Deustuko Erribera, Ibarrekolanda, Elorrieta, Arangoiti, San Inazio eta San Pedro Bilbo hiriko auzoak badira ere, zazpi auzook Deustualdea -administrazio arloan Bilboko 1. barrutia legez ezagutzen da- osatzen dute. Bertan, han-hor-hemengo euskara talde eta herri aldizkarien loraldi aroak eraginik eta etorkizuna euskaldunona izan behar duenaren iritziak sinetsirik, berein euskaldun batu zen iaz Berbaizu euskara elkartea sortuz. Euren xederik behinena Deustualdeko euskaldun komunitatea trinkotzea da, eta helburu horri eutsiz, gizartearen esparru guztietan euskararen normalizazioa lortzeko tresna eraginkorra izan gura dute. Hori guztiori erdietsi nahirik, lehendabizi euskara elkarteak aurrerantzean jarraitu beharreko lan ildoak (Deustuko euskaldunon elkar ezagutza erraztu, euskaraz bizitzeari muzin egiten dioten euskaldunengan eragin, euskarari dagozkion funtzioak berreskuratu, besteak beste) zehaztu, eta aldi berera, lantaldeak eratu zituzten xede eta ildoen gauzatzeko. Bilgune lan taldeak taberna-txokoa egitasmoa lantzen du. Gazte arloak gazteriaren inguruko egitasmoak mamitzen ditu. Kulturgintzakoek etorkizunekoan euskara elkarteak eskainiko dituen kultur zerbitzuak diseinatzen dituzte. Normalkuntza lan taldekoek esparru ezberdinetan euskararen normalizazioa lortzeko jarduten dute.
Deustuko jaien inguruko lanak koordinatzen ditu beste talde batek. Aisialdiko taldekoak inguruko herritarrei eskaintza atsegin eta euskalduna helarazten saiatzen dira. Azkenik, komunikazio taldekoek Deustualdeko euskarak dituen premiak eta bertako euskaldunen beharrizanak aztertzen dituzte.
Komunikazio lantaldeak egin ikerketaren puruz, euskarazko hedabide idatzi baten nahia nahiz beharra antzeman zen. Halatan, lokala lortu, erredakzio lan taldea eratu, hilabetekariaren azala eta egitura gorpuztu, eta finantzazioa lotu ondorenean, martxan ipini dute herri aldizkaria. Oraintsu -iragan martxotik goiti, xeheki-, "Prest!" doako hilabetekaria plazaratu berri dute, Deustualdearekin (berba hau erabiltzen dute 1925 arte herri independiente izan zenaren eremu osoa izendatzeko) lotuta dagoen informazioa hur-hurretik batu eta bertako euskaldunei nola batuaz hala bizkaieraz irakurtzeko aukera luzatuz. Berbaizu elkarteko lehendakari Jose Moralesek aldizkariko lehen zenbakian izkiriatua gure eginez, "garrantzi handikoa da Deustun euskara hutsezko komunikabide bat edukitzea eta, horregatik Berbaizu euskara elkartea sortzeaz batera, komunikazio batzordeak buru-belarri ekin zion aldizkariaren egitasmoa mamitzeari". Berbaizu euskara elkarteak, besteak beste, euskal komunitatea sendotzen lagunduko duen kalitatezko eskaintza kulturala ziurtatu gura die bertako euskaldunei, eta lan ildo horrekin bat eginez "Prest!" aldizkaria txukun, kalitatezko eta berritzaile dugu. Erredakzio taldera, berbarako, hedabide zenbaitetan (EITB, "Egin", "Berton" aldizkaria, "Hitzartu" aldizkaria ) arituriko eskarmentudun profesionalak eta berrikitan kazetaritza ikasketak bukaturikoak batu dira, baita kolaboratzaile andana ere.

Euskara batua nahiz bizkaiera batuaz idatz daiteke kazetariaren gogora, beti ere bateko nahiz besteko arau eta legeak akorduan izan eta zuzen betez. Haatik, Deustualdeko euskaldunei (bederatzi mila inguru, euskara taldeak egin zerrendatzean) euskara txukun eta jasoko aldizkari bat eskaini nahian, "Prest!" aldizkarikoek zuzentzaile bat ipini dute langintza horretan. Egindako lan sendo eta errimeak bi mila aleko lehen zenbakia gauzatu du. Orain artean, aleok euskaltegi, taberna eta dendatan banatu ez eze, mila eta bostehun etxe euskaldunetara ere bidali dituzte. Aurrerantzean, inguruko euskaldunen helbidea lortu gura dute, "Prest!" aldizkaria posta bidez eta debalde Deustualdeko euskaldun ororen etxera hel dadin.

Molde honetako aldizkariek ohiko duten egiturari eutsi diote; inguruko eskolen esku dagoen atala, artikulu monografikoak, gureak kanpoan, kanpokoak gurean, argazki zaharra, elkarrizketa, berri laburrak, kultura, kirola eta komikia. Orobat, zenbakirik zenbaki aldizkariko azalean agertuko den argazkiarekin lehiaketa antolatu dute. Argazkia Deustualdeko leku zehatz bat izanen da eta zein leku den jakinez gero, nahi duenak azalari datxekion datu-orria bete eta aldizkariaren egoitzara igortzearekin batera, liburu sorta baten zozketan esku hartuko du. Ibili-ibilian gauzak patxadaz eta astiro egin behar direla jakinik, aurrerantzean, epe laburrera begira sikiera, proiektua sendotu gura dute. Euskara elkartea eta aldizkaria ezagutzera eman, harpidetza kanpaina abian ipini, izaniko gabeziak zuzendu eta abar. Etorkizunera begirako egitasmoak, ordea, geroak zehaztuko ditu. Hektor Ortega "Prest!" aldizkariko zuzendariaren hitzetan, "aldizkaria orain hilabete jaio da, eta gure nahi guztia "Prest!" kalean ikustea zen. Aurrera begira ikusiko da zein bide hartuko dugun, baina beti ere unean uneko errealitatea eta bitartekoak kontuan izan beharko ditugu".