Euskal Eskola Publikoa XXI. mendean sartu da eta ongi etorria eman nahi dio erronka eta itxaropen berriekin. Horregatik Hizkuntzen Urte Europarra ospatzen den 2001. urte honetan jai handia prestatu du maiatzaren 6rako Bilboko Etxebarria Parkean. Hamargarren edizio honek "Mugak gaindituz" izango du lelo nagusia, oraindik ere irakaskuntza publikoak gainditu beharreko oztopoak handiak direlako, euskaraz izateagatik, plurala izateagatik, kultura artekoa izateagatik, lege arazoak tartean daudelako... eta hauei aurre egiteko oraindik lan handia egin beharko delako.
Festa nagusi honek helburu argiak ditu, hala nola, euskal eskola publikoa kalera atera eta bere irudi publikoa indartu, bere kalitatea aldarrikatu, guraso elkarte guztiak inplikatu eta eskolaren aldeko borroka indarberritu, leloak dioen bezala oztopatzen duten mugak gainditu asmoz.
HISTORIA LABURRA BAINA ASMO HANDIAK.
Euskal Eskola Publikoa, gaur ezagutzen dugun bezala, Euskal Autonomia Erkidegoan behintzat 1993ko lege batekin sortu zen, ordura arte ez baitzegoen irakaskuntzari buruzko euskal lege autonomikorik, nahiz eta horren eztabaidak dozena erdi urte lehenago hasi. Urte horretara arte zeuden hiru sareak (publikoa, pribatua eta ikastolen mugimendua) bi bihurtu ziren, ikastolei publikotasunaren edo sare pribatuan sartzearen alternatiben artean erabakiarazi zitzaienean. EAEko gaurko euskal eskola publikoa beraz, lege eta prozesu horien emaitza da, Ana Izagirre Euskal Herriko Gurasoen Elkarteko lehendakariak azaltzen digun bezala. Dena den, berak aitortzen du, oraindik gauza asko egiteke dagoela: "Euskal Eskola Publikoaren legea beharrezkoa zen eta ateratzea garrantzitsua izan zen, baina oraindik gauza garrantzitsuak geratu dira bidean, hala nola, gure hezkuntza sistemarekin egin nahi duguna; koska zera da, zer nolako hezkuntza sistema nahi dugu? Horri heltzeko, legean gauza dezente aldatu beharko lirateke, eta egiten ditugun kanpainak hortik joaten dira, eztabaida hori sortu asmoz". EAEko ikastetxe publikoez gain, erakunde honek Nafarroako Sortzen sarekoak eta Iparraldeko Ikas-Bi sarekoak biltzen dituela esan behar da.
Gauzak horrela, antolatzaileek azpimarratzen duten moduan, milurteko berrian etorkizunari ateak ireki behar zaizkio, baina orain arte aldarrikatutako helmuga gogoan izanik, hau da, etorkizuneko irakaskuntza izatea, erronkei erantzuten diena, guztion artean eta guztiontzat eraikitakoa, norbanakoari zein kulturari moldatutakoa; handia edo txikia, herrikoa edo hirikoa, baina azken finean euskal eskola publikoa.
Hori guztia kontuan hartuz, oraingo helburua -eta baita leloa ere- legeak, bizitzak eta lurraldetasunak sortzen dituzten mugak eta oztopoak gainditzea dute, muga pertsonal, sozial, administratibo zein legalak alegia, eta horixe bera aldarrikatuko dute Euskal Eskola Publikoaren X. Jai honetan.
EHIGEren bataio publikoa. Aurten gainera festa honetan Euskal Herriko Ikasleen Gurasoen Elkartearen sorrera nabarmenaraziko da. Erakunde hau aurtengo martxoaren 30ean jaio zen Bilboko Guggenheim Museoan eginiko ekitaldian, iazko maiatzaren 10ean Donostiako Kursaalen hasitako prozesuari bukaera emanez. Elkarteak Euskal Herri osoko 202.000 inguru ikasleren gurasoak biltzen ditu (81.000 Bizkaian, 45.000 Gipuzkoan, 23.000 Araban, 50.000 Nafarroan eta 3.000 Ipar Euskal Herrian) eta helburu nagusi batzuekin sortu da. Hain zuzen, herrialde bakoitzeko ezberdintasunak kontutan hartuz berezko hezkuntza sistema, euskal hizkuntza eta kultura defendituko dituzten hezkuntza-ekimenen alde lan egitea, Euskal Herri osoan euskararen ofizialtasuna defendatzea, eskola euskalduna, dohainekoa, bateratzailea, aurrerakoia, berritzailea, autonomoa eta demokratikoa bultzatzea, seme-alaben heziketarekin zerikusia duten gaietan erabakitzeko ahalmena izatea edota eskola ingurune sozialean uztartzea helburu nagusi hauetako batzuk dira.
DEBEKATUTA DAGO ASPERTZEA.
Jaiaren antolatzaileak berez Euskal Herriko guraso elkarte guztiak izan ohi dira, baina aurten Bilbon izango denez Bizkaiko Elkarteak hartu du erantzukizun nagusia. Hauek prestatutako egitarau zabalean denetarik izango da. musika ekitaldiak, kale animazioa txistulari, hankaluze eta musika taldeekin, herri-kirolak eta dantzak bezalako ikuskizunak, umeentzako puzgarri eta ohe elastikoak, antzerkia, txotxongiloak zein pailazoak, denetariko jolasak eta tailerrak... Goizeko 10:00ak eta gaueko 20:00ak bitarteko egitaraua bukagaitza da. Bilboko Etxeberria Parkean egingo diren hainbat ekitaldiren berri alboko taulan duzu.