Zeintzuk dira «Aritz. Nayarit-eko altxorra» komikiaren nondik norakoak?
Ideia, Jean-François Saure argitaldariarena izan zen. Bere asmoa gaztetxo eta helduentzat balioko zuen "euskal heroi berria" sorraraztea zen, Tintin fenomenoa oinarritzat harturik. Pelotaria izan behar zuen Aritzek, komikiaren protagonistak, baina bere abenturek kutsu unibertsala behar zuten, horregatik kokatzen dira istorioak urruneko lurraldeetan. Oinarrizko ideia horiek hartuta, komiki sail baterako balio zezaketen pertsonaia batzuk sortu eta garatu nituen nik. Eta behin pertsonaiak garatuta, Daniel Redondo marrazkilariak bizia eman zien. Ikusgarria da lehenengo aldiz pertsonaia horiek bizirik ikusten dituzunean.
Zer agertu duzue komikiaren lehen ale honetan?
Mexikoko huitxol tribuari buruzko istorio bat idazteko gogoa neukan, eta tribuari buruz sakonki irakurtzean, Mexikoko gobernuarekin dituzten arazoak ezagutu nituen. Horrek eman zidan ideia nagusia, eta gizarte aurreratuak baztertu duen tribu bat ardatz hartuta, abentura eta misterio istorio bat sortu nuen. Gainera, huitxol tribuak komikiari beste alderdi bat ere irekitzen dio, antropologikoa, beste kulturak ezagutaraztearena... Hori ere interesgarria iruditzen zitzaidan, irakurle helduagoei ere komikia interesgarria egin ahal izateko.
Hurrengoan Aritz nondik ibiliko den aurreratzerik bai?
Bigarren aleko gidoia idatzita dago dagoeneko, eta Daniel Redondo marrazkilaria buru-belarri dabil abentura berri horiek marrazten. Ale horretan, gure protagonistak Kretara doaz, antzinako Minoiko garaiko tenplu zaharretan barrena.