiaketa; Arrantzaren arazoei buruzko ikerketa (iragana, oraina edo geroa); Augustin Zubikarai idazlearen biografia; Itsasoari buruzko poema-antologia; Emakumeen partaidetza gizarte aldaketetan; Emakumeen partaidetzari buruzko bideoa. Informazio gehiago Ondarroako Udalaren web gunean: www.ondarroa.net.

Euskal Herriko Ikastolen Konfederazioak V. Batzarra egingo du hilaren 21ean Donostian. Batzarreko gai nagusia euskal curriculuma izango da eta datozen hilabeteotan ere gai horri helduko dio. Bestalde, Udalbiltzak hilaren 28rako antolatu ditu euskal curriculumari buruzko jardunaldiak. Han jasoko dira herri eragileek euskal curriculumari egindako ekarpenak. Igor Arroyo, euskal curriculumeko kideak esan duenez, urte bukaerarako amaituko dute curriculuma.