Etorkizunera begira zabalduko ditu aurten ateak Durangoko Euskal Liburu eta Disko Azokak. Hala erakusten du aurtengo edizioaren iragarpena egiten duen kartelak. Joxe Amantedi Agirrebeitia izan da kartelaren egilea eta Gerediaga elkarteak liburu eta diskoak ezezik teknologia berriak biltzen dituen etorkizuna irudikatu nahi izan du aurtengoan.
Abenduaren 4tik 8ra bitartean egongo da zabalik 37. Euskal Liburu eta Disko Azoka. Urtero, gai jakin baten inguruan antolatu izan ohi da ekimena eta aurtengoan Euskal Herriko historia izango da azokako ardatz nagusia. Historia bere atal desberdinetan: literaturan, zineman...
Pedro Pablo Arrinda irakaslea arduratuko da sarrera hitzaldia emateaz eta «Euskal historia: ikerketaren emaitza ala mitoaren ondorioa?» izango du hizketagai. Baina urtero legez mahai-inguru eta hitzaldi ugari izango dira bost egunetan zehar. Tartean izango dira, besteak beste, Asisko Urmeneta, Kike Amonarriz, Mikel Asurmendi, Jurgi Kintana, Lola Valverde, Manex Goienetxe, Fito Rodriguez...
ARGIZAIOLA SARIA
Euskararen alde egin duen lan oparoa eskertu asmoz, Labayru ikastegia izango da aurtengo ekitaldiko omendua. Erakundeak aurten bete ditu 25 urte eta, mende laurden honetan bizkaiera eta oro har euskararen alde egin duen lana saritzeko Argizaiola saria jasoko du Gerediaga elkartearen eskutik.
1977ko otsailaren 23an sortu zen Labayru, Bizkaiko Elizbarrutiko apaiz batzuen ekimenez. Hasiera hartan Karmelo Etxenagusia, Ander Manterola, Lontxo Zugazaga eta Mikel Zarate buru zirela, Labayruren xedea euskarari eta euskal kulturari laguntza ematea zen. Euskara hobeto ezagutu nahi zuten eta lan horretan aritu dira 25 urteotan. Euskal Kulturan egun garrantzi handiko gunea da Labayru ikastegia, euskara irakatsi eta ikertzeaz gain, etnografia alorreko ikerketak eta liburu ugari argitaratzen baititu.
AZOKA ZENBAKITAN
Durangoko Euskal Liburu eta Disko Azokaren 37. ekitaldian 271 erakusmahai izango dira, iaz baino 26 gehiago. Gehienetan argitaletxeen produktuak izango dira erakusgai, baina horiez gain kultur talde, aldizkari, diskoetxe, erakunde, banatzaile, unibertsitate, aurrezki kutxa edota egunkariek aurtengo ediziorako bildu dituzten argitalpenak eskainiko dituzte.
271 erakusmahai horietan erakusgai izango diren materialen artean liburuak eta diskoak izango dira nagusi. Guztira, 439 liburu aurkeztuko dira, horietatik 311 euskaraz, 123 gazteleraz eta 5 frantsesez. Diskoak orotara 82 izango dira. Eta liburu eta diskoez gain, aldizkari, bideo, software eta Interneteko atari ugari aurkituko ditu azokara hurbiltzen den bisitariak.
TEKNOLOGIA BERRIAK
Durangoko Euskal Liburu eta Disko Azoka etorkizunari begira jarri dela-eta, ezin da ukatu azken urteetan teknologia berriek hartu duten protagonismoa. 37. edizioan ere ez dira atzera geratuko.
Aurreko edizioetan ordenagailuen gunea nahiko alboratuta egon dela-eta, aurtengo honetan teknologia berrien erabiltzaileek metro gehiago izango dituzte karparen barruan. Metro kopuru gehiago izateaz gain, zibergunea ere handitu egingo da. Tartean izango dira, Urtxintxa Aisialdi eskola, Miatzen, Goiatz, Elhuyar, Ena Elkartea, www.nontzeberri.com kultur web gunea, Euskaltzaindia, Eusko Jaurlaritza, UEU eta Euskaltelen txokoak.
KARPA GARAIAREN AMAIERA IRITSI DA
Aurtengoa izango da beraz, karpa azpian egiten den azken azoka. Eraikin berria egiteko obra lanak hasi direla-eta, aurten karpa ez da zehazki aurreko urteetako toki berean kokatuko. Landako konplexuan bertan egongo da baina anbulatorioaren atzean. Eraikin berriari dagokionez, dagoeneko jarrita dago lehendabiziko harria, orain proiektuari gorputza ematea besterik ez da falta. Eraikin berriaren nondik norakoak, beraz, datorren urterako utziko ditugu.