Garbi utzi behar da hauek ez direla nire leiendak, auskalo noiztik Euskal Herrian zehar belaunaldiz belaunaldi hedatu diren elezaharrak baizik. Juan Luis eta biok «Euskal Herriko leiendak» liburuan egin dugun lana, horietako batzuk kontatzea izan da; beraz, gaur arte behintzat kate horrek duen azkeneko maila baino ez gara. Baina leienda horiek eskertu behar zaizkie helerazi dizkiguten guztiei eta, jakina, baserriz baserri beroiek biltzen ibili ziren Aita Barandiaran, Azkue, Kanpion edota Barbier bezalako gure kulturako gizon handiei. Horregatik zehaztu dugu liburuan kontatu dugun leienda bakoitza non jasoa izan zen, nork jaso zuen eta zein liburutan aurki daitekeen.

65 leienda eta ipuin. Batzuk besteak baino politagoak dira, luzeagoak edo motzagoak, baina den-denak guganaino iritsi diren bezala azaldu ditugu. Iparraldeko kostaldean dragoiak agertzen dira, Gipuzkoa eta Nafarroa arteko hortan, jentilak; Arabako hegoaldean, sorginak, Nafarroako Bardeen inguruetan, mairu eta kristauen arteko ezinezko amodioez mintzo diren leienda eta ipuinak.... Leienda guztiak daukate erlijio edo sexu zioren bat, baina horretan ere ez naiz ni batere sartu.

Liburu hau egina izan da, adinean sartutakoek euskal leiendak gogora ditzaten, jende helduak irakur ditzan, eta haurrek entzun ditzaten. Izan ere, sei-zazpi urteko haurrei kontatu egin behar zaizkie leiendak. Eta komeni ez dena, isildu, zeren leienda batzuetan oso gertaera gogor eta krudelak agertzen dira.