Daniel roth Parisko Saint-Sulpiceko Cavaille-Coll organoaren titularra, Zsigmond Szathmary Friburgoko Unibertsitateko organo irakaslea eta Peter Planiavski Vienako San Esteban katedraleko organista egongo dira, besteak beste, Bizkaiko Foru Aldundiak antolatuta Euskalduna jauregian egingo diren organo kontzertuetan. Abenduaren 12ra bitartean izango diren zazpi kontzertuetan Bach-en, Puccini-ren edo Bruckner-en piezak interpretatuko dituzte. Organo jole gazteek eta euskal ordezkaritza batek ere parte hartuko du zikloan. Azken saioan, Daniel Oiartzabal organista arabarrarekin batera, Bilboko Abesbatza eta Bilboko Koru Elkarteko Kontserbatorioko Abesbatza, Nuria Orbea bilbotar sopranoa eta David Sagastume arabar kontratenorra arituko dira.

Euskal literatura bildu eta zabaltzeko lan eskerga egiten du Susa argitaletxeak eta horren isla dugu armiarma.com web ataria. Egan aldizkaria sareratu zuen berriki. Orain, Literaturaren Zubitegia gunea plazaratu du. Duela bi urte Literaturaren Entziklopedia elektronikoa sortzeko asmoarekin abiatu ziren eta entziklopediaren enbor gisa osatu dute Literaturaren Zubitegia. Guneak 638 euskal idazle 3.181 liburu bibliografiatan, 1.436 aipamen eta artikulu, 678 kritika, 2.026 esteka eta 3.445 efemeride biltzen ditu eta aldiro berrituko dute. Sarean dagoen literaturaren zubi izateko.

Baionako Euskal Museoan Pierre Labadie Pier miarriztarraren margolanak ikus daitezke maiatzaren 2a arte. 40 margoz eta ehun bat zirriborro eta marrazkiz osaturiko erakusketak euskal kultura tradizionala biltzen du iruditan. Picasso eta Modigliani artisten eraginarekin margotzen hasita lehenik, eta Arteta eta Arrueren bidez euskal artea ezagututa ondoren, Pierrek egindako lanek duten berezitasunik nabarmenena aho eta begi gabeko pertsonaiak lantzen dituela da. Euskal Herriaz ematen duen irudiak arrakasta nabarmena izan du, Atlantica argitaletxeak artistaren obraz osaturiko liburu bat argitaratu baitu.

Lizarrako folklorea eta ohiturak biltzen dituen Lizarra-Gurea ikuskizuna Donostiako Kursaalean ikusi ahal izango da apirilaren 4an. Orio eta Zarauzko Kilometroak 2004ren eskutik, Lizarrako talde gehientsuenak biltzen dituen ikuskizunaz gain, Ereintza abesbatza, Lizarrako Gaiteroa, Kilkarrak antzerki taldea, Aita Hilario Olazaren txistulari taldea… arituko dira egun berean Kursaalean. Bilbon (ekainak 13), Iruñean (ekainak 27) eta Lizarran (irailak 17-18) ere ikusizun hori ikusteko aukera izango da.

Joan den astean albiste lazgarri bat jaso zuen euskal kulturak: Andolin Eguzkitza hil zen bihotzekoak jota. Idazlea, euskaltzain osoa, EHUko irakasle katedraduna, Euskal Idazleen Elkarteko lehendakari ohia, Euskararen Aholku Batzordeko kide izandakoa... gogor egin zuen lan euskara eta euskal kulturaren alde. 1953ko abenduaren 6an Santurtzin sortua, Filologia Erromanikoan lizentziatu zen Deustun. Salamancan jarraitu zituen ikasketak eta ondoren Alemanian eta AEBetan osatu zituen, Hizkuntzalaritza Erromanikoan doktoregoa eskuratuta. Hiru nobela, hiru poema liburu eta hainbat itzulpen zituen argitaratuta eta poema liburu berria ari zen idazten. Gizartearekin engaiatutako gizona genuen eta haren adibide dira egunkari eta aldizkari ugaritan idatzi zituen artikuluak.

Arrakasta izugarria dute Japonian eta hainbat herrialde asiarretan keitai literaturako eleberriek »keitai esaten zaie Japonian segapotoei». Eta bolada Europara iritsi da dagoeneko. Argitaratu gabeko lanak eta argitaletxe handiekin zerikusirik ez dutenak dira nobela horietako asko. Espainian Movistarrek eskaintzen du zerbitzu hau eta hilabetero hiru euro ordainduta, egunero 2.000 karaktereko kapitulu bat jasotzen du erabiltzaileak. Las Indias Electronicas enpresa arduratzen da Movistarrentzako i-nobelak sortzeaz eta teknologia berriak sortzen ari diren mundu berria dute gehienek hizpide. Besteak beste, Javier Lorente eta Diana Gutierrezen eleberriak eta Suso del Toro idazle galegoaren ipuin laburrak eskura daitezke.

honakoa da: emakumea, ezkongabea, seme-alabarik gabea eta ikasketa ertainduna. Horixe dio Espainiako Antzoki eta Auditorio Publikoen Sareak egindako Marketing Relacional. El enfoque relacional de las artes escenicas ikerketan. Malagako Unibertsitatearekin elkarlanean egindako lanean, antzezleku publikoen kudeaketa eta Espainiako ikusleen perfila izan dituzte aztergai. EAEko ikusleei dagokienez, hona datu batzuk: ikusleen %56,7ak nahiago du ikuskizunetara lagunduta joatea, ikusleen %73,3 probintzietako hiriburutakoak dira, ikuskizunetara joatea bestelako ekintzekin konbinatzen dute ikusleek (afaltzera joan, tragoxka batzuk hartu...) eta ikasketa mailak gora egiten duen heinean handitzen da ikusleen asistentzia.