Udazkenean, antzerkira
Dagoeneko hasita dauden Santurtziko eta Gasteizko antzerki jaialdiei beste hiru batuko zaizkie aurki. Urriaren 14tik 23ra, antzezlan mordoa ikusteko parada izango da Pasaiako eta Getxoko jaialdietan. Pasaiako XXIV. Umorezko Antzerki Jardunaldietan Nasdrovia Txekhov (Vaiven), En Grilletes (Sexpeare & Las Grotesques), Ildebrando Biribo o un soplo en el alma (El Gato Negro) ikusi ahal izango dira besteren artean. Getxoko XXIII. Antzerki Jardunaldietan hamahiru lan aurkeztuko dituzte: Carton Club (Markeliñe), Como agua para chocolate (Ados), Joxepi dendaria (Gorringo), Josetxu eta Ortzadarra (Antzezkizuna)... Urriaren 18tik 22ra Translatinoak Iberoamerikar Antzerkiaren Jaialdia egingo da Biarritzen eta Baionan. Hogeitabosgarrena. Kaukasiar kreazko borobilaren estreinaldia (Théâtre des Chimères eta Pok), Goya+Borges (Carnicería) eta Frágil (Teatro de los Andes) izango dira aukeran, besteak beste.
Denetariko musika jaialdiak
Folketik hasi eta loop eta brasildar batukadaraino, kontzertu ugari izango da egunotan. Urriaren 14an eta 15ean Galdames Folk IV. jaialdian Kukuma, eta Igelaren Trikimailua euskal taldeak, Eskoziako Mike McGoldrick, Valentziako L’Ham de Foc eta Irlandako Lunasa taldeen emanaldiekin gozatzeko aukera izango da. Egun horiexetan Bilbon ere izango da kontzertu interesgarririk Bilboloop jaialdiaren baitan. Besteak beste, bertako Split 77, Toulouseko Babamars eta Berlingo Electronicat ariko dira zuzenean. Urriaren 17tik 29ra, Goierriko Sustraiez Blai jaialdiak hartuko du lekukoa. Hitzaldiak, film emanaldiak, txotxongiloak, musika... denetarik izango da munduko kulturen bosgarren topaketa hauetan. Urriaren 22an talde ugarik parte hartuko dute Ormaiztegiko frontoian egingo den kontzertuan: Amparanoia, Kukuma, Javi P3z Orkestra, Ehunzango, Samar...
Txillida-Lekuk bost urte
Eduardo txillida eta bere obra munduratzeko asmoz sortu zen Txillida-Leku Hernanin. Bost urte bete dituenean, arduradunek orain arteko ibilbidearen azterketa egin dute. Esan dutenez, museoak galerak ditu irabaziak baino gehiago, baina sendotasuna eman diote hara bertaratu diren 470.000 bisitariek. Bisitari gehienak kanpotarrak dira eta, horrexegatik, inguruko herrietako jendea erakartzeko ahalegina egingo dute. Halaber, bestelako arteekin elkarlanean jarraitzeko asmoa agertu dute, Jazzaldiarekin edota Musika Hamabostaldiarekin, esaterako. Datorren urtean Txillidaren omenezko erakusketa antolatuko dute kanpoko artisten lanekin (Richard Serra, Anthony Caro) eta aurrerantzean ere bizirik dauden artista onenen lanak jarri nahi dituzte, erakundeen laguntza jasoko balute.
Euskadi sarietarako hautagaiak
Jakinarazi dituzte , jada, aurtengo Euskadi Literatura sarietako hautagaiak zein diren. Euskarazko literatura sariko hautagai guztiak eleberriak dira: Harkaitz Canoren Belarraren ahoa, Julen Gabiriaren Han goitik itsasoa ikusten da, Xabier Montoiaren Blackout eta Juanjo Olasagarreren Ezinezko maletak. José Fernández de la Sota, Raul Guerra Garrido, Ramiro Pinilla, José Ramón Recalde, Miguel Sánchez-Ostiz eta Pedro Ugarteren aurtengo lanak izan dira hautatuak Gaztelaniazko literatura sarirako. Haur eta gazte literatura saria Javi Cillerok, Arantxa Iturbek, Xabier Olasok, Kirmen Uribek edo Patxi Zubizarretak eskuratuko dute, eta itzulpengintzakoa Oscar Aranak, Josean Elosegik, Julen Gabiriak, Juan Kruz Igerabidek edo Karlos Zabalak. Sariok urrian erabakiko dira eta sari banaketa azaroaren 22an izango da.
Kultur arloko legeak Nafarroan
Nafarroako gobernuak ikasturte honetan, udaberrirako zehazki, onartu nahi ditu ondarearen, museoen eta artxiboen legeak. Kultur Ondarearen Legea parlamentarien ganberara heldu da. UPN eta CDNk aurkeztutako testuak Nafarroako kultur ondarearen garrantziaz dihardu: Ā«Kontserbatzea ez ezik, handitzea ere merezi duena, horrela Nafarroa bere kulturan finkatuta egonen baita Espainiako Estatuaren eta Europaren esparruan, haien zati baita naturaltasunezĀ». Gainerako alderdiek zuzenketak egin dizkiote testuari eta hurrengo pausoa Parlamentuan eztabaidatzea izango da. Udazkenean Museoen Legea aurkeztu nahi du Gobernuak eta Artxiboen eta Dokumentu Ondarearen Legea 2006an onartu nahi du.
Kafe antzoki bat Portugaleten
Horixe nahi dute Harribola elkartekoek, Portugaleten euskara herrian sustatzeko eta kultur mugimendua pizteko, baita Ezkerraldean euskal kulturaren erreferentziazko gune bat sortzeko ere. Herriko hainbat kultur elkarteren babesa jaso dute eta beste batzurekin harremanetan jarri dira proiektuaren inguruan informatzeko. Azoka zaharraren eraikinean jarri nahiko lukete kafe antzokia, baina horretarako Udalak urbanismo plana aldatu beharko luke. Kafe antzokiak kultura alternatiboari leiho bat eta kultur egitarau aberatsa eskaintzen lagunduko luke, Harribolakoen ustez.
Emakumeen kontrako indarkeriaz gogoeta artearen bidez
Maitasunezko kartzela. Emakumeen aurkako indarkeriari buruzko kontaketa kulturalak zikloa abiatu du Gasteizko Artium museoak. Reina Sofia zentroak antolatutako ziklo honen helburua emakumeen aurkako indarkeriaren arazora diziplina anitzetik hurbiltzea da. Eta horretarako, hitzaldiak, 24 film proiekzio eta Internetarako egindako 21 artelan erakutsiko dituzte urriaren 23a bitartean.