Uda Leku Ipar Euskal Herriko haur eta gazte euskaldunen aisialdiak antolatzen dituen elkartea da. Hamabost urte luze daramatza gizarte zerbitzu hau eskaintzen, euskaraz diharduen elkarte bakarra izaki. 203 familia eta 21 ikastetxe biltzera iritsi da bere ibilbidean. Iparraldeko ikasleen denbora librea euskaraz antolatzea ez da aise. Alta, Uda Lekuk proiektu eta egitasmo pedagogiko ontsa landua eskaintzen dio bertako gizarteari. Ibilbide eta esperientzia luzeko jarduera honek ez dio instituzio publikoen aldetiko baitezpadako finantza laguntzarik ekarri ordea. Urrian buruturiko azken biltzar nagusian adierazi zuenez, elkartearen egoera ekonomiko larriaren ondorioz, orain gutxi arte ikastetxeei eskaini izan zaien ateraldien ekimena bazter utzi behar izan du Uda Lekuk.

Uda Lekuk eskaintzen dituen aktibitateak ugari dira. Iaz, ikasturtearen bitartean, Hendaian eta Baionan antolatu zituen barne egonaldiak: musika, eskulana eta informatika ikastaroek, hala nola kanpo ateraldiek bete zuten haur eta gazteen aisialdia. Hamar egonaldi burutu zituzten han-hemenka: zaldi ikastaldia edota bertsolaritzari buruzko jardunaldia, kasu. Zinema hamabostaldia gauzatu zen laugarren aldikotz, Miarritzeko haurtzaindegi zerbitzuak hirugarren urtea bete zuelarik.
Lan kontratua duten hamar langile ari dira elkarte honetan. Denak ez dira denbora osoz ari, ordea. Elkarteak zortzi lan kontratu oso kudeatzen ditu orotara. Alabaina, aldi baterako 25 bat laguntzailek parte hartzen dute elkartearen ekimenetan. 1999ko ekitaldirako 2 milioi liberako (50 milioi pezeta) aurrekontua kudeatu zuen Uda Lekuk.

2.000.000 libera edo 50.000.000 pezetako aurrekontua darabilen elkarte batek ezin ditu bere egitasmoak bat--batean edo etorri ahala antolatu. Hots, urtean barrena eratuko dituen aktibitateak burutu ahal izateko berme gutxieneko bat eskatzen du aldez aurretik. Uda Lekuk garatu duen hamabost urteko zerbitzu eskaintzak ez du instituzioen aldetiko konfiantza eta sostengua bildu orainokoan. Elkarteak ez du etsitzen ordea, eta nola edo hala finantzatzen da. Iazko aurrekontuaren % 59 zerbitzu erabiltzaileek ordaindu zuten. Ikastetxeek eta gurasoek, alegia. Hauxe izan zen diru iturri nagusia. Estatuen instituzioen aldetiko dirua honela heldu zen: CAF (Caisse d'Allocations Familiales) delakotik %19. Frantziako Estatuan familiei laguntza ekartzen dien kutxa da CAF. Aurrekontuaren % 7 tokian tokiko herriko etxeekin hitzartzen den akordio berezi baten bidez heldu zen, haur txikientzako kontratu berezi baten bitartez. Derragun, bitxikeri gisara, udalek ematen duten % 7ko laguntza honen % 70 CAFetik heldu zaiela udalei. Udalen ahalegina eskasa da, beraz. Adibidez, lehen aldia da aurten Baionako Herriko Etxeak dirua eman duela. Gutxi da, ordea. Honela erran digu Uda Leku elkarteko Tito Agerre zuzendariak: "Baionako Herriko Etxeak eman behar lukeen baino bospasei aldi gutxiago eman digu. Gure egoera ekonomikoa behiti doa nabarmen. Gure aurrekontua goiti doa eta instituzioen laguntza ez da hein berean goiti ari. Iaz 12.600 libera ukan genuen udal zenbaitetik, baina ez molde finko eta jarraikorrean". EKEk aurrekontuaren % 2 hartu zuela aipatu behar da, bestalde.

Paueko (Departamenduaren izenean) eta Bordeleko (Erregioaren izenean) Kon-tseilu Nagusiek hartu beharko lukete beren gain Uda Lekuren finantziazioaren ardura, baina ez dute hartzen. Elkarteak, hartara, Ipar nahiz Hegoaldeko Udal eta Herriko Etxe guztiei laguntza eskatu die. Hegoaldeko hainbat udalek, bospasei oraingoz, eskaera kontuan hartu dute eta diru laguntza jasotzea espero dute aurki. Ber gauza egina dute Iparraldean. Iragan urtera arte kosta aldeko udal handietara baina ez zuten luzatua eskaera. Egun, berriz, elkarteak herriko etxe guztietara helarazi du gutun bana.
Udalbiltzan hitzartu zen dirua igurikatzen du anartean Uda Lekuk: "Udalbiltza bozkatuak izan ziren 400.000 libera ez dira etorri eta ez dakigu noiz etorriko diren. Funtsean, diru hori Udalbiltzaren egoerari lotua dago. Udalbiltza gelditua den bitartean ez dugu deusik ukanen. Bistan da, guk Udalbiltza abian jartzea nahi dugu. Alabaina, politikari lotuta dagoen afera da hori. Anartean, Hegoaldeko udalen erantzunen zain gaude. Laurogei bat udaletxek dirua eskainiz erantzungo baligute, heldu den martxoko herri bozken karietara, Iparraldeko herriko etxeak Uda Leku laguntzera 'behartuak' senti litezke nolabait. Hegoaldeko udalek laguntza hau publikoki adierazi zezaten munta handikoa litzateke guretzat", adierazi digu Tito Agerrek .