Zein da «Eguraldiaz hizketan» liburuaren helburua?
Ba, jakina da euskaraz argitaratzea ez dela publiko oso ugari batentzako argitaratzea, eta are gutxiago poesia izanik. Zer ekarpen egin nahi izan dudan liburu honekin? Ez literatura unibertsalaren historiari, eta ez euskal literaturaren historiari urrezko hizki handiegirik emateko ahalmenik neure buruari ikusten ez diodanez, helburu umilago batzuk bilatu ditut. Barruan neuzkan hainbat gauza esatea, adibidez, askotan eguraldiaz hizketan, hala behartuta edo hala datorkigulako, agertzen ez diren gauza horiei leku bat egitea.
Zer aurkituko du irakurleak zure poemotan?
Hiru egoera edo sentimendu nagusi ageri dira liburuan zehar, eta trantsizio moduan-edo jokatzen duten tarteko atal batzuk ere bai. Egoera horietan guztietan maila pertsonala eta herriarekiko kezka -edo egoerarekikoa- uztartzen saiatu naiz (ez dakit lortu dudan), bata zein bestea ezin ditudalako banatuta ulertu. Eta poemotan uste dut nabarmen agertzen dela euforia sentimendu bat, hasieran; amorrazio sentimendu bat, gero; eta depresio egoera bat ere bai. Eta, nire ustez, maila pertsonalean oso esanguratsuak dira hiru sentimendu horiek, eta herri bezala gure egoera animikoan gertatzen diren aldaketa handien eta gorabeheratsuen isla ere izan daitezkeelakoan nago.
Besterik?
Liburu hau konpromiso baten emaitza ere badela. Pertsonekiko konpromisoa -zehazki pertsona batekikoa- eta herriarekiko konpromisoa. Nik hala bizi izan dut, behintzat.