Prozesuaren egoera irudikatzen dute atentatuek
Azken lau asteetan elkarrizketa prozesu aldeanitza apurka nola egituratzen ari zen irudikatu da eta horrek bake prozesuaren usaina barreiatu du lau haizetara. ETAren atentatuok errealitatea non den erakutsi dute. Heriotzak eragin ditzakeen frontea itxita du azken bi urteetan, baina ez bestelakoak, batez ere iraultza zerga biltzea bultzatzen duena. Hor dagoela gogorarazi du erakunde armatuak une oso garrantzitsu batean, eta prozesua ez dagoela irudika litekeen bezain heldu, gutxienez ETAren aburuz. Estatuaren egoeraren eztabaidan PSOE eta PPren arteko apurketa irudikatu zen eta Zapaterok ongi eutsi zion PPren erasoari. ETArekiko elkarrizketaren beharraz PSOE egiten ari den kanpainak martxa ona darama, inkesten arabera, espainiarren gehiengoak onartzen du jada elkarrizketa hori. PP ezik, gainerako guztiak bat datoz garai berria bizitzen ari garela eta norabide berean jarraitu beharraz, baina gauden unean gaude eta ez nahiko genukeen horretan. Orain arte esandakoak egia badira, atentatuok etsigarri baino akuilu beharko lukete.
Torturatzaileak kondekoratzen jarraitzen da
Euskal Herrian urteetan ikusi da nola kondekoratzen zituzten torturatzaileak edota hauen arduradunak. Adolfo Scilingo argentinarrari, hango diktadura garaian eragindako 30 hildakoengatik 640 urteko espetxe zigorra ezarri dio Espainiako justiziak, baina Espainiako agintariek Marokoko armadako Hamidu Laânigri eta Hosni Bensliman jeneralei Isabel Katolikoaren Ordeneko Gurutze Handia eman zieten urtarrilean, Espainiako erregeak lurralde hartara egindako bisitan. Marokkon giza eskubideak eta erregimen demokratiko baten alde ari direnek, Espainiak Marokkori egiten dion aurpegi garbiketa gogor salatzen ari dira eta froga gisa aipatutakoa moduko adibideak jartzen ari dira.
Pepe Uruñuela, 18/98 eta Nafarroako Kanpaina
Duela hilabeteren batzuk Nafarroako kolektibo eta pertsona ugarik adierazi zioten beren elkartasuna 18/98 auzian dagoen Pepe Uruñuela abokatuari. Ika-mikarik ez zen falta izan adierazpen honen inguruan. ‘sinDominio.net‘-en egindako elkarrizketa luzean, Uruñuelak dio auziari modu bateratuan aurre ez heltzearen oinarrian epaiketa eta kanpainari aurre egiteko molde desberdina dagola: edo modu bateratuan edo Joxemi Zumalabe Fundaziotik autonomo. Elkarrizketan, Patxi Azparren, Mikel Zuloaga eta Sabino Ormazabalek ere 18/98 auziari buruzko beren ikusmoldea jorratzen dute.
EHAK hauteskunde kanpainako dirua legezko egiten ari da
EAEko hauteskunde kanpainan diru eskaera egin zuen EHAK-k. Bankuz egin zitzaizkion hainbat diru sarrera, baina horietako batzuk legeak ez ditu onartzen anonimoak direlako. Orain, ezker abertzaleko alderdia deialdia egiten ari zaie diru emaileei, sarrera horien banku agiriak izanez gero bankura joan eta sarrerari izen abizenak jartzeko eskatuz. Bere bederatzi eserlekuekin, EHAK giltzarri bihurtu da Eusko Legebiltzarrean eta alderdi konstituzionalista eta Jaurlaritzako hirukoaren arteko mugimenduak baldintzatuko ditu legealdian zehar.