Bere garaian Enrique Rodriguez Galindo generala izan zena kontuan hartuta, aitortu behar da ez zela erraza pentsatzea zigortua izan zitekeenik. Berdin Jose Barrionuevo eta Rafael Vera Barne Ministerioko agintari ohiekin. Epaitu zituzten eta zuzenbide estatuaren garaipen gisa haizatu ziren zigorrak. Estatua, PSOE eta Felipe Gonzalez errugabe utzi izanaz asko hitz egin baliteke ere, Espainiako demokrazia gazteak sendotzen jarraitzen zuela hedatu zen. Orduko zigorrek ezusteko puntua utzi bazuten ere, Estatu aparatuetatik laster pentsatu zen, ohi bezala, bilatuko zutela bere zerbitzarien gurutzebidea arintzeko modurik. Eskandalua piztu du Rodriguez Galindorenak, baina harridurarik ez. Espainiako demokrazia gaztea bere heldutasunerantz nola abiatzen den ikusteko adibide bat gehiago.

Datozen udaberriko EAEko hauteskunde autonomikoetan Batasunari ez zaiola parte hartzen utziko uste du Batasuneko Mahai Nazionaleko kide Joseba Permachek. Berria egunkariko elkarrizketa batean esan berri du hori, gaineratuz, hori bai, geratzen diren hilabeteetan hori saihestuko lukeen gertakariak ere izan daitezkeela. Giro politiko zabaletan nahiko sustraiturik dago ETAren su-eten batekin bakarrik altxatuko lukeela PSOEk ilegalizazioaren langa. Badira, dena den, su-etenarekin ere ez litzatekeela ilegalizaziorik altxatuko pentsatzen dutenak.

Donostian joan den larunbatean Elkarrik egin zuen manifestazioan alderdi politiko nagusi guztietako ordezkariak izan ziren, PP eta Batasunakoak izan ezik. Elkarriren beste deialdi batzuetan ez bezala, PSOEko buruzagitzako pertsona oso esanguratsuak egon izana ere deigarri egin zen: esate batera, Patxi Lopez PSE-EEko lehendakarigaia bera ere hantxe zen. Duela bi urte egindako bake konferentzian Elkarrik hainbat sentsibilitate politiko ordezkatzen zituzten pertsonak bildu zituen, baina ez zen akordiorik gauzatu. Oraingo saioan, aldiz, alderdi guztietako ordezkariak bildu nahi ditu. Aurten bertan, guztien ordezkaritza biltzea lortu ez badu ere, guztien zeharkako partehartzea erdietsi izan du dagoeneko; oraingoz zuzenean parte hartzekotan ez direnak, hala ere, prest agertu dira izan daitekeen elkarrizketa politikoari begira informazioa jaso, aztertu eta zeharka partehartzeko.

Espainia eta Euskal Herriko klase politikoaren gehiengoa pozarren agertu da ETAren aurka egin berri den polizi operazio erraldoian. Atxiloketa hauekin ETA zuzendaritza gabe utzi omen da hamaikagarrenez, eta bere zuzendaritzaren aurka 1992an Bidarten egindako operazioaz geroztik, erakunde armatuaren aurka egindako garrantzitsuena gisa jo da joan den asteburukoa, nagusiki Biarnoko Saliesen Mikel Albizu ‘Antza’ eta Soledad Iparragirre ETAko buruzagi omen direnak atxilotu dituztelako (goiko argazkian agertzen den etxean). Ez dago zalantzarik azken hiruzpalau urteetan Espainia eta, batez ere, Frantziako segurtasun indarrek etengabeko danbatekoak eman dizkiotela ETAri eta horrek bere jarduera baldintzatzen duela. Baina behin eta berriz ETAk bere egiturak berregiteko ahalmena erakutsi du. Halako operazioen arriskurik handiena zera da, pentsatzea eta hedatzea euskal gizartean bizi den gatazka ETA polizi jarduerarekin itota bukatu litekeela.

Urriaren 4ko goizaldean hil zen Martin Ugalde idazlea, kazetaria eta euskaltzalea. 83 urteko andoaindarra 1921ean jaio zen eta Venezuelan igaro zituen urte asko. 1947 eta 1969 urteen artean kazetari lan asko egin zuen atzerrian, eta besteren artean, Euzko Gaztedi eta Euzkadi aldizkarietako zuzendaria izan zen. Deia egunkarian aritu zen lanean eta Euskaldunon Egunkariako sortzaileetakoa izen zen. Politikagintzan aritu zen 70eko hamarkadan eta 1993an ohorezko euskaltzain izendatu zuten.

Nafarroako Parlamentuan hizkuntza politika aztertzeko ponentziek jarraitzen dute, eta irailaren 29koan, Europako Hizkuntza Gutxituen Bulegoko (EBLULeko) Euskal Herriko ordezkariak, Mikel Etxebarriak eta Euskara Kultur Elkargoko Julen Urbiolak eta Jose Luis Mendozak hitz egin zuten. Mikel Etxebarriak EBLULen izenean, euskararen normalizazioaz arduratuko den erakundea sortzea proposatu zuen. Euskara Kultur Elkargoak berriz, Nafarroako hizkuntz eremuen banaketa berriro aztertzea proposatu zuen.
Urriaren 13an UGT, CCOO, ELA, LAB eta EILAS sindikatuak izango dira hizlari eta urriaren 20an, NUPeko errektorea eta unibertsitate horretako ikasle taldeen ordezkariak.

Arraunlariak loaldian sartuak dira, lehiaketari dagokionez behinik behin. Hala ere, tostako arraunaren inguruan dabilenak ez du atsedenik negu honetan. UZEIk Kutxaren laguntzarekin Tostako Arraunketaren Oinarrizko Lexikoa liburuxka argitaratu du. 100 kontzeptu biltzen ditu euskaraz eta gaztelaniaz. Milaka ale banatu ziren Kontxako estropadetan, baina han liburuxka eskuratu ez zuenak helbide honetan aurkituko du euskarazko termino sorta hori: www.uzei.com/berba.

Donibane Lohizuneko sardina erretegian zortzi bertsolari (Ainhoa Agirre, Aitor Mendiluze, Amets Arzallus, Andoni Egaña, Angel Mari Peñagarikano, Jexux Mari Irazu, Sustrai Colina eta Xebastian Lizaso), Asisko Urmeneta eta Kike Amonarriz elkartuko dira Demoei elkartasuna adierazteko. Urriaren 8ko afarian elkartasuna adierazteaz gain, dirua bildu nahi dute Demoek isuna ordaintzeko.
Dena den, Demoak azken ekintzagatik isunik gabe geratu dira. Urriaren 2an Baionako tren geltokiko harrerako iragarkiak euskaraz jarri zituzten, baina poliziarik ez zen agertu.