Irailean zine aretoetan ikusteko parada izango dugu "Galíndez". Igeldo Komunikazioaren lan berria Angel Amigok ekoiztu du eta baita gidoia egin ere. "La Mafia en la Habana" dokumentalean bezala, oraingoan ere Ana Díez da zuzendari lanetan. Filma prestatzeko FBIk (Federal Bureau of Information) emandako 50.000 dokumentu eta CIAk (Central Intelligence Agency) emandako beste 200 informe izan dituzte euskarri. Dominikar Errepublikan eta Estatu Batuetan FBIko informatzaile izan zen jeltzalearen istorioak 130 milioi pezeta (5,2 milioi libera) inguruko aurrekontua du. Angel Amigok aspalditik, txikitatik, ezagutzen du Jesús de Galíndezen kasua eta bere izaera borrokalaria baloratzen du.

Jesús de Galíndez Madrilen jaio bazen ere, amurriotarra zuen familia. EAJ-ko ordezkaria izan zen Madrilen eta Errepublika garaian Manuel de Irujo Justizi Ministroaren laguntzaile. Gerra garaian Brigada Vasco Pirenaicoan hartu zuen parte, baina Errepublikak porrot egin zuenean gudariekin Frantziako muga pasa zuen. Kontzentrazio kanpamentu batetik ihes egin ostean Dominikar Errepublikan erbesteratu zen. Trujillo diktadoreak onartu egiten zituen Espainiatik heldutako erbesteratuak, biztanleria mulatoa "zuritzeko" asmoz. Bertan Galíndez, Agirre lehendakariaren aginduz, FBIko informatzaile lanetan hasi zen. Estatu Batuek "Euskal Herria-Frankismoa" auzian parte har zezaten nazien aurka baliagarria izan zitekeen informazioa ematen zuen. Trujilloren gobernuan hasi zen lanean 1945ean, hala ere, isilean diktaduraren aurka ziharduen. Egoera arriskutsua bihurtu zenean, Agirrek eskatuta, New Yorkera joan zen Galíndez. Han, Columbiako Unibertsitatean irakasle zen bitartean FBIarekin harremanetan jarraitu zuen. Gutxira, diktadorea gogor salatzen zuen "La Era Trujillo" idazten hasi zen. Dominikar Errepublikako estatu buruak aginduta, 1956an, Galíndez Manhattanen bahitu, hegazkinean diktadorearengana eraman eta erail egin zuten.

Duela 50 urteko kasua izanik, Angel Amigoren lantaldearentzat zailena lekukoak aurkitzea izan da, gehienak hilik baitaude. Hala eta guztiz ere, duela bi urte hasitako lan prozesuan testigantza oso interesgarriak lortu dituzte. Gainera, askok estrainekoz hitz egin dute kasuaren inguruan. Izan ere, orain arte alde hispanoan egin dira ikerketa eta elkarrizketa gehienak. Igeldo Komunikazioa Euskal Herriko nahiz Dominikar Errepublikako jendearekin egoteaz gain, Estatu Batuetan ere izan da. Anthony Bouza da lekuko horietako bat, New Yorkeko Polizia Saileko agentea izana eta Galíndezen kasuaz arduratu zena. Berak esandakoak gidatuko du dokumentala. Ekoizlearen esanetan, polizia estatubatuarra oraindik obsesionaturik dago kasuarekin. Zenbait urtez ikerketak egin eta hiltzailea nor zen jakinda ere, ez baitzuen inolako froga baliagarririk aurkitu. Bouzak dioenez, hasiera batean ez zuten inolako presiorik, baina Trujillok Gerald Lester Murphy, Galíndez Dominikar Errepublikara eraman zuen piloto estatubatuarra hil zuen aztarnarik ez uzteko asmoz. Ondorioz, kasuak "Galíndez-Murphy" izena hartu zuen eta FBI sekulako ikerketa egiten hasi zen. Garai batean FBI eta CIAko agentea izan zen John Joseph Frankek antolatu zuen bahiketa. Filmean Plato Cacheris eta Bill Hundleyren testigantzak jasotzen dira. Cacheris eta Hundley fiskalak izan ziren Franken kontrako auzian. Senitartekoei dagokionez, Fermin Galíndez da gaur egun berari buruz hitz egin dezakeen bakarra. Jeltzalearen anaiak bahiketak familian izan zuen eraginaz hitz egiten du. Filmean Ludger Mees historialariak ere hartzen du parte, Eusko Jaurlaritzak erbestean izandako politikan aditua.
Horrez gain, Estatu Batuetan aurkitu zuten "Private eyes of the President" liburua da mintzagai, Tony Ulasewicz-ek idatzia, Stu McKeever-ekin batera. Ulasewicz New Yorkeko poliziako Bureau of Special Services of Intelligence-ko (BOSSI) agentea izan zen eta Galíndezen desagerketa aztertu zuen.
Bestalde, Mario Vargas Llosa eta Manuel Vazquez Montalbánek ere liburu bana dute kasu honen inguruan. Filmean bi idazleen iritzia entzuteko parada izango da.
Ordu eta erdi iraungo du filmak. Eta elkarrizketa horiez gain, garaia kokatzeko baliagarriak diren dokumentu eta materialak ikusi ahal izango dira.