Aurtengo datuen arabera, 0,42 ibilgailu dago egun Bilbon biztanle bakoitzeko, orain bost urte 0,37 ziren bitartean. Guztira 2000ko apirilean 149.258 ibilgailu zeuden. Horietako bakoitzaren jabeak zerga bat ordaintzen du: 8 eta 12 zaldi bitarteko autoengatik 9.280 pezeta urteko, 12 eta 16 bitartekoengatik, 19.580, udaletxeak emandako datuen arabera. Kotxe kopuru handiaren ondorioz trafiko arazoak areagotzen doaz, bereziki goizeko hamaikak eta ordubiak bitartean eta arratsaldeko seiak eta zortziak bitartean. Zehazki Ernesto Erkoreka Plazan eta Riberako sarreretan gertatzen dira. Ekonomia eta Ogasun Sailetik diotenez, arazoak kaleetako lanengatik -gehienbat oinezkoentzat egokitzen ari diren kaleengatik, hala nola, Ercilla kalean eta Gran Vian- eta azkenaldian ia egunero burutzen diren manifestaldiengatik sortzen dira.

Gasteizen guztira 971 aparkaleku daude lur gainean, lur azpian berriz, 3.079 ibilgailuentzat dago lekua. Iaz 105.366 ibilgailu zeuden hirian, orain bi urte berriz, 97.886. Pertsonako 0,48 ibilgailu dago bertan eta 1,37 familia bakoitzeko. Iazko ibilgailuen kopuru osotik, 84.456 ziren autoak, 11.265 kamioiak eta 326 autobusak. Isunei dagokionez, iaz 109.570 jarri ziren Trafiko Bulegotik, horietatik 51.008 gaizki aparkatzeagatik.
Pio XIIko sarrera eta irteerek sortzen dituzte trafiko arazorik handienak Donostian. Eguerdiko hamabi eta erdiak eta ordubiak bitartean eta arratsaldeko seiak eta zortzi eta erdiak bitartean gertatzen dira kotxe ilara handienak. Udaletxeko Trafiko Ataletik diotenez, norbanakoaren kotxearen erabilera zentzugabeak eragiten ditu honelakoak. Guztira 4.011 ibilgailuentzat dago lekua lur azpiko aparkalekuetan. Horrelako aparkalekuak burutzea da egun Donostiako Udalaren joera. Horren barruan Alderdi Eder-Boulevard eta Kursaaleko aparkalekuak egin ziren. Aurreikusita daude gainera, Larratxon eta Benta Berrin aparkaleku bana egitea eta Artzai Onakoa handitzea. Hiriaren erdialdean eta Grosen gainera, 5.300 aparkaleku daude OTAko zerbitzuaren baitan. Guztira iaz 66.736 kotxe zeuden Donostian, aurreko urtean baino 1.398 gehiago. Guztira, etxebizitza bakoitzeko 0,86 auto. Diotenez gainera, aurtengo urtean 1.697tan haziko da kopuru hau.

%5 handitu da azken bost urteetan kotxe kopurua Baionan. Bertan dauden 20.000 autoek gero eta arazo gehiago dute lekua aurkitzeko. 1.400entzat lekua duten hiru lur azpiko aparkaleku daude, eta laugarrena eraikitzen ari dira. San Leongoa da zirkulazio gune sensibleenetakoa, ostiraletan 60.000 ibilgailu pasa daitezke ospitalea dagoen ingurutik. Guztira, Pirinio Atlantiko ko Departamendua osorik hartuta, 0,16 kotxe daude pertsonako bertan.
Iruñean azkenik 100.000 ibilgailu daude, 0,52 biztanleko. Ez dago bertan trafiko arazo handiegirik, auto-ilarek ez baitute 20 minutu baino gehiago irauten, bertako Udalaren arabera. Urtero ordea, 60.000 bat isun jartzen dira. Iazko uztailean 649 leku dituen Carlos III aparkaleku berria sortu zen