Acería del Atlántico siderurgiako enpresa da ADA eta Baionatik (Lapurdi) gertu dago. Antzina, Marcial Ucín Euskal Taldearen jabetzakoa zen, baina, gerora, Aceraliak hartu zuen kontrolpean eta enpresa hori Usinor eta Arbed enpresekin fusionatu zenean, ADA ere Europako Arcelor multinazionalean integratua geratu zen. ADA 2004ko apirilaz geroztik, La Coruñako Añón talde siderurgiko galegoaren jabetzakoa da, zeinek 100 bat milioi euroan erosi baitzion Arcelorri. Marcial Ucinek Boucau-Tarnos eremuan instalatu zuen ADA, 1996ko urrian, eta horrela sortu zen berriro inguru horretako aktibitate siderurgikoa, hirurogeiko hamarkadaren bukaeran, Forges de l`Adour enpresa itxitakoan, bertan behera geratua zena. ADAk 160 lagunekin ekin zion jardunari, eta bi urteren buruan heldu zen 250 lagun izatera. 2004. urtean, 223 lagun zeuzkan plantillan. ADA enpresak labe elektrikoa eta isurketa jarraitua baliatzen ditu produkziorako, eta totxoa fabrikatzen du. Arcelor taldearen barruan, karbono-altzairuzko produktu luzeen sektorekoa zen. ADAren salmentak, 2004. urtean, 185 milioi eurora heldu ziren, eta 770.000 tona-totxo bidali zituen Europako hainbat herrialdetara eta Afrikako Iparraldera. Baionako portuan, altzairuzko totxoen milioi bat tonatik gorako trafikoa garatzen du eta portuko jardunaren %25 izatera iristen da.