Musika hotsek hartuko dute karparen zati bat. Milaka eta milaka lagun gerturatuko dira euskal musika munduko azken nobedadeak erostera. Baina betikoak ere hortxe egongo dira mahaietan gure poltsikoak tentatzen. Txuma Murugarren; Onddo; Betagarri; Labrit; Kaotiko; Txirri, Mirri eta Txiribiton; Hertzainak eta Jotakie...
Disko sorta potoloa euskal musikariek Azokan eskainiko digutena. Musika lasaia, dantzagarria, edo buruak astintzeko modukoa; adin guztietako musika zaleentzat ezinbesteko gunea da Kalebarria. Metak, Oihuka, I.Z., Gaztelupeko Hotsak, Etxe-Ondo, Elkarlanean, Agorila... Guztira, hamalau diskoetxe eta hirurogeita hamasei disko.
kalebarrian barrena
Hertzainak eta Jotakie berpiztu egin ditu aurtengo Azokak. Oihuka disketxeak 80ko hamarkadako talde mitiko hauen bildumak osatu ditu. «Barrenetik (1981-1990)» diskoan Jotakieren 16 abesti eta bi bonus track bildu dituzte, tartean, «Atxuko» abestiaren zuzeneko bat. Hertzainak taldearen bilduma, berriz, zazpi disko luzek, hiru maxien bildumak eta beste bi diskok osatzen dute. Pack biribil honetan taldeak grabatu zuen lehenengo maketa ere CDan aurkituko dugu. Nostalgikoentzat, zale amorratuentzat eta ezagutu ez zituztenentzat altxor ederra. Baina horiez gain, Urtz taldearen «Aingeru», edota Labriten «Nori egin so» berriak ere aurkituko ditugu besteak beste.
Metak diskoetxera ere joango zaigu eskua. Izan ere, «Hain guapa zaude» Jabier Muguruzaren azkena hortxe dugu. Baita Betagarriren «Remix»a, Etsaiak taldearen «Kaos» eta Ruper Ordorikaren «Hurrengo goizean» ere. Metak, gainera, punk-rock egitasmo berri batekin dator: Kuraia taldea osatu dute Dut taldeko Josebak eta Galderrek, Corazon del Sapoko Fernandok, eta Mikel Kazalisek.
Egitasmo polita Gor diskoetxeak Nafarroako Bertsozale Elkartearekin hasitakoa ere. Elkarteko hamazazpi bertsolari gaztek egindako bertsoak musikatu ditu Nafarroako hainbat rock taldek, hala nola: Barricadak, Pettik, Berri Txarrak-ek, Dank-ek, Buitrakerrek, Mareak, Hemendik At!-ek... ekimen horretatik sortu da «Nafarroa, hitza dantzan» diskoa. Horiez gain, nobedadeen artean Berri Txarrak taldearen «Eskuak, ukabilak» diskoa ere mahaian izango dugu.
Heavya, rocka eta metalaren ingurukoak eta guztiz bestelakoak IZ diskoetxearen nobedadeak: batetik, Izurri Berriaren «Deabruaren legea» eta Bletz taldearen «Garai latzak». Bestetik, Mikel Garikoitz eta Denaliren musika countrya, eta trikitixa «Aisterrazu bi da plaza» diskoarekin.
Aukeran lasaiagoa
Agorila diskoetxeak ahots goxoak jarri ditu mahaian, besteak beste, Errepikaren «Ametsaren ondorioa», Gaztelu Zahar-en «Zuzenean», eta Arraga Choeurs Basquesen «Zabalik». Baina lasaitasuna hausteko, Luther taldearen «Islada», Xabaltxen «Gauerdi pasa eta», edota Haurrock-en «Bertsoa dantzan» diskoak ere hor izango dira. Horiez gain, txaranga hotsik ere ez da faltako Baionako Tanborradarekin eta Incansables taldearekin.
Kalebarrian gora eta behera gabiltzala, Elkarlaneaneko diskoekin egingo dugu topo. Txikienen gozamenerako, Txirri, Mirri eta Txiribitonen «Altza Porru» diskoa kaleratu du honek. Takolo, Pirritx eta Porrotxek ere badute berririk. Baina beste belarri batzuk ere gozatuko dituzte Xabier Leteren «Berrehun urtez bertsotan», Erramun Martikorenaren «Kantuz sortu naiz» eta Oskorriren «Vizcayatik Bizkaiara» diskoek. Anje Duhalderen azken lana ere hortxe dugu: «Georges Brassensen kantari». Euskal Herriko musika tradizionala lantzeko beste ikuspegi bat erabili dute Bixente Martinezek, Txarli de Pablok eta Iñigo Egiak. Lan horren emaitza: Igelaren Banda, eta izen bereko diskoa. Erromantikoenentzat beste eskaintza bat ere bai: Gari, Mikel Markez, Sorotan Bele, Alaitz eta Maider eta beste hainbaten kanturik goxoenak «Maitasun baladak» diskoan.
DDT diskoetxearen standa ere lepo dago. Tartean dira Anger-en «Zuhaitz lehorra ereiten» eta Karkabaren «Hau pikutara doa». Etxe-Ondok, berriz, bi nobedade ditu: Enrike Zelaiaren «Herrit milenio», eta «Infernuko hauspoa», Fran Idaretarena. Juan Carlos Irizarrek ere ez dio hutsik egin zitari: «Gabon doinuak» eta «Suhar» diskoak ekarri ditu.
Nobedadez josita dago Gaztelupeko Hotsak-en standa. Hor ditugu, besteak beste, «Bar Puerto», Txuma Murugarrenen «Hegazkinen arima», eta Onddo taldearen lehenengo diskoa, «Errepideak ez ditut maite».