Euskal Herria ez da ekonomiaren arloan, teknologia berrietan, ikerketa eta garapenean eta zientzian, gertatzen ari diren aldaketa ugarietatik kanpo geratu, eta aspalditik ari da esparru horiek lantzen. Horren adierazgarri garbia da Euskal Herrian eraikitzen ari diren parke teknologikoen garapena. EAE aitzindaria izan da honelako elkartegien eraikuntzan, Iparraldea oraintxe ari da bide berriak zabaltzen, eta Nafarroa ere ari da bereak prestatzen. Datorren ekainean Bilbon egingo da mundu guztiko 200 parketik gora bilduko dituen XVIII. Parke Zientifiko eta Teknologikoen Nazioarteko Konferentzia, eta horretarako Bilbo aukeratu izana Euskal Herriko aitzindaritzari eta EAEko hainbat euskal erakunde eta herritarrek egindako lanari esker lortutako egoerari egiten zaion aitorpena dela esan genezake.
IASP Parke Zientifiko eta Teknologikoen Nazioarteko Elkartearen XVIII. Nazioarteko Konferentzia ekainaren 10etik 13ra izango da Bilboko Euskalduna Jauregian. "Parke Zientifiko eta Teknologikoen Ekonomia Digitalaren eta Ezagutzaren Aroan" goiburuarekin, milurteko berriko lehen biltzar honetan, mundu guztitik etorrita, teknologi, unibertsitate, zientzi eta berrikuntzaren esparruko 500 pertsonalitate baino gehiago bilduko dira.
Bilboko goi bilera hau Australiako Perth herrian 1998ko urrian egin zuen bileran erabaki zuen elkarte horrek. EAEko hiru teknologi elkartegiak Elkartegien Nazioarteko Elkarteko kide dira eta, gainera, Zamudioko parke teknologikoak elkartearen sorreran esku hartu zuen duela hamabost urte.
Mundu mailako biltzar hau Euskal Herrian egitea hemengo parke teknologikoek egindako lanaren aitorpena da, inolako zalantzarik gabe, eta, aldi berean, aukera aparta izango da teknologiaren eta berrikuntzaren esparruan Euskal Herriak duen egitura eta, batez ere, gure teknologi elkartegien eduki eta kalitate bikaina ezagutarazteko.
Ekonomia berria eta ekonomia digitala ezagutzearen garrantziak eragin du Bilboko 2001eko Konferentziaren leloari buruzko erabakia. Berez, teknologi arloko aldaketen zorabiozko abiadurak eta etengabeko berrikuntzak etorkizuneko gizartean garrantzi handia izango duen zerbait nabarmentzen dute: pertsonak duen guztiz funtsezko balioa, ikuspegi integraletik begiraturik. Horregatik, Biltzarraren eginkizun nagusietako bat parke zientifiko eta teknologikoek enpresen garapen guneek aro berri honetan bete beharreko zereginari buruz gogoeta sakon bat egitea izango da.
Bilboko Biltzar honetan jorratuko den programan gai ugari sartzen da, eta goi mailako hizlari ospetsuak izango dira bertan. IASPeko lehendakaria, Heidelbergko (Alemania) parke teknologikoko zuzendari nagusi Klaus Plate izango da lehen osoko bilkuraren buru egingo duena. Bilkura horretako gaia "Ekonomia Berria Ezagutzearen Zeregina" izango da. Hasierako ekitaldi honetan esku hartzekoak dira Japoniako Zientzia eta Teknologiako Goi Mailako Institutuko dekano Ikujiro Nonata irakaslea, eta "Kontzeptu berri bat. Unibertsitate Ekintzailea" izeneko hitzaldia eskainiko duen Piero Formica, Boloniako Unibertsitateko irakaslea.
Biltzarreko bigarren bilkuraren izenburu orokorra "Ekonomia Berriaren sarean lan egiten" da. IASPeko zuzendari nagusi Luis Sanzek eta "Berrikuntzarako Baliabideak Sare Globalen Aroan" hitzaldia emango duen Kaliforniako Berkeleyko Unibertsitateko Manuel Castell irakasleak hartuko dute parte. Horien saioen ondoren, hiru mintegi izango dira: "Baliabide ukigarriak parke zientifiko batean. Nola finantzatu?"; "Marketinga parke zientifiko batean. Nola erakarri enpresak eta inbertitzaileak?" "Garapen guneak. Nola atzeman garatzeko proiektu onak?"
Bilbo 2001eko hirugarren osoko bilkurak honako izenburua eramango du: "Ekonomia berriaren gakoak jorratzen. Ekintzailetza, arrisku kapitala, negozioak sarean...". Debra Amidon iparramerikarrak "Berrikuntzaren autopista erraldoia. Adimen baliabideak mugiarazten" hitzaldia eskainiko du. Osoko saio horren ondoren, parte hartzaileak egun horretarako aurreikusirik dauden bi lan taldetan aritu daitezke. Lehenengoa "Lana sarean egitea. Nola lagundu parkeetako enpresei kanpoan eragiteko" izango da. Bigarrenak "Elkartegiak eta Garapen guneak. Saio arrakastatsuak" du izenburua eta Euskal Herriko Parke Teknologikoetako lehendakari Mauri Lazkanok bideratuko du.
"Zientzi Elkartegien eta garapen guneen mugimenduaren etorkizuna ekonomia berrian" izango da XVIII. Konferentzia honi amaiera emango dio azken saioaren izenburua. Bertan Javier Etxebarriak, Zientzi Ikerketen Kontseilu Goreneko Zientzia, Teknologia eta Gizarteko irakasleak, esku hartuko du "Ekonomia Berria eta berrasmatzearen artea" ponentzia eskainiz. Jorratuko diren beste gai batzuk "Arrisku kapitala eta Hazi kapitala" eta "Garapen gune eredu berriak: enpresa bizkortzaileak" izango dira.
Azken saio honetan, 2001eko Bilboko Konferentzian ateratako ondorio nagusien laburbiltze bat egingo da, eta Quebecen izango den 2002ko Nazioarteko Konferentzia aurkeztuko da.

EAEko hiru parke teknologikoek eta Industri Sustapenerako eta Birmoldaketarako Sozietateak, SPRIk, antolatu duten 2001eko Bilboko Biltzarrak helburu bat baino gehiago ditu. Batetik, IASPentzat, bertako partaideek etorkizunari begira duten egoera estrategikoari buruzko gogoeta bateratu bat egiteko aukera izango da -elkarte honek mundu guztiko 200 elkartegi eta 40.000 enpresa baino gehiago biltzen ditu- eta, aldi berean, bere partaideen arteko esperientzia eta ezagutza trukaketa erraztuko du.
Euskal Herriko parkeentzat aukera ezin hobea izango da beren gaur egungo errealitate garrantzitsua ezagutarazteko eta, etorkizunerako, kanpora begira indartzeko. EAEk, orokorrean, Konferentzia honi esker, Euskal Herriko alderdi honetan duela hainbat urtez geroztik berrikuntzaren eta kalitatearen alde egiten ari den teknologi garapenaren maila eta etorkizunerako duen erronka nazioarteko teknologi arloko aitzindaritzan dabiltzan pertsonen aurrean azaltzeko aukera izango du.
Azken urteotan izugarri hazi dira EAEko parke teknologikoak, eta horrela erakusten dute bertako datu garrantzitsuenek, hau da, fakturazioek, sortutako lanpostuek, barnebiltzen dituzten enpresa kopuruek, hartzen duten azalera eta abarrek. Sortu zen lehenengoa Zamudiokoa izan zen 1985ean, gero Arabakoa 1995ean eta azkenik Donostiakoa 1997an.
Izan duten bilakaera ona kontuan izanik, EAEko parkeen lehendakari den Mauri Lazkanok dioenez, azken hiru urteotan hiru Teknologi Elkartegiek izan duten "bilakaera apartari esker" beren ahaleginak geroz eta gehiago zentratzen dira ingurune aurreratu hauetan bereziki garatzen diren arlo eta eginkizunetan, hau da, "enpresei balio erantsiko zerbitzu gehiago eta hobeak eskaintzea, enpresa arteko lankidetza bultzatzea, unibertsitateekiko lankidetza, teknologiaren eta berrikuntzen transferentzia eta hedapena bultzatzea, eta etorkizunerako beste hainbat proiektu garatzea".

Hiru parke teknologikoetan ari diren enpresek 2000. urtean sortutako lanpostuen kopurua %25 igo da, 1999ko 6.187 lanpostuetatik 2000ko 7.716 lanpostura igaroz. Parke hauetako langileen %42k goi mailako titulua dute, eta horien arteko %25 I+Gn aritzen da.
Elkartegien sarean kokatutako enpresen kopurua 185ekoa da, beraz, 1999. urtearen amaierako kopurua %19 igo da, 156 enpresa baitzituen orduan.
Horri guztiari esker parke teknologikoen sareak berriro ere gainditu egin zituen 2000. urte osorako ezarritako helburuak.
Parkeen jabetzako eraikinetan enpresak jartzeko xedea duten lokalen okupazioa, batez beste, %90 ingurukoa da, nahiz eta Arabako eta Donostiako Elkartegietan bi eraikuntza berri bukatu izan. Eta hiru parkeen lurren okupazioa, berriz, 2000. urtearen lehen seihilekoan %56 ingurukoa zen, urte horren amaierako aurreikuspena %54 ingurukoa bazen ere.
Bilakaera onuragarri hori elkartegien sarean kokatutako enpresen urteko fakturazioan ere nabarmendu zen. 1999. urtean 158.000 milioi pezeta (6.320 milioi libera) fakturatu ziren, eta 2000. urteko lehen seihilekoaren amaieran, arduradunek iragarria zuten 2000ko negozio kopurua erraz iritsiko zela ekitaldi horretarako aurreikusitako 182.000 milioi pezetako (7.280 milioi libera) kopurura. Eta ez zeuden oker, hiru elkartegien artean 210.000 milioi pezetako (8.400 milioi libera) fakturazioa izan baitzuten 2000. urtean, eta horrela egiaztatu du ofizialki sareko zuzendaritzak.
2000. urtean zehar, EAEko Teknologi Elkartegien Sareak 27.000 milioi pezeta xedatu zituen Ikerketa eta Garapena I+G arlorako, hau da, aurreko ekitaldian baino 10.000 milioi pezeta gehiago.

Iparraldeak ere, duela urte batzuetatik hona, badu bere parke teknologikoa eta pixkanaka handitzen ari da bertan garatzen diren jardueren kopurua. Nafarroa, bestalde, hasia da horrelako gune bat prestatzen. Gauzak horrela izanik, Euskal Herriak lau teknologi elkartegi dituela esan genezake, hiru EAEn eta bat Iparraldean, eta laster bost izango dira, Nafarroan berea burutzen dutenean.
Izarbel, Iparraldeko parke teknologiko edo baliabide gunea Bidarten dago kokaturik, Miarritzeko aireportutik oso hurbil, beraz, oso ondo komunikaturik dago autopistaz nahiz hegazkinez. Sektoreari dagozkion jarduera ugari garatzen ditu, eta azpimarratzekoa da mugaren bi aldeetako enpresaburu eta irakasleen topagune bihurtzearen zeregina betetzen ari dela. Iparraldean eta Landetan -hauek ere gune hau erabiltzen baitute- honako industriak nagusitzen dira: larrua eta oinetakoak, siderurgia, bulegoetarako materiala, modako ehungintza, logistika eta grafismoa. Azken hiru urteotan honelako 25 enpresa sortu dira eta, horretarako, oso eginkizun garrantzitsua bete du parkean dagoen eta ikerketa eta garapena bultzatzen duen ESTIA ingeniaritza eskolak.
Eskola honekin batera, Izarbelek bestelako zerbitzu batzuk ere eskaintzen ditu: lekualdaketa teknologikoa bi erakunderen bidez, CRT eta ILS (Innovation Logiciel Systeme). Industria Ministerioak sortutako "label" moduko zerbait dira, eta enpresen kalitate teknologikoa ziurtatzeko aukera eskaintzen dute.
Gaur egun dituzten jarduerak handitu eta hobetzeko asmoa iragarri dute azken asteotan. Horretarako, 19 milioi liberako inbertsioak egingo dituzte, bertako 65.000 metro koadro libreei dagokien erabilera emateko eta elkartegia benetako berrikuntza eta sormenerako gune bihurtzeko. Bere handitze lanen barruan 540 metro koadro eskainiko dituen bulegoetarako leku berri bat eraikitzea aurreikusten dute. Halaber, parke teknologiko guztian segundoko 155 megabiteko sare moderno bat jartzeko proiektua dute.
Beraz, asmo hauek guztiak burutzerakoan, gaur egun Maison de Parc, Maison de Entreprises eta ESTIA ingeniaritza eskolak osatzen duten multzoaz gainera, bestelako instalazio batzuk izango dira Izarbelen.
Nafarroa, bestalde, bere parkerako prestaketetan ari da. Helburu hori 2003. urterako I+G arloko inbertsioak bikoizteko asmoz egindako Teknologi Planean jasota dago. Hain zuzen ere, data horretan egongo da prest parkea, eta, dagoeneko, 50 enpresak eskatua dute bertan egotea.
Nafarroak, gaur egun, BPGren %0,9 erabiltzen du I+G arloan, eta 2003. urterako kopuru hori %1,6ra igotzeko asmoa du. Horretarako 20.000 milioi pezetako inbertsioa egin beharko du, eta horren finantzaketan kapital pribatua ere erabiliko da.
Planak hiru alderdi nagusi hartzen ditu kontuan. Enpresa txiki eta ertainak jabearaztea beren enpresetan berrikuntza sartzeko premiaz, teknologi elkartegiak eta enpresak premiazko baliabideen ingeniaritzaz hornitzea eta ikerketa sarituko duen araudi bat osatzearen komenigarritasuna. Jardueren helburua Nafarroako ekonomian funtsezkoak diren sektoreetan I+G arloa indartzea izango da, esate baterako Erkidegoaren esportazioen erdia baino gehiago bereganatzen duen automobilgintzan eta nekazaritzako gaien elikaduraren arloan. Etorkizun handiko beste sektore batzuk ere bultzatu nahi dira, esaterako energia berriztagarriak -Nafarroak dauka Espainiako Estatuko parke eolikorik handiena-, biomedikuntza, informatika edota teleko- munikazioak..

Euskal Herriko parke teknologikoak ikerketa eta berrikuntzarako egoitza ezin egokiagoak bihurtu dira, ikerketa eta garapenerako jarduera gehienak gune horietan biltzen baitira. Horrela, EAEren kasuan, erabat ari dira betetzen Eusko Jaurlaritzaren helburuak, hau da, "zientzia, teknologia eta berrikuntzaren esparruko erreferentzi bihurtzea", Donostiako Miramon Parke Teknologikoko Inasmet enpresaren eraikuntza berria inauguratzerakoan Jaurlaritzako bozeramaileak esandakoaren arabera.
Testuinguru horretan, esan beharra dago EAEn handitu egin dela I+G arloan egiten den gastua, 2000. urtean BPGren %1,3koa izan zelarik. Eusko Jaurlaritzaren asmoa 2004. urterako kopuru hori %1,8koa izatea da, eta enpresetan gastu hori %1,1ekoa izatea, horrela Europaren pare jartzeko. Parekatze hori lortzeko bide bezala, Zientzia eta Teknologiaren Planaren garapena aipatzen da, enpresen eta parke teknologikoen ahaleginarekin batera.
Beste datu ofizialik ezean, 1998koak dauzkagu eta horietan oinarritu gaitezke ikuspegi orokor bat lortzeko. EAEk, 1998an, 65.930 milioi pezeta, BPGaren %1,19, xedatu zuen I+G arlorako. Euskal enpresek 38.200 milioi pezeta erabili zituzten horrelako jardueretan. EAEko hiru parke teknologikoek EAEko I+G arloko gastu guztiaren %23 eta euskal enpresek horrelako xedez erabili zuten aurrekontuaren %35 inguru bereganatu zuten. Hego Euskal Herriari dagozkion 1999ko azken datu orokorren arabera, urte horretan 84.063 milioi pezeta inbertitu ziren, eta horietako 68.931 milioi pezeta EAEri dagozkio, eta gainerakoa Nafarroari.
Hiru parkeek, 2000ko hasieran, I+G arloko 240 proiektu biltzen zituzten programa ofizialetan, eta beste 24 teknologi proiektu unibertsitatearekiko lankidetzan. Zehazki, parkeen barruan, 17.000 milioi pezeta erabiltzen dira I+G gastuetarako. Jarduera esparruen arabera, informaziorako teknologiek kopuru horren %22 bereganatzen dute, aeronautikak eta telekomunikazioek %21 bakoitzak, elektronikak %9, ingeniaritzak %8, medikuntzak eta bioteknologiak %5, I+G zentroek %5, energia eta ingurumenak %4, eta beste batzuen artean %4.
EAEko teknologi elkartegiak, bestalde, bere baitan dauden teknologi zentroen egoitza dira: Ceit, Gaiker, Ikerlan, Inasmet, Labein, Leia, Robotiker, Tecniker, European Sofware Institute, Cidetec, Centro Tecnológico Aeronáutico, Centro Tecnológico Energético eta Imbiomed enpresena, hain zuzen ere.
Zentro horiek gaur egun Espainiako Estatuan dauden I+G proiektu guztien ia erdia biltzen dute, eta horiei esker EAE, I+G ahaleginean, Estatuko bigarren Autonomi Erkidegoa da Madrilgoaren ondoren, eta Europako batez bestekoaren oso hurbil dauden kopuruak erabiltzen dira. Halaber, enpresa horien bidez, 1998an, 206 patente eta 106 erabilgarritasun eredu erregistratu zituzten EAEko enpresek eta partikularrek