Ziurrenik zuetariko gehienok udako oporrak non igaro jada erabaki duzue, baina egongo da oraindik zalantza batzuk argitzeke izango dituen norbait ere. Buruhauste handienak, data zehatz bat aukeratzearekin batera, diru kontuek sortu ohi dituzte gehienetan. Sarri gertatu zaigu bidaia eder batek erakarria izan eta poltsikoari begiratu ostean atzera bota behar izatea. Bada, gure kezka eta zalantzak uxatuko dituen eskaintza Interneten aurki dezakegu.

Bidaiek azken urteetan sarean izan duten harrera onak bultzatuta, turismoari eskainitako web guneen kopurua haziz doa, eta gero eta eskaintza erakargarriagoak aurki ditzakegu bertan. Eskaintzak hiru motakoak dira nagusiki. Batetik, egonaldiari nahiz joan-etorriari eragiten dieten prezio beherapenak daude, eta bestetik, bidaia osoak biltzen dituztenak. Alegia, batzuetan gaua igaro beharreko hotel, ostatu edo dena delakoan aplikatuko dira merkealdiak, beste zenbait kasutan bezeroa hara eramango duen tren bidaia edo hegaldian, eta beste eskaintza batzuek bidaia osoa -garraioa eta egonaldia- hartuko dute kontuan. Sarean topatu ditugun eskaintza gehienak hirugarren multzo honetan sartzen dira, baina hegaldiek ere leku arras garrantzitsua dute hainbat web gunetan.
Denbora luzez nabigatu ostean, beherapen bereziak biltzen dituzten web guneak bi multzotan banatu ditugu. Ohiko bidaia-agentziak batetik, eta atari turistiko eta agentzia birtualak bestetik. Aurrenekoek gure herriko bulegora joanez gero topa daitezkeen beherapenak eskaintzen dituzte normalean, baina atari turistikoek Internetera mugatzen dute euren lana, eta ondorioz, eskaintzen dituzten mauka horiek sarean soilik aurki daitezke.


Bidaia-agentziek sarean eskuragarri jartzen dituzten beherapen horiek sarri bulegoko erakusleihoan bertan daudenak izan ohi diren arren, Internetek hainbat abantaila eskaintzen dizkio bezeroari. Eroski Bidaiak-eko (www.viajeseroski.com) Jon Agüerak azaldu digunez, "bidaiak Interneten erostea erraz eta erosoagoa da, eta gainera, bezeroak denbora aurreztuko du". Norberak tramite guztiak etxeko ordenagailutik egin ahal ditzake, eta horrez gain, agentzia bera arduratuko da, inolako bidalketa gasturik gabe, hegazkineko edo hoteleko txartelak bezeroari etxera eramateaz. Norberak mementoan izan dezake unean uneko eskaintza ederrenen nahiz azken orduko informazioaren berri, bidaia agentzien eta oro har turismora bideraturik dauden web guneetan harpidedun eginez gero. Alta ematea benetan gomendagarria da, horri esker posta elektroniko bidez jaso ahal baita norberarentzat interesgarri diren web guneetan izandako berrikuntzen inguruko informazioa.
Eroski Bidaiak-ek pasa den apirilean berritu zuen bere orrialdea, eta egindako lanaren lehen balorazio bat egiteko oraindik goiz samar izan daitekeen arren, Jon Agüerak esan digunez gero eta jende gehiagok jotzen du Internetera bidaia bat erosteko orduan. Berarekin gaudela aprobetxatuz, orain arte arrakastarik handiena izan duen bidaia eta uneotan bere ustez erakargarrienak zeintzuk diren esateko galdetu diogu: "Harrera onena izan duena, 328 eurogatik astebete Mallorcan igarotzeko aukera ematen duena da, eta gomendagarriena, bat aukeratzearren, eguna Marbellan 33,50 eurotik aurrera igarotzeko aukera".


Atari turistiko eta agentzia birtualak biderkatu egin dira azken urteetan. Bidaia agentzien edota hegazkin konpainien eskaintzak biltzen dituzte, eta euren kasuan garrantzia berezia hartzen du harpidedun egitearen gomendioak. Eskaintza horiek denbora gutxi irauten dute sarean, eta aukera onenari ihes egiten ez uzteko komeni da posta elektroniko bidez informazioa ahalik eta azkarren eskuratzea.
Eskaintzak hain gutxi irautearen arrazoia, bidaia egokiaren bila dabiltzan lagunentzat benetan erakargarriak izatean datza. Guk web gune horietako batzuk bisitatu eta gustu, zaletasun eta poltsiko guztiak pozik uzteko moduko bidaiekin egin dugu topo: asteburu bateko, astebeteko nahiz hamabost eguneko egonaldiak landetxe batean, Pirinioetan, Mediterraneo aldean nahiz Karibeko irla exotiko batean, Mediterraneoa edo Europa iparraldeko itsasoak zeharkatzen dituzten hamabost eguneko itsas bidaia erromantikoak, 55 urtez gorakoentzat nahiz ezkon berrientzat bereziki antolaturiko bidaiak, natura eta abentura-kirolak uztartzen dituztenak...
Atari turistikoen eskaintzak bi ataletan bana daitezke. Batetik, atari horiek data eta leku finko baterako proposatzen dituzten bidaiak daude, prezioa ere jada zehaztuta dutenak. Hots, eurek beherapena duen bidaia baten berri ematen dute eta bezeroak, baldintza guztiak onartuz gero, erosi ahal izango du. Non bilatu jakinez gero eta pazientzia apur bat izanda, mauka eder askoak lortzeko parada dago. Guk, adibidez, Bartzelonako lau izarreko hotel batean asteburua %45eko merkealdiarekin igarotzeko aukera eskaintzen duen web gune bat aurkitu dugu. Eskaintzak erakarri egin gaitu, baina egun horietan ezinezkoa dugu inora joatea, eta gainera, oraindik garestitxoegia iruditu zaigu.
Dena den, ez dugu etsi, eta atari turistikoek eskaintzen duten bigarren aukerarekin froga egitea erabaki dugu. Bezeroak, bilatzaile baten bidez, desio duen data eta leku bat aukeratu eta atariak bi parametro horiekin bat datozen eskaintzak zerrenda batean bilduko ditu. Gainera, batzuetan, xahutu nahi dugun dirua ere zehaztu dezakegu, eta horren arabera zerrenda berri bat agertuko zaigu. Guk hiru laukiak bete ditugu -data, lekua eta xahutu nahi dugun kopurua- eta bila genbiltzana aurkitu dugu: asteburua Bartzelonan, nahiko prezio onean. Hiru izarreko hotelean, hori bai.


Gure buruhausteei irtenbide egokia emango dien eskaintzaz gain, egin nahi dugun bidaiaren inguruko informazio ugari lor dezakegu sarean. Bidaia-agentziek, atari turistiko nahiz agentzia birtualek, bidaia-gidek, erakunde ofizialek... makina bat web gunek eskaintzen du bidaia hobeto prestatzen lagunduko digun materiala: herrialdetako moneten inguruko datuak, hiri handietako metro-sareen nahiz errepideen mapak, eguraldiari buruzko argibideak, ziberkafetegien gida, medikuntzarekin loturiko aholkuak (batez ere leku exotikoetara bidaiatu nahi duten lagunei zuzendua), telefonia mugikor sistemak, bisita beharreko leku interesgarrienei buruzko informazioa, gastronomiari buruzkoa, kultur egitarauak...
Eroski Bidaiak-ek, adibidez, Espainiako Kanpo Arazoetarako Ministerioak hainbat herrialderi buruz eskaintzen duen informazio eguneratua biltzen du bere web gunean. Gainera, zenbait lagunek egin duten bidaiari buruz idatzitako iruzkinak ere irakur ditzakegu, gure opor egunak prestatzean lagungarri izan daitezkeenak. Eta honek bide ematen digu beste gomendio bat luzatzeko: Egokia litzateke noizean behin txat eta foroak bisitatu eta bertan parte hartzea, gainerakoen iritzi, gomendio eta esperientzien berri izatea baliagarria izan baitaiteke. Oraindik zalantzak dituzuenak, beraz, animatu sarean zehar nabigatzera, bila zabiltzaten mauka hor egon daiteke-eta