Datorren asteburu honetan biziko dute sozialistek martxoko kongresuaren atariko une garrantzitsuenetakoa, 9an jakingo baita kongresurako PSE-EEk eramango duen txosten ofiziala. Lasaitasunerako deien erdian, sektore bakoitzak bere argudioak zorrozten ditu, esate baterako Nicolas Redondo Terrerosen aldekoek, 8an Redondo Terrerosi omenaldia egingo baitiote. Lasaitasunerako deiak bai, baina giroak gogortzen jarraitzen du eta zenbait gunetatik salatu da afiliatuen data baseak lapurtu izan direla; informazio hauek joan den astean ezagutarazi ziren, Redondo Terrerosen aldekoek afiliatu guztiei gutuna bidali zietenean.

MIGUEL Sanzen eta Jose Maria Aznarren gobernuek bi batzorde eratu dituzte hitzarmen ekonomikoa negoziatzeko eta, seguruenik, hilabete batean negoziazioa amaitzekotan izango dira. Nafar Gobernuko ordezkariek jadanik aurreratu dute Europako ordezkaritza gaiak baztertu dituztela eztabaidatik. Hitzarmen ekonomikoa iraunkorra eta behin-betikoa da, 1990ean hitzartu zen egungo akordioa eta harrezkero bost urtean behin negoziatzen da. 1995ean egin zen azken negoziaketa. EAEko Kontzertuaren negoziazioan izandako geldotasuna eta arazoak ez direla izango azpimarratu nahi izan dute etengabe Nafar Gobernuko ordezkariek.

ETA-RI atzemandako jeltzaleen izenen zerrendak piztu du EAJ eta PPren azken liskarra. Beste behin ere agerian geratu da Espainiako agintariek ez dutela berdin jokatzen batzuen eta besteen zerrenden filtrazioekin. Ez litzateke arritzeko ETAk zerrenda horiek izatea, ETAri era askotako zerrendak atzeman dizkiote eta. Baina, aldi berean, batez ere ETArekin zerikusi duten kontuetan hainbeste gezur ere azaleratzen denez, halako albisteak zuhurtasun handienarekin hartzea da logikoena. Edozein modutan, ETAren aldetik zerrenda horretako izenen aurka moduren batean jotzea astakeria handia litzateke.

HILABETE batean bai eta hurrengoan ere bai, Frantziako Segurtasun indarrek atxiloketak, presoen entregak edota ETAren egiturarekin lotutako azpiegituraren aurkako operazioak egin dituzte. Azken urtean ETAren aurkako dozenatik gora partehartze izan dute Frantziako polizia desberdinek, ETAren azpiegitura eta militante sarea gogor kolpatuz. Irailaren 11tik aurrera bereziki areagotu da frantziar poliziaren jarrera. Datu guztien arabera, Frantziako segurtasun indarrek ETAren egiturarekiko kontrol handia dute eta era honetako operazioek jarraipena izango bide dute, Bordeleko azken sei atxiloketek adierazten duten bezala.

DATORREN martxoan egingo duen batzar nagusirako Arabarako prestatu duen autonomia estatutuaren berri emango du Unidak Alavesak. UAk EAEn egin daitekeen edozelako autodeterminazio prozesuri aurre egiteko prestatu du autonomia estatutua.

«EUSKAL gazteriak eta Euskal Herriak jasaten duten jazarkundeak salatzeko», joan den otsailaren 2tik gose greba mugagabean ari dira Iruñeko Donibane auzoko Asuncion Elizan Segi gazte erakundeko ia hogei kide.

DATORREN urteko udal eta foru hauteskundeen itzala gero eta ageriagoa da Nafarroako panorama politikoan, eta horren agerle da UPNk PSNren aurka jaurtitako eraso politikoa. Miguel Sanzen esanetan, PSN Nafarroak egun duen proiektu instituzionala abertzaleei saltzeko prest dago. Ondorioa agerikoa da, hots, UPN da Nafarroaren egungo izaera defenda dezakeen indar politiko bakarra. PSNk, bestalde, ez du aukerarik galtzen bere oposizio lana nabarmenarazteko eta, besteak beste, Gaztelu Plazako indusketa lanak ondo egin arte gelditu beharko liratekeela jakinarazi du.