Geroz eta gehiago jotzen dugu Internetera, informazio bila. Tresna garrantzitsu bilakatu zaigu amarauna. XX. mendeko Euskal Herriaz gehiago jakiteko, tresna garrantzitsua da Antso Jakituna fundazioak eta Koldo Mitxelena kulturuneak sortutako Kulturaldi proiektua (http://www4.gipuzkoa.net/corporac/cul/kulturaldi/index.asp). Erakundeok 1880 eta 1999 urteen artean argitaratutako hamasei euskal aldizkaritan »Euskal Esnalea, Euskal Erria, Fontes Linguae Vasconum, Gure herria...» agertutako artikuluak jasotzen dituen datu basea paratu dute Interneten. 30.000 artikulutik gora jaso dituzte. Bi erakundeen arteko akordioaren fruitu da datu basea eta gehiago izango dela jakinarazi dute.

Euskarazko narratiba zertan den aztertu asmoz, Euskal Kontagintza Gaur. Bost Begirada hitzaldi zikloa antolatu du Eusko Ikaskuntzak. Hiru hilabetez, bost euskal idazlek hitzaldiak eskainiko dituzteko Gasteizko Filosofia, Geografia eta Historia fakultatean. Otsailaren 16an Iratxe Retolazak euskal eleberria eta XX. mendea izango du hizpide. Martxoaren 16an Anjel Lertxundik poetikaz jardungo du. Elkarrizketa nobelari buruz hitzaldia emango du Lourdes Oñederrak apirilaren 20an. Harkaitz Canok Belarraren bisturi zorrotza lelopeko mintzaldia eskainiko du maiatzaren 4an. Amaitzeko, Iban Zaldua Literatura itzala da saioko hizlaria maiatzaren 11n izango da. Hitzaldi guztiak goizeko 10:30ean izango dira eta parte hartzea libre da.

pasa den larunbatean abiatu zen Arabako Bertsolari Txapelketa. hogeita hiru bertsolari ariko dira lehian guztira. Aurreko larunbateko eta datorreneko kanporaketetan hemezortzi bertsolarik hartuko dute parte eta horietatik zazpi sailkatuko dira finalaurrekoetarako. Zazpi horiei, iaz finalean aritutako bost bertsolari »Asier Otamendi, Manex Agirre, Iñaki Viñaspre, Oihane Perea eta Juan Mari Juaristi» izango dira martxoaren 12ko (Amurrio) eta 19ko (Legutiano) finalaurrekoetan. Finala apirilaren 9an jokatuko da Gasteizen. Aurten txapelaz gain, Euskal Herriko Bertsolari Txapelketa Nagusian parte hartzeko aukera egongo da jokoan. Bertsozale Elkarteak jakinarazi duenez, urrian hasi eta abenduaren 18an jokatuko da Txapelketa Nagusia eta finala BECeko Bizkaia Arenan izango da. Lehiaketa erdal komunitateari hurbiltze aldera, egingo da finala Barakaldon.

Makina bat lan egin du Gasteizko Amárica plataformak artearen inguruan. Oraingoan, Gasteizko Udalak artelanak kalean jartzeko aurreikusi duen dirutzak (4,5 milioi euro) kezkatuta eta bertako artistentzako beka ezak larrituta, Arabako kultur politikaren gaineko lan mahaiak antolatu nahi ditu martxorako. Arabako Foru Aldundiko, Gasteizko Udaleko, aurrezki kutxetako eta EHUko kideak gonbidatu nahi ditu. Haiek onartuz gero, martxoaren 10ean hasiko dira eta astean behin bilduko dira, arte plastikoez jarduteko.

lehen trikiti diskotzat jo genuen 1926-27 inguruan Serafin eta Antonia Arantzetak grabatutako Jota vasca ARGIAko 1979 zenbakian. Hori da gordetzen den zaharrena, baina Euskal Herriko Trikitixa Elkarteak jakin berri duenez, 1924an plazaratutako Trikitrixa de Guipuzcoa eta Trikitrixa de Zumarraga dira grabazio zaharrenak. Eresbil artxiboan jaso dute Elkartekoek disko horien berri. Bi diskoak musikari berek, Joxe Oria pandero jotzaileak eta Etxesa-Korta soinu jotzaileak, grabatu zituztela uste dute Elkartekoek eta Oriaren oinordekoek. Bi diskoak Columbia etxeak euskal errepertorioa plazaratzeko sortutako Regal azpizigiluarekin grabatu zituzten.

Komunikabideetan kultur alorreko berri gutxi izaten dela iritzita, www.eremulauak.com webgunea jarria dute abian EHUko Kazetaritza fakultateko zenbait ikaslek. Sei atal ditu guneak: Berriak, ikus-entzun, musika, literatura, artea, agenda, lekuak eta foroa. Gunearen gainean iritzia emateko edota bertan kolaboratzeko asmorik izanez gero, idatzi mezu bat eremulauak@eremulauak.com posta helbidera.

dinekoen ondarea lelopean, tradizio orala berreskuratze aldera literatur lehiaketa antolatu du bizitzako eremu guztietan adinduen parte-hartzea sustatzeko lan egiten duen Hartu-emanak gobernuz kanpoko erakundeak. Zaharrek eta haurrek parte hartu ahal izango dute, euskarazko nahiz gaztelaniazko idazlanak bidaliz. Idazlanek ahozko tradizioko ipuinak jaso beharko dituzte.

Kaleko arteak sustatzea eta artista gazteak promozionatzen laguntzea du xede Leioako Umore Azokak »maiatzaren 26tik 29ra izango da aurten» antolatu duen Off lehiaketak. 30 urtetik beherako artistek nahiz taldeek eman ahal izango dute izena, martxoaren 21a baino lehen. Irabazleek Leioan, Araian, Bilbon, Palentzian nahiz Castellon kalean aritzeko aukera izango dute.