Hezkuntzan zalantzak nagusi

  • Boterera iritsi eta hezkuntzan eskua sartzen hastea elkarrekin datoz; gobernu guztien altxor preziatua da haur eta gazteen heziketa kontrolpean izatea. Orain ere, Euskal Eskola Publikoaren jaia ospatzear dagoela, hezkuntzak une arraroak bizi ditu. Hego Euskal Herriko ikastetxeetan eragina duen Irakaskuntzaren Kalitate Legea (LOCE) PPk martxan jarri zuen aurreko legealdian adostasuna bilatu gabe, gainontzeko alderdi, sindikatu eta hezkuntza munduko erakunde gehienen iritziaren aurka. PSOEren gobernuak, ordea, legearen aginduak aplikatzeko egutegia luzatuko duela iragarri du eta hezkuntza arloko eragileekin eztabaida hasi berri du LOCEn egin beharreko aldaketak erabakitzeko. Hala, urrian lege proiektu berria aurkezteko asmoa dauka Espainiako gobernuak eta inork ez du oso argi zein izango den finkatuko den arautegia.

2021eko uztailaren 19an

LOCE polemikoaren egutegia luzatuta, legearen hainbat puntu indargabetuta geratuko dira datorren ikasturtean. Hemendik aurrera erlijioa ez da derrigorrezko ikasgaia izango, hautazkoa baizik; haur hezkuntza hezigarria izango da eta ez soilik asistentziazkoa; Derrigorrezko Bigarren Hezkuntzako hirugarren mailako ikasleek ez dute ikasketa ildoa hain goiz aukeratu beharrik izango eta batxilergoa bukatu ondorengo azterketa ere bertan behera utziko dute. Hezkuntza munduan ondo hartu dituzte erabakiok. Baikara ikasle eta gurasoen Federazioa ere ados dago aldaketekin, baina haratago doa eta erlijioak hezkuntza publikoan lekurik ez duela deritzo. «Derrigorrezkoa ez, baina borondatezkoa ere ez du izan behar; erlijioa ikasi nahi duenak eskolaz kanpo egin beharko luke», gaineratu du Baikarako presidente Imanol Zubizarretak.

Legearen beste hainbat puntu indarrean jarri dira dagoeneko eta, beraz, mantendu egingo dira oraingoz: hala nola, DBHn bi ikasgai baino gehiago ez gaindituz gero kurtsoa errepikatu beharra eta ikasturte bukaerako ez ohiko frogak. Baikaratik uste dute frogak ez liratekeela egin beharko, ebaluazio jarraitua baitago, bere azterketekin. Kurtsoa errepikatzeari dagokionez, 14-16 urteko zikloa osotasunean hartu behar dela pentsatzen dute; hau da, ez litzatekeela lehenengo urtean errepikatu beharko, bigarren ikasturtean lehenengoko ikasgaiak berreskuratu daitezkeela ikusten bada. Azken finean, malgutasuna eskatzen dute, hiru «gutxiegi»rekin automatikoki ikasleari ez errepikarazteko.

Senatuaren hanka sartzea

Baina PSOEren aldaketa horiek guztiak onartzeko prozesuak lehenengo oztopoa izan du jada. Espero ez zen bezala, LOCEren egutegia luzatzearen aurka PPk senatuan aurkeztutako mozioa popularrek irabazi zuten duela bi aste. PPk 123 aulki ditu senatuan eta gainontzekoek (denak LOCE legearen aurkakoak) 128. Hala ere, senatari asko berriak zirela-eta, horietako zenbait nahastu egin ziren bozkatzeko garaian eta azkenean PPren mozioak aldeko 119 boto eta kontrako 115 eskuratu zituen. PPren garaipena, dena den, sinbolikoa da gehienbat, senatuko mozioek ez dutelako lege izaerarik eta PSOEk bi ganberetan eztabaida guneak irekiko dituelako hutsegitea konpontzeko. Gainera, maiatzaren 28an egingo den Ministro Kontseiluan LOCEren egutegia geldiaraziko duen dekretua onartuko duela iragarri du Espainiako gobernuak.

PSOEk eztabaida hasi du gainontzeko alderdi eta erkidegoekin, eta EAEko Hezkuntza Sailak gauza bakarra eskatzen du: Madriletik ezarriko duten oinarrizko arautegiak orain arte egindako lana garatzen utz dezala. Hala, sailetik azpimarratu dute ez diotela Madrili begiratzen, iparra Europako lehentasunak eta sistema propioa hobetzea dutela. Europak 2010. urterako jarri dituen helburu nagusiekin bat egiten dute: kalitate oneko hezkuntza, hezkuntza sistema irekia eta etengabeko irakaskuntza. Helburuei begira, «gero eta indar handiagoa egin behar dugu irakasleriak prestatzen, ikastetxeen autonomian eta nazioarteko ebaluazio planetan», adierazi dute Hezkuntza Sailetik. Besteak beste, 3-6 urte bitarteko irakaskuntza doakoa egiteko asmoa du Espainiako gobernuak, baina Jaurlaritzak hitzartua du aspalditik adin hori, eta Espainian bigarren hizkuntza sartzeko aukera kontuan hartzen ari diren honetan, euskal hezkuntza eleanitza dela gogorarazten dute Jaurlaritzatik: «Euskara, gaztelera eta hirugarren hizkuntza bezala ingelesa dauzkagu».

EAEn hezkuntza sistema integratzailea eta propioa bilatzen dutela diote, LOCEri hainbeste alditan leporatu zaizkion segregazionismo eta zentralismoaren aldean. Baikarako Imanol Zubizarretarentzat, popularrek ateratako legea ez da eredu ona: «Ahaleginaren legera itzuli gara, garrantzia soilik notek eta azterketek duten sistemara». PSOEk duela bi legealdi onartutako LOGSE, planteamendu orokor bezala ondo zegoela uste du, «jarrera bezalako beste ezaugarri batzuk ere kontuan hartzen zituen», baina PPk aplikatu duelako ez dela ondo atera dio.

Eskola Kontseiluaren papera

Buruhauste honen guztiaren barnean, Baikara Federazioak ez du etorkizuna argi ikusten; ziurgabetasuna eta zalantza nagusitzen dira ikastetxe eta argitaletxeetan. Espainiako gobernuaren asmoak ez direla urrira arte guztiz jakingo azaldu du Baikarako presidenteak eta beraz, oso kezkatuta dabiltzala Eskola Kontseiluak jokatuko duen rolarekin, LOCEk indar handia ematen baitio zuzendariari eta Kontseilua ahuldu egiten baitu. Esaterako, espedienteak Eskola Kontseiluaren ardura ziren lehen eta orain zuzendariaren egitekoa dira, eta urteko plana onartzeko Kontseiluaren oniritzia baino ez da eskatzen. «Gurasoek Kontseiluaren bidez parte hartzen dute batez ere eta parte hartzeak erabakiak hartzeko eskubidea dugula esan nahi du, ez bakarrik oniritziak ematekoa», kexatu da Zubizarreta.

Hain zuzen ere, ikastetxeko zuzendaria hautatzeko sistema ere desberdina da popularren legearekin, LOGSErekin Eskola Kontseiluak aukeratzen baitzuen eta orain, berriz, administrazio eta eskolako ordezkariek osatutako batzordeak. Dirudienez, ekainean EAEn 130 ikastetxetako zuzendariak aukeratuko dira eta hor dakusa Zubizarretak arazoa: «Ez dakigu oraindik zein sistemaren bidez hautatuko diren, ez eta azkenean ekainean egingo dugun ere». Hala ere, Jaurlaritzak egingo duen araudi propioaren baitan, zuzendaritza aukeratzeko dekretu berri bat ateratzeko asmoa du. Indarrean dagoen legediak uzten dituen aukera guztiak erabiliz, protagonismoa Eskola Kontseiluari itzuli nahi dio aipatu dekretuak. Euskal Irakasleok Sarean elkarteak ere Kontseilua berrindartzeko beharra jakinarazi dio Hezkuntza Sailari eta urtetik urtera zuzendari izateko geroz eta hautagai gutxiago aurkezten direla-eta, neurri berriak bultzatzeko eskatu dio.

Asmoak asmo, gobernura iristen diren alderdiek hezkuntza alorrean lege berriak ateratzeko duten joera nabaria da. Ahalik eta adostasun handiena bilatuz, arlo honek egonkortasuna eta boterearekiko nolabaiteko independentzia lortu behar duela dio gehiengoak, baina errealitatean ez da hori islatzen. Oraingoz, itxaron egin beharko dugu 2005ean Espainiako gobernuak onartu nahi duen lege berriak Hego Euskal Herriko ikastetxeetan izango duen eragina ikusteko.

Eskola txikiak bizirik
Eskola txikiak bizirik, herri txikiak bizirik. Hori izango da ekainaren 13an Aizarnazabalen ospatuko duten jaian Gipuzkoako eskola txikiek aldarrikatuko duten lema. Ikastetxe txikietako errealitatea ezagutzera eman nahi dute antolatzaileek, eskola handietan baino baliabide gutxiago izan arren, proiektu eta xede ugari dituztelako. Bide batez, eskolen arteko harremanak sakontzeko eta haurrek ikasturtean zehar burututako lanak erakusteko aukera izango dute. Pailazoak, puzgarriak, 400 lagunentzako bazkaria... Dena prest da jadanik txikienen festa handirako.

Euskal Eskola Publikoa, mugak gaindituz
Bilboko Zorrotzaurre auzoan ospatuko du aurten Euskal Eskola Publikoak bere jaia, ekainaren 6an. XIII. edizio honetan, EHIGE Guraso Elkarteak kalitatezko eskola publikoaren alde apustu egingo du beste behin ere, eskola integratzailea, parte-hartzailea eta euskalduna eskatuz. Gainera, «Mugak gaindituz, geuria indartu» lelopean, aurten bereziki kultura aniztasunak XXI. mendean duen garrantzia azpimarratu nahi izan dute.

Elkarteko presidente Ana Eizagirreren hitzetan, «besteekiko errespetuan gurea indartzea da dugun helburua, testuingurua kontutan hartuz gure izaera garatzen jakitea. Bide batez, gainontzekoei gu eta gure kultura ezagutzeko bidea errazten diegu». Hezkuntza propioa aldarrikatzen du EHIGEk, besteekin harremana errotuz, «era zabal batean berrituz eta etengabe aldatuz, gure gizartetik eta ume bakoitzaren beharretatik abiatuz».

Kukuxumusuk diseinatutako logotipoak ere mezu berdina darama: bi haur ageri dira kartelean, bata euskalduna eta bestea atzerritarra, solasean. Kultura desberdinekin elkarren arteko harremana garatu daitekeela adierazten du, gurea indartuz.
Bizkaiko Guraso Elkarteak ere izango du zer ospaturik, 25 urte bete baititu. Eizagirrek azaldu bezala, guraso elkarteen bilakaera izugarria izan da: hastapenetan, zortzi gurasoren ideia 20 ikastetxetara zabaltzea lortu zuten eta egun ia ikastetxe guztietan daude elkarteok. Eskola publikoa aztertzearekin batera, jada etorkizunera begira estrategikoki lan egiteko gai direla azpimarratu du presidenteak.

Hori guztia jai giroan ospatzeko, egitarau zabala prestatu dute ekainaren 6rako. Aurten, bereziki gazteei zuzendutako ekintzak indartu nahi izan dituzte, ile-apaindegi musikala bezalako ikuskizun berriekin eta Fermin Muguruza Kontrabanda edo Pin Pan Pun Band taldeen kontzertuekin.


ASTEKARIA
2004ko maiatzaren 30
Azoka
Kanal honetatik interesatuko zaizu: Hezkuntza
Eskola publikoarentzako lehenengo plan estrategikoa aurkeztu du Pedrosak

“Etapa berri baten hasiera” eta “historikoa” moduko hitzekin aurkeztu du Eusko Jaurlaritzaren Hezkuntza Sailak Euskal Eskola Publikoa Eraldatzeko I. Plan Estrategikoa, Eusko Legebiltzarrean. Edukiak oraindik ontzeko eta zehazteko daudela, plana hamar... [+]


Hezkuntza saila eta sindikatuak ostiralean bilduko dira, eta akordio bat lortzeko nahia adierazi du Jaurlaritzak

Araba, Bizkaia eta Gipuzkoako hezkuntza publikoko irakasleek urtarrilean abiaturiko greba zikloaren bigarren kolpea amaitu eta biharamunean deitu du bilera Eusko Jaurlaritzako Hezkuntza Sailak. Begoña Pedrosa sailburuak adierazi du "akordio bat lortzeko nahia"... [+]


Armagintza sustatzearen aurkako manifestua sinatu dute EHUko 135 irakaslek, Jaurlaritzaren posizioa kritikatuta

Zedarriak enpresari taldeak armagintza sustatzera deitzeak eta Jaurlaritzak horrekin bat egiteak "haserrea" sortu diela diote sinatzaileek. Mundu mailako egoera "inoiz baino larriagoa" dela uste dute, eta "Euskal Herriaren etorkizuna oztopa dezakeen... [+]


Unibertsitate pribatuak sortzeko baldintzak gogortu nahi ditu Espainiako Gobernuak

Ugaritu diren “txiringito pribatuei” muga jartzeko asmoz, unibertsitate berriak sortzeko baldintzak gogortu nahi ditu Espainiako Gobernuak. Euskal Herrian polemika artean jaio zen azken unibertsitate pribatuak adibidez, Gasteizko Euneizek, gaur gaurkoz ez ditu... [+]


2025-04-02 | Mara Altuna Díaz
Arberoa ikastolaren suteak elkartasuna piztu du Ibarran

Nafarroa Behereako Arberoa ikastola erre zen pasa den urrian. Administraziotik laguntzarik jaso ez duten arren, herritarrek berehala erantzun dute. Astelehenean, hain zuzen, elkartasuna eta berotasuna jaso dute Gipuzkoako Ibarran. Elkartasunak eraikitako sarea da gakoa.


Asteazkenean ere kanpaldia egingo dute irakasleek Lakuan, Jaurlaritzak ez baitu negoziatuko “mobilizazioak amaitu arte”

ARGIAri jakinarazi diotenez, 40-50 irakasle inguruk Eusko Jaurlaritzaren Lakuako egoitzaren pareko belardian igaro dute gaua. Dozena bat kide identifikatu ditu gauerdian Udaltzaingoak.

Gaurko greba deialdiak %75eko jarraipena izan du sindikatu deitzaileen arabera... [+]


Eskolaz kanpoko jarduerek kanpoan uzten dituzte premia bereziak dituzten haurrak

Bai ikastetxeek antolaturiko eskolaz kanpoko jarduerek, bai aisialdiari loturiko ekintzek eta udalekuek desgaitasunen bat duten haurrak kanpoan uzten dituzte maiz, eta hain justu, jarduera horiek bereziki onuragarriak dira premia bereziak dituzten haurrentzat. Hala dio... [+]


STEILASek eta LABek jakinarazi dute Hezkuntza Sailak bertan behera utzi duela gaurko deituta zuten bilera teknikoa

Hezkuntza Sailak EITBri azaldu dioenez, ikastetxe bakoitzean izan beharreko baliabideak batzar teknikoetan negoziatu partez, mahai negoziatzailean landu beharko lituzkete. Bihar eta etzi greba egingo dute EAEko ikastetxe publikoetako irakasleek.


2025-03-28 | ARGIA
200.000 euro lortzeko kanpaina abiatu du Integrazio Batzordeak

Seaska Sarean inklusio egoeran dauden 165 ikasleei laguntza bermatzeko hasi dute kanpaina, antolaketa propioa eratuta. Frantziako Hezkuntza Ministerioaren jarrera salatu dute kanpaina aurkezteko prentsaurrekoan, behar bereziak dituzten haurren inklusiorako baliabide... [+]


2025-03-26 | Tere Maldonado
Hezkuntza Saila: ezgai ala ez duin?

Hezkuntzari buruzko legediak, Ekonomia Lankidetza eta Garapenerako Erakundearen eta planetako jaun eta jabeen aginduei jarraituz, ikasleek ikasketa etapa bakoitzaren amaieran “irteera-profil” jakin bat izatea bilatzen du. Ez pentsa profila zerbait itxia eta bukatua... [+]


“Hezkuntza Sailak bileran guri hitzez esandakoari uko egin zion gero”

Non daude talka handienak eta zenbateraino dago gertu akordioa, EAEko hezkuntza publikoko irakasleentzat? Greba ziklo luzeari amaiera emateko sukalde lanaren eta gakoen inguruan mintzatu gara, STEILASeko bozeramaile Haizea Arbiderekin. “Grebak bertan behera utziko... [+]


Ikastetxeen fusioa: Nola batu bi hezkuntza komunitate... albo-kalte gutxien eraginez

Nolako esperientzia eta ondorioak izan dituzte iraganean bateratu ziren ikastetxeek? Zein berme eskatzen dituzte orain fusio fasean murgilduta daudenek? Bi ikastetxek bat egiteko prozesuan, aintzat hartu beharreko gakoak zein diren aletu ditugu, etorkizunean fusioen politikak... [+]


Hezkuntza publikoko irakasleen astearteko greba egunak %75eko jarraipena izan du, sindikatuen arabera

Astelehen arratsalde-gaueko negoziaketa bilera luzearen ostean aurreakordiorik lortu gabe, EAEko hezkuntza publikoko irakasleak grebara deituak izan dira berriz ere; urtea hasi denetik bosgarren greba eguna izan da asteartekoa. Lanuzteek %75eko jarraipena izan dutela adierazi... [+]


Elkarretaratzeak egin dituzte Euskal Herriko dozenaka hezkuntza zentrotan, Israelek hildako haur palestinarrak oroitarazteko

Gure Haurrak ere Badira ekimenak deituta, Israelek azken egunetan Gazan hildako gehienak haurrak direla salatu dute. Gobernuei eta erakundeei Israelekin harreman oro etetea ere exijitu diete, "genozidio honen aurka argi eta tinko" lerratu daitezen.


Eguneraketa berriak daude