Zer ekarri dio LABi Munduko Federazio Sindikaleko kide bilakatzeak?
Garrantzia handiko aitortza da gure erakundearentzat nazioarteko sindikalgintzan MFSko eskubide osoko kidea izatea. Aitortza horri esker, trukerako eta kolaboraziorako espazio gehiago izango dugu, bost kontinenteetako erakunde afiliatu eta lagunekin aritzeko. Bestalde, aurrerako urrats kualitatiboa ere bada, sindikalismo klasekoa eta nazionala, LAB sindikatuaren proiektua berezko izaera soziopolitikotik garatzen eta bultzatzen duena, balioberritzeari dagokionez. Sarritan, zaila izaten da baloratzen aitortza horren neurriko egitate bat nola konkretatzen den irudikatzea. Kontuan izan beharko litzateke urterik urte CCOO eta UGT sindikatu espainolak eta haien aliatuak -Europako Sindikatuen Konfederazioa (ESK) eta Sindikatu Libreen Nazioarteko Konfederazioa (SLNK)- nazioartean egiten ari diren lan zikina: orientazio politiko estatalista eta errepresiboetan oinarrituta, etengabe difamatzen eta itxuraldatzen dute LABen ekintza sindikaleko jarduna. Beraz, testuinguru hori dela kausa hartzen du balio nabarmena LAB MFSn afiliatzeak, zeren aitortu eta legitimatu egiten baitu gure erakundea, euskal langile-klasearen eskubide indibidualak eta kolektiboak defendatzeko beharrezko tresna gisa.
Zer eman diezaioke LABek MFSri eta zer jaso dezake LABek nazioarteko erakunde horretatik?
Apalkeriak alde batera utzita, iruditzen zait LABek MFSri ez ezik, asko eman diezaiokeela, oro har, nazioarteko sindikalgintza osoari. Dagoeneko denbora pixka bat bada LABen proiektua errealitate sindikal nazional gisa finkatu zela. Sindikatu horrekin eta Euskal Herriak errepresentatzen duenarekin inplikatuta eta konprometituta gauden gizon-emakumeok saihestezineko errefe- rentzia bihurtu gara globalizazio neoliberalaren eta euskal langileok klase eta nazio gisa pairatzen dugun opresio etengabearen kontrako borroketan. MFSri eta sindikalismo klasekoari eta progresistari, nazioarteko eremuan, beharrezko gerta dakizkieke norgehiagoketan metatu dugun esperientzia, bai injustizia sozialaren kontra eta libertateen alde egiten dugun ahalegina. MFSko afiliazioak espazioa zabaltzen digu trukerako eta kolabo- raziorako eta horrez gainera, legitimatu egiten du gure eredu sindikala, sindikalismo klaudikatzaile bereziki espainolaren xantaiaren eta lan zikinaren aurrean. Protagonismoari eta partizipazioari dagokionez, MFSren parte izateak estatus diplomatiko eta politiko polita ematen digu; besteak beste, Nazio Batuen (NBE) eta Lanaren Nazioarteko Erakundearen (LANE) barruan.
Noiztik ibili da LAB nazioarteko espazio sindikalaren bila?
Egia esan, LABek hasieratik izan du lanerako ildo bat nazioarteko eremuan. Nolanahi ere, esparru horretako dinamikak eta intentsitateak erakundearen eboluzioarekin eta erakundea sortuz joan den aukerekin izan dute ikuskizun beti. Horrez gainera, LAB sindikatua Euskal Herriaren askapen nazionalaren eta sozialaren aldeko borrokan konpro- metitutako erakundea izanda, ezker abertzalearekin baterako gure lanak protagonismo eta erreferentzialtasun handiagoa eskatzen digu, nazioarteko espazioko aliatu berrien aurrean. Dena dela, nazioarteko espazioa eta gure MFSko afiliazioa lotu nahi badira, esan behar dugu ezen, duela hamarkada bat baino gehiagotik aurrera, LABek behatzaile gisa parte hartu duela azken bi kongresuetan; hots, 1995eko Damaskokoan (Siria) eta 2000ko New Delhikoan (India). Era berean, munduko eta kontinenteetako beste foru sozial batzuetan eta nazioarteko seminarioetan ere parte hartzen dugu.
Zergatik MFSk LAB hartu du kidetzat eta ez, adibidez, Sindikatu Libreen Nazioarteko Konfederazioak edo Lanaren Mundu Konfederazioak? Saiatu al zarete nazioarteko bi erakunde horietan? Diferentzia ideologikoak ote dira giltzarri?
MFSk kidetzat hartu gaitu, jakina, federazioko arduradunekin eta sindikatu afiliatuekin harremanak izan eta gero, LABek eskabide formala egin ziolako. Erabakia hartzeko garaian, honako hauxe izan zen faktore garrantzizkoa: MFSk, globalizazio neoliberalaren kontrako borrokan eta eredu sozial alternatibo baten eskaera etengabean, ideologia eta orientazio batzuk proiektatzen ditu munduan langile-klasearentzat eta gu identifikatu egiten gara norabide horiekin. Beste bi erakundeei dagokienez, LABek ez du afiliatzeko inolako ahaleginik egin, nahiz eta inoiz edo behin, beren barruko sindikatuekin harremanen bat egokitu zaion. Egia da MFSrekiko harremana lehentasunezkoa eta bakarra izatearen giltzarri desberdintasun ideologikoak direla. Horrek berresten du nazioartean ospe txarreko mugimendu sindikalak bizi duen banaketa penagarria.
LAB MFSren Munduko XV. Kongresuan, Kuban
Abenduan "bataiatuko" dute LAB nazioarteko sindikatu bateko kide gisa Kubako kongresuan. Zer jarrera izango du kongresu horretan?
Diodan, lehenbizi, LAB "bataiatu" zutela jada eskubide osoko kide gisa IDC International Dockworkers Council erakundean eta orain ere hartzen duela parte mundu osoko portuko langile eta zamaketarien eskubideen defentsarako borroken dinamikan. Halaz guztiz, LAB MFSko XV. Kongresuan izateak esanahi berezia du gure erakundearentzat, zeren bukatu egiten baita "errodajeko fasea", behatzaile izaerako harremana. LABek, oraingo kongresuan, erakunde afiliatu gisa eta eskubide osoko kide moduan hartuko du parte eta ardura osoz eta ikuspegi irekiz erantzungo die langile-klasearen kezka nagusien inguruan planteatzen diren eztabaidei eta gogoetei. Jakina, munduko mugimendu sindikala biziberritzeko internazional horrek bete behar duen funtzioari ere erantzungo dio.
Zein gai landuko ditu Kubako kongresuak eta zer erantsi nahi du LABek?
Klaseko sindikalismoaren printzipioen baieztapena izango da abiapuntua. Kongresuak sakon aztertuko du egokitzapen internazionala, batasunerako eta ekintzarako tresna efektiboa baita hori langile-klasearen eta herrien benetako interesen defentsaren aldeko mugimendu sindikalaren borrokan, ordena internazional bidegabe eta zapaltzaileari aurre egiteko. LABek, sindikatu nazionala den neurrian, hiru alor hauetan metatutako esperientziaren berri emango du: globalizazio neoliberalaren kontrako borrokak, langileen eskubide indibidualen eta kolektiboen defentsa, eta kontraboterearen benetako tresna den sindikalismo konprometituaren balioa.
