ESKAPARATEAREN ATZEAN
Bertsolari Txapelketaren atzean elkarte bat dago. «Beste proiektu bat gehiago» da Txapelketa Bertsozale Elkartearentzat, gizarteari begira ekitaldi hori den arren ohiartzun handiena duena.
Kontsentsua
da Elkartearen filosofia bereizten duena. Aurreko Txapelketa bukatu orduko, gogoeta bat antolatu zuen Elkarteak Orion. Bertsolariak, epaileak, gai jartzaileak eta antolatzaileak bildu ziren bertan, eta denen artean eztabaidatu eta arautu zuten aurtengo Txapelketa. Zer ariketa jarriko ziren, zenbat ordezkari izango zituen herrialde bakoitzak... dena adostu zen. Aurten bertsolariek txapelketa antolatzen parte hartu dute, beraz.
Egina bildu.
Txapelketako bertsorik onenak, uneko keinuak, tentsioa... eternalak izan daitezen, Elkarteak bideo bat, liburua eta 2 CD aterako ditu. Bideoa abenduaren 22rako egongo da kalean, eta finaleko 90 minutu intentsoenak bilduko ditu. Liburua, berriz, 2 CDk lagunduko dute. Txapelketa osoko bertso antologikoenak enbasatzeaz gain, lehen aldiz saio denen kronika, azterketa eta iritziekin ornituko ditu.
Egina zabaldu.
Elkarteak darabilen asmo nagusietako bat da egindakoa gizarte osora zabaltzea. Erdal komunitatearekin topo egitean bertsolaritzak muga handi bat jotzen du. Erdaldun batek «Zer da bertsolaritza?» galdetzean, leize bat zabaltzen zaio edonori. Hain oinarrizkoa da galdera, hain nabarmena, ez dela beti asmatzen nola erantzun. Txapelketa erdal komunitatera zabaltzeko aukera oso ona da, gizartean duen oihartzunagatik. Aurten, esaterako, Cadena SER eta Radio 3 irrati kate espainiarretan elkarrizketatu dute Bertsozale Elkartea. Erdaldunak euskararen putzura inguratu eta egarritzeko tentagarria da bertsolaritza.
Mundu mailako zubia eraikitzeko, berriz, lau liburu kaleratuko ditu Elkarteak. Euskaraz, ingelesez, frantsesez, eta gazteleraz, bertsolaritza azalduko dute, ikuspegi ezberdinetatik: Zer da bertsolaritza gizartean? Nola egiten ditu bertsoak Egañak? Nola aztertu?
GAIAK GAI
Bertsolari onarentzat ez omen dago gai txarrik, baina gai batzuek porru eginda uzten dute edonor (eh, Egaña?). Saioan aurrez prestatutako gauza bakarra izaki, gai jartzaileek bertsolariek adina erantzukizun eta meritu dute saioaren arrakastan.
Aurtengo gaiak orokorrean onak izan dira. Jendeak arraina bezain albiste freskoak eskertzen ditu, eta gustura geratu da Gescartera, Afganistan eta manifestazioetako generoekin. Manuel Olanok hala dio («Gara», 2001-11-03): «Nik uste gaien abanikoa asko zabaldu dela, gizartea bera askoz anitzagoa delako». Badirudi gai motak bertso neurri batekin lotzen direla, eta neurri handietan gai serioagoak jarri dira, umorea txikirako utziz. Txikian esandako gauza handiak handiagoak dira, baina.
Txapelketa batean puntuka aurten ikusi ditugu, 13 urteren ostean. Entzulearentzat oso atsegina, bertsolarien erreflexuak eta erantzuteko gaitasuna jarri dituzte frogan.
Txapelketako aurkezleak gardena behar omen du, gaia aurkeztu behar du garbi, baina beste ezer gehitu gabe, eta bertsolari denei berdin gainera. Saroi Jauregik hartuko dio erreleboa Laxaro Azkuneri finalean. Benetan fin eta gardena, baina denek ikusi egin nahi dutena
Txapelketa batean puntuka aurten ikusi ditugu, 13 urteren ostean. Entzulearentzat oso atsegina, bertsolarien erreflexuak eta erantzuteko gaitasuna jarri dituzte frogan.
Txapelketako aurkezleak gardena behar omen du, gaia aurkeztu behar du garbi, baina beste ezer gehitu gabe, eta bertsolari denei berdin gainera. Saroi Jauregik hartuko dio erreleboa Laxaro Azkuneri finalean. Benetan fin eta gardena, baina denek ikusi egin nahi dutena