EZAGUTZEN ari da apurka eta eztabaida ugari sortu du jadanik Ibarretxe lehendakariaren planak. Esperantza, kezkak, arbuiatze zorrotzak... denetarik dago balorazioetan. Zalantzen artean, besteak beste, ea nola demontre egingo den prozesu bukaerako erreferenduma. Egoera horretara iritsi aurretik, dena den, bizpahiru urte pasa daitezke. 2003ko irailerako Eusko Jaurlaritzak bere proiektuaren zirriborro artikulatua gauzatua izan beharko du. Ondoren, zenbait hilabete beharko dira zirriborroa gizarte eragileen eskuetatik pasatu dadin eta zirriborroa Estatuarekin negoziatzeko; eman dezagun 2004ko udaberrirako gizarte eragileek beren ekarpenak eginak dituztela eta Estatuarekin negoziazio ahalegina egin dela, 2002ko urritik ikusita bederen inork ez baitu pentsatzen Estatua inongo negoziaziotan sartuko denik, ezta Jaurlaritzak berak ere. Erreferendumera eraman beharrekoa, beraz, Eusko Legebiltzarrak onartutakoa litzateke. Gaurko egunetik ikusita, dena den, posibleena litzateke Eusko Legebiltzarrak berak ere ez onartzea proposamena. Onartu hala ez, dena den, gerta liteke 2004ko udan Legebiltzarra desegitea eta udazken edo negurako EAEko autonomi hauteskunde aurreratuak deitzea. Legealdia agortuta 2005ean lirateke. Eta, Espainiako Gobernuak legezko erreferenduma egitea debekatu ondoren, zer eramango luke Ibarretxe lehendakariak EAJren -edo EAJ-EAren- hauteskunde programan? Atxikimendu askean oinarritutako itun proposamena. Horra hor Ibarretxeren proposamenarekin kontsulta ospetsua egiteko beste modu bat, eta hiruko gobernuaren baitan indar handia duena. Bitartean, gainera, datorren udaberriko udal hauteskundeak izango dira eta 2004an Espainiako hauteskunde orokorrak. Horietan gertatutakoek ere izango dute eraginik aipatutako hipotesietan.

HAUTSAK harrotu ditu Confebaskeko Roman Knörrek Ibarretxe lehendakariaren proposamenari emandako ezetzak. Confebask barruan ere banaketa ei dago eta 300 enpresarik Juan Jose Ibarretxeren proposamenaren aldeko erantzuna prestatu ei du. Datozen egunotan ikusiko da emaitza. EAEko enpresarien indar oreka zein den ere ikusiko da. Une hau Knörr bere kargutik kentzeko ere balia dezakete zenbaitzuk.

ABERTZALEEN Batasunak (AB) datorren azaroaren 16an burutuko du ohiko biltzar nagusia. ABren txosten nagusiak «Burujabetzaren definizioa» eztabaidatzea eta zehaztea helburu du, eta horretarako egungo errealitatea eta printzipio ideologikoak uztartzeko prozesua landu behar dela azpimarratzen du. Txosten berean, Iparraldeko alderdi honek ezker abertzalearen "birfundatze beharra" aipatzen du. Biltzarraren aurkezpenean, Jean-Noel Etxeberri eledunak Abertzaleen Batasunak Ibarretxeren proposamena "begi onez" ikusi duela adierazi zuen, baina ekimena Madrilekiko "konfrontazio politikoa" garatzeko aski ote den zalantzan jarri zuen.

EGOERA politiko gogorra eta korapilotsua bizi da eta horrek bere eragina izan ohi du urtero sasoi honetan hasten diren aurrekontu eta diru negoziazioetan. Aurrekontuen aurkezpenera itxaron beharko da, baina ez dirudi Eusko Jaurlaritzak bere aurrekontuak erraz atera ditzakeenik. Berriz luzatuz gero, luzapena dagoen laugarren aldia litzateke. Gipuzkoa eta Bizkaiko Diputazioetan ere iaz PSEren onespenaz onartu ziren aurrekontuak. Araban, PP eta PSE-EEk beren gehiengoarekin aterako dituzte aurrera aurrekontuak. Ikustekoa izango da, halaber, Jaurlaritzak bere kabuz iragarri dituen eskumenen inguruko neurriak hartzen baditu, kupoaren negoziazioa nola bilakatzen den.

Udalbiltzaren Batzorde Eragilearen ustez, egungo esparru politikoa aldatzeko nazioarteko zuzenbidean oinarrituko den prozesua abiarazi behar da, modu horretan bakarrik berma baitaitezke Euskal Herrian gaur egun bermatzen ez diren eskubide indibidual eta kolektiboak. Udalbiltzako ezker abertzalearen aldetik lantzen ari den «Euskal Herriaren eskubideen agiria» izango da eskubide guztiak bermatzeko proiektuaren oinarri. Udalbiltzaren Batzorde Eragileak gizartearen aniztasunean oinarritutako prozesua abiarazteko asmoa agertu du eta arrakastatsua izan dadin, eragile politiko, ekonomiko eta sozial guztien konpromezua bilatuko du.