Arrandegian, merkatuan, lantokian, toki guztietan dute "Gran hermano" hizpide. Umeek ere ikusi behar dute, hurrengo egunean ikastetxeko beste kideen aurrean baztertuak geratuko ez badira. Unibertsitateko ikasleak ere tesiak egiten hasiak dira "Gran Hermano"ren gertakari soziologikoa dela eta.
Batez beste zortzi milioi ikusle ditu egunero, 24 eta 44 urte bitartekoak, horietatik %59 emakumeak eta %41 gizonekoak direlarik. Tele 5eko laburpenak deskafeinatuegiak direla uste dutenek Via Digitalera baino ez dute jo behar, non partaideak sexu harremanak maindire azpian edo dutxan nola dituzten zentsurarik gabe 24 orduz ikus daitekeen; edota komuneko ontzian eseri eta gero eskuilarekin garbitzen. Bestela, Interneten dute ikusgai. "El Correo" eta "Diario Vasco"k ematen dioten garrantzia neurriz kanpokoa da, kontrazalak eta oro. Disimulatu ere ez dute egiten Correo Taldea Tele 5eko akziodun nagusi dela. ETB-1eko "Sorginen laratza"n ere gizon bat giltzapetu dute.

Itxura batean, NASAko astronautak hautatzen dituen psikologo bat erabili zuten "Gran Hermano"ko 10 partaideak aukera zitzan. Izaera ezberdinekoak, baina elkarren osagarri izan zitezela. Beren guraso, lagun eta lankideekin mintzatu ziren, gainera. Lehiakideak sormena eta oreka emozionala duen jendea dela diote hautatzaileek, negoziatzeko ahalmena dutenak eta, harrigarriena, adimen koziente handikoak. Haatik, saioa 10 segunduz ikustea baizik ez dago hori gezur borobila dela jakiteko. Okerrena ez da saioa ikustea, astakeriak entzutea baizik. Genitalekin zerikusia dutenak bereziki, barrukoen arabera emakumeek ere potroak dituzte-eta. Barnetegi hortera horretan zein baino zein arruntagoa da. Lehena kanporatu ondoren gainera, amaitu dira laztanak, masajeak eta itxurakeriak. Dagoeneko hasi dira ika-mikak. Ikusleek begitan hartzen duten kidea izango da kanporatua, beste irizpiderik gabe. Zinez barregarria da garai batean seriotasunaren eredua zen Mercedes Milak halako idor aurpegia jarriz azalpenak ematea, hil ala biziko kontua bailitzan. Zergatik ez da Mercedes Mila etxean sartzen, barrutik aurkeztuz esperimentuarekin gehiago goza dezan? Oilo ipurdia jartzen zaigu Milaren ordez Jesus Hermida jarri izan balute pentsatze hutsarekin. A ze matraka botako zukeen harek!
Ez gara saioa abiaraztearen kontra hasiko. Badakigu morboaren aitzakian denak balio duela. Bestelakoa da gure kezka, ikerketa soziologikoa egiteko balio lezake, baina ez giltzapetuta dauden partaideez, ikusleez baizik. Antza, jendeak halako zaborra ikusi nahi du, etxera leher eginda heltzen dela esanez. Saio honek agerian uzten duena baina, jendea asper-asper eginda bizi dela da, ez duela berezko bizitzarik.

George Orwellen "1984" eleberrian oinarritua, Endemol ekoiztetxeak "Big brother" ("Anaia zaharra") sortu zuen. Herbehereetan "Big Brother"eko irabazlea, Bart, pertsonaiarik ospetsuena bilakatu da, futbolarien gainetik eta errege-erreginaren pare. Halaber, CBS estatubatuar kateari saldu dio.
Alemanian martxoaren 1ean hasi zen "Big Brother" RTLn, telezaborraren katea, alegia. Hala, bere titi oparoak erakusten dituen Sabrinari sartu aurretik egin zuen lapurreta leporatzen diote. Bada, RTL kateak Sabrinaren zorrak kitatu ditu, barruan segitu dezan.
Zalapartarik handiena ordea, Zlatko Trpkovski mekanikari langabetuak etxean utzi behar izan zuenean gertatu zen. Orain, disko bat kaleratu eta bere saioa du telebistan ("Zlatko's Welt). "Big Brother" pornoa egitea ere proposatu diote. Arrakasta ikusita, hilaren 22an, Herbehereetan "Big Brother Vips" hasiko da, zeinean partaide arrunten ordez pertsonaia ezagunak sartuko dituzten. Ba al da jende ospetsuaren benetako izaera ikustea baino morbo handiagorik? Umeentzako "Anaia txikia" asmatzea ere ondo legoke. Edo bertsio bat presidiario arriskutsuez osatua; ikuskizun aparta, elkar erasotuz sarraskia ziurtatuko ligukete-eta