JUAN Jose Ibarretxeren lehendakari izendapena, Eusko Legebiltzarrean biziko den giro berriaren lehen agerpena izan da. Hauteskunde kanpainan ardatz izan zuen bake eta normalizaziorako programa martxan jartzeko aukera izango du, eta zeregin horretan legebiltzarra ardatz izango duela iragarri du. Legebiltzarretik kanpo, ETAk jakinarazi izan du bera ere hor dagoela eta bere atentatuek herri honetako bizitza politikoa baldintzatuko dutela. Bestetik, ezustean, Ezker Batuaren sostengua ere jaso du Ibarretxek, aurretik negoziazioen apurketak zalaparta handia sortu ondoren. Denborak esango du borondate oneko keinu horrek zerbait berria ekarriko duen hala keinuan geratuko den. EAJ-EAren gobernu programa zabala zertan mamitzen den ikusi beharko da orain apurka, bere orokortasunak alor desberdinetan gauza gutxi eta asko egiteko parada ematen du eta.

LANEAN hastea kosta egin zitzaion Juan Jose Ibarretxeren lehenengo gobernuari eta ondoren su-etenaren apurketa eta EHrekin lortutako gobernu akordioaren apurketa etorri ziren 2000ko hasieran. Harrezkero, Ibarretxeren gobernua gutxiengoan geratu zen eta oposizioak blokeatua. Gobernu jarraipena da, beraz, oraingoa. EAJko zazpi kontseilarien aldetik aldaketa bakarra dago: Kultura Saila Miren Azkarate euskaltzainak zuzenduko du, Mari Karmen Garmendiak Ibarretxeri Gobernua utzi nahi zuela adierazi ondoren. EAren aldetik, bi kritikoek utzi dute gobernua, Patxi Ormazabalek eta Inaxio Oliverik, eta Joseba Azkarragak eta Anjeles Iztuetak ordezkatu dituzte.

AURTENGOAREKIN Joxean Etxebarri, Jose Mari Sagardui, Ernesto Alberdi, Fernando Irakulis, Pako Eskitxabel eta Eugenio Irastorza euskal preso politikoek 21 urte beteko dituzte espetxean. Lehenego laurak zornotzarrak dira TERMOMETROA
_{eta joan den larunbatean seiei egin zitzaien omenaldia Zornotzan bertan.}

IPAR Euskal Herriko hautetsiak kexu agertu dira kamioien garraioaren arazoa dela-eta. 7.000 kamioi pasatzen dira egunero Biriatuko mugatik, eta 20.000 izanen dira 20 urte barru. Hautetsien Kontseiluko lehendakari Alain Lamassoureren ustez, Frantziako Gobernuak ez du arazo honekiko erabaki argi bat agertu. Erabaki bat hartu aitzin bertako hautetsiei iritzia eskatu beharko liekeela uste du Lamassourek.

UZTAILAREN 15ean hiru urte bete dira Baltasar Garzonek «Egin» egunkaria eta Egin Irratia ixteko agindua eman zuenetik. Orduan auzipetutako 26 lagunetatik gehienei ETAko kide izatea egotzi zien Entzutegi Nazionaleko epaileak, eta horretan oinarritu zen egunkaria eta irratia ixteko. Hiru urte beranduago, Entzutegi Nazionaleko Laugarren Salak auziperatu gehienei ETArekiko kolaborazioa egotzi die eta, beraz, egunkaria ixteko agindua oinarririk gabe geratu da. Orain «Gara» «Egin»en ordezko naturala dela frogatu nahi dute epaileek, eta hala dela erabakiko balitz, «Egin» kudeatzen zuen «Orain» enpresaren zorra «Gara» kudeatzen duen EKHEri bizkarreratuko litzaioke. Hau guztia 18/98 sumario ezagunean garatzen ari da, gerora Xaki, Ekin eta beste zenbait operaziok gizendu dutena.