Bero-beroan
2021eko uztailaren 19a
«Aste buru honetan ez naiz hilko. Noiz arte?».
Horrela zioen, Etxerat-ek antolatuta, Lasarte-Orian burututako euskal presoen aldeko ekitaldiaren pankartak edota lelo nagusiak. Etxeratek eta Euskal Presoen Kolektiboak bat eginik, ozenki salatu dute euskal presoek eta beren senitartekoek bizi duten presondegi-erregimena. Joan den asteburuan 671 presok senideen bisita izateari uko egin zioten protesta gisara, eta euren senitartekoek, berriz, errepideetan barrena ibiltzeari muzin. Frantziako eta Espainiako espetxeetan sakabanatuta dauden presoek eta bere hurbilekoek jasaten duten egoera larria salatu zuten milaka lagunek. Ekitaldian errepideetan hildako hamairu pertsona gogoratu zituzten, eta bereziki, aurtengo otsailean Almeriako espetxera zihoazela bizia galdu zuten Argi Iturralde eta Iñaki Balerdi lasartearrak.
Elkarrik 100.000 sinadura Bake Konferentzia xede.
Bake Konferentzia eratu ahal izateko kanpaina berri bati ekin dio Elkarrik. Kanpainaren helburua 100.000 sinadura lortzea da. Ondoren, martxoan, sinadurak Eusko Legebiltzarrean eta Nafarroako Parlamentuan aurkeztuko ditu Elkarrik, eta alderdi politikoak mahai batean eseri daitezen eskatuko die bi erakundeei. Bilboko Euskalduna jauregiko ekitaldian sinadurak biltzeko erabiliko den Giza Borondateen Manifestua aurkeztu zen. Agiriak dioenez «indarkeria eta desadostasuna sufritzen ari den gizarteak elkarrizketa eta akordioa behar ditu elkarrekin bizitzeko eta bakea bilatzeko».
Autodeterminazioaren aldeko 1.237 boz
Zuzen taldearen eskutik ehundaka lagun bildu dira autodeterminazio eskubidea aldarrikatzeko Donostiako karriketan. Kaleko martxaren ondoren erreferendum sinboliko bat burutu zen eta eskubide honen aldeko 1.237 boz bildu zituen ekimenak. Zuzen taldekoek 1.000 boz biltzeko asmoa zuten eta, eguraldia oso kaskarra izan arren, helburua gainditu izanak biziki poztu zituen. Antolatzaileek ekimen mota hau berriz burutzea pentsatu dute jadanik. «Herriz herri 10.000 boz biltzea» asmoa azaldu dute desobedientzia zibilaren aldeko ekintzaileek.
Nafarroako ipar-ekialdeko euskalkiak
Aitor aranak "Nafarroako Ipar-ekialdeko euskara. Irunberritik Aezkoaraino" liburua plazaratu du Altaffaylla kultur taldearen eskutik. Arangoiti ikastolarekin elkarlanean egin du liburua Aranak, eta Nafarroako ipar-ekialdean hitz egiten ziren lau euskalkiak aztertu ditu: hegoaldeko goi-nafarrera, erronkariera, zaraitzuera eta aezkera (bizirik den bakarra). Liburuaren lehen zatian euskarak Nafarroan izandako bilakaeraz jardun du idazleak eta bigarrenean ipar-ekialdeari lotu zaio. Toponimoak, mapak eta eskualdeko esamoldeak aurki daitezke bertan.
Gazteek erabil dezaten
Ostalaritza hiztegia menuan
Larria da euskararen egoera Iparraldean eta are larriagoa da gazteen erabilerari erreparatzen badiogu. Horren garrantziaz jabetuta, Euskarbiada jaia antolatu du Seaskak urriaren 18rako Angeluko Amodioaren hondartzan. Askotariko ekitaldiak izango dira: surf erakustaldia, roller erakustaldiak, rap eta bertso saioak, kontzertuak, euskararen egoerari buruzko mahai-ingurua... Bestalde, euskalgintzako hainbat taldek (AEK, Uda Leku, Euskal Konfederazioa...) informazio mahaiak ipiniko dituzte.
Sukaldaritza, gozogintza eta zerbitzuetako tresneria, teknikak eta prestakinak biltzen ditu plazaratu berri den Ostalaritza Hiztegiak. UZEIko teknikariek eta Lanbide Heziketako Ostalaritza Eskoletako irakasleek egin dute Leioako Ostalaritza Eskolak eskatutako hiztegia. 1.000 termino inguru bildu dituzte euskarazko, gaztelaniazko eta kasu batzuetan frantsesezko eta ingelesezko baliokideekin.
Interes Publikoko Elkargoa urruti
Max brisson Hautetsien Kontseiluko hizkuntza batzordeko arduradunak adierazi duenez, Interes Publikoko Elkargoa (IPE) sortu aurretik, haren zutabeak antolatu eta ezarri daitezke. Baina halako erakunde bat sortzeko iragarpen ofiziala behar da eta Sarkozy Barne ministroa maiatzean iragarpen ofiziala egitera etortzekoa bazen ere, ez zen etorri. Eta iragarpen ofizialaren ondoren, kasurik onenean urtebetera sortuko litzateke IPE, Brissonen esanetan. Egun dauden egiturak eta esperientziak baliatu beharko liratekeela adierazi du Brissonek eta Hizkuntza Kontseilua IPEren baitako izan ez arren, aholkularitza funtzioa bete beharko lukeela hark. Bestalde, Hizkuntza Kontseiluak lehendakari berria hautatu du: Mixel Etxeberri.
Xarlo Etxezaharreta preso.
Espainiako Auzitegi Nazionaleko Baltasar Garzon epaileak ETAko kidea izatea leporatu dio Xarlo Etxezaharretari eta Soto del Real espetxean preso sartzeko agindu. «Kalegorria» aldizkariaren zuzendaria eta Udalbiltzako hautetsi ohiaren atxiloketak jende askoren erreakzioak eragin ditu azken egunotan. Euskal Diaspora elkarteak, Iparraldeko hautetsiek eta Gure Irratiko lankide ohiek bere askapena eskatu dute. Etxezaharretak atxikimenduzko eskutitz ugari jaso du eta bere atxilotzea gaitzesteko elkarretaratze bat burutu zen Hazparnen. Etxezaharreta Hazparneko udal hautetsia eta Udalbiltzako kidea izan zen azken udal hauteskundeetara arte .