Urte osoan zabalpen eta zirkuitu eskasa izaten du jazzak, baina uda iristearekin batera musika estilo honen zaleek izaten dute non gozatua. Besteak beste, aurtengoan Bobby McFerrin, Dave Holland, Spirit of Life Ensemble, Carlinhos Brown eta Paco De Lucia izango dira gure eszenatokietan. Ekainaren 30etik uztailaren 4ra, Getxoko Europar Jazzaldiak hartuko ditu Getxoko plazak. Uztailaren 11tik 17ra, Gasteizko Jazzaldiak hartuko du lekukoa. Baionako Jazz Jaialdiak uztailaren 15etik 18ra blaituko du hiria jazzarekin. 25etik 28ra bitartean Donostiako Jazzaldiaren txanda izango da. Zarautzen, aldiz, Nazioarteko V. Jazz Mintegia egingo dute uztailaren 26tik 31ra bitartean. Goiz eta arratsaldez ikastaroak izango dira eta iluntze eta gau partean, kontzertuak.

32 erraldoi eta 42 buruhandi bildu ziren pasa den igandean Tolosan burutu zen Erraldoien I. Bilkuran. Hondarribiako, Irungo, Iruñeko, Lakuntzako, Kataluniako Solsona herriko eta Tolosako konpartsetako ordezkariek ekarritako pertsonaiak ikus ahal izan ziren herriko kaleetan. Guztia erraldoi eta buruhandiek historian izan duten garrantzia berresteko eta pertsonaia horiei omenaldia egiteko. Etorkizunean, nazioarteko ordezkariak ere biltzeko asmoa azaldu dute antolatzaileek.

1.100 euskal poema eta horietako batzuen itzulpenak biltzen dituen Basquepoetry.net (Euskal Poesiaren Ataria) sareratu du Susa argitaletxeak. Koldo Izagirrek egin ditu egitasmoaren literatura zuzendari lanak eta bera arduratu da poemak hautatzeaz eta itzultzaileen lanak koordinatzeaz. 200 euskal poeten 1.100 poemetatik 100 baten itzulpenak (alemanezkoak, ingelesezkoak, katalanezkoak, gaztelaniazkoak eta frantsesezkoak) egin dituzte oraino. Baina itzulpen gehiago sareratzeko asmoa dute. Gainera, baliteke aurrerantzean beste hizkuntza batzuetara itzultzea poemok; japonierara edo errusierara, kasu.

Donostiako Udalak, Eusko Jaurlaritzak eta Gipuzkoako Foru Aldundiak, eta beraz CICC Kultura Garaikidearen Nazioarteko Gunearen gauzapena gertuago dago jada. Ordoñez Falcon Argazkigintzako Nazioarteko Zentroa hartuko duela dago konfirmatuta bakarrik, baina Euskal Filmategia ere hartuko duela ia ziurra da.

60ko hamarkadan euskal artea berritu zuten 8 artisten »Amable Arias, Ruiz Balerdi, Basterretxea, Chillida, Mendiburu, Oteiza, Sistiaga eta Zumeta» 100 lan inguru bildu dituzte Gasteizko Vital Kutxa Fundazioaren aretoan, Constelación Gaur. Euskal Arteari buruzko trikimailu abangoardista bat izenpean. Uztailaren 4ra arte egongo da zabalik.

Uztailaren 7tik 11ra, antzerkia ikusteko beta izango da Donostian. Guztira, Mexikoko, Kolonbiako, Venezuelako, Italiako, Britainia Handiko, Espainiako Estatuko eta Euskal Herriko taldeen 30 lan ikusi ahal izango dira, Donostiako areto eta kaleetan. Aurten ez da euskarazko antzezlanik izango.

Jaiak herriaren ospakizunak dira, gozamenerako egunak eta herritarrek herritarrentzat egin dituzte urte luzez. Azkenaldian, ordea, gauzak aldatzen ari dira eta geroz eta zailtasun gehiago dituzte herritarrek jaien antolaketan parte hartzeko, arrazoi politikoak direla medio edota jaiak negozio amu direlako. Hori irauli nahian, Jai eta Herri Kulturaren Manifestua plazaratu dute hainbat herri eta kultur eragilek. Dagoeneko 400 elkartek eta 1.000tik gora norbanakok adierazi diote atxikimendua. Joan den larunbatean, ekainak 19 (astekari hau itxi ostean), JAIki 04 jaia egin zuten Bilbon, herri jaiak eta kultura aldarrikatzeko. Herri bazkaria, kontzertuak, antzezlanak. jokoak... denetarik izan zen herritarrak herriaren parte izan zitezen. Jaiak herritarrenak baitira. Norenak, bada, bestela?